Search form

2 Jon 1

1Mamey okukwe ha sios-makwey-uwr hiy mey. Hakwe mamey okukwe sa, God hiy ma lahan iaup o, hoko ney-om o, hme mey kow ha.+ Hakwe hme kokwe ok-ar-ok ke hokuaw uron-pi ko-ar nuw-wak. Hakwaw korey, sawk uwrsa lowpwarowp okar-ok ke ma nonkway hom seyn, hme uron-pi ko-ar lwak, 2payhokuaw, okar-ok hokwe hromo mon lwayr, seyr hreme nion senkin-aw non-wayr ey.

3Aio God o, Aio so Ney, Jisas Krais o, hohkwe hremekwe maym o, uron lowk yor o, liwak marowhway yor o, seme ka kow. Weynpaweyn somokwe okar-ok non o, uron-pi ko-ar yor non o, hreme nion ka lwak.

Okar-ok o, uron-pi ko-ar o

4Hakwe kar sehe ley, payhokuaw, hakwe senkin nonkway, hno ney har homkwe ok-ar-ok ko meyki pyay, Aio hiy hreme ma me-kupaku senkin. *5Sa ihey-ar akwa, hakwe hne senkin mesopok, hromkwe wayh-wayh me uron-pi ko-ar lwak e. Hakwe hnekwe me-kupaku-ok iwon ke mey kow pey. Me-kupaku-ok sokukwe hrom peyr-ar ma lonok pie hok non. *6Uron-pi ko-ar ha ma me sokukwe senkin, hromkwe God so me-kupaku-ok me lonuayk me pyay e. Homkiaw peyr-ar po lonuayk pie, hyo me-kupaku-ok kokwe senkin, homkwe uron-pi ko-ar lwak yor nonaw lanio e.

7Okrei-uwr kraiar homkwe kipay lowpwarowp mon po ley neyney. Unsaney somokwe ok-ar-ok, Jisas Krais hiy iwar mo owhi non ma nake hokwe, me-kumay sakon kawk pey. Unsaney senkin somokwe okrei-uwr, seyr okrei-krais. *8Homkwe iray-iray non kwa lwak, sa mey, hom ma meio lonok me mon swakreik ha lak. Sawk God hiykwe hmekwe, pie ka ma-sahre kow prusow. 9Unsaney, Krais so hiymon sorasor me ma lokriy hain, sawk yirour-irour non ma nakey homkwe, God se nion non-wak pey. Unsaney Krais so hiymon sorasor mon-aw ma lwak somokwe, Aio o, Ney o, hehe nion non-wak. 10Unsaney prueyn hno owh mon ma le hiykwe, hiymon sorasor-ok sokwe nake pa lwak ankin, hunkwe unsaney sohokwe hno a mon peie me-huonok yawriy o, seyr kar peie me ey huon o. 11Hunkwe uwr senkin sehe kar nonaw me-huonok yawriy ankin, hunkwe hyo yor piap-araw me lon-mon wayh-wayh.

Ok pariawey hom non

12Hakwe hmekwe ok kraiar mey kow e mon, sawk hakwe mamey non mey e mon pey. Hakwe hmekwe hakiaw le ira e mon, seyr ine sawk-sawk non-ohruw e mon, hromo kar ley yor ke nak-mon prusow lowpway ey hokwe.

13Hno ine, God hiy ma lahan iaup ko ney homkwe, hne me-ihey-ok me-ha.

God so Sokior-ok Iwon

© 2013, Wycliffe Bible Translators, Inc. All rights reserved. More Info | Version Index