Search form

Galesia 2

Aposel homkwe Pol so mey uwrkayn irweyk me meio kow ey ke ipan lon

1Hakwe yia mokwe 14 sankaw lwak ha, sohiy so meyki hokwe hakwe Jerusalem mon ma-ley, Barnabas se nion. Seyr hakwe Taitus se nak-huonok. *2Hakwe serey sehe ley, payhokuaw, God hiykiaw kokwe hane senkin mesair hrahra kow. Ha Jerusalem mon lwak menkin, hakwe kristen mo peyrmawk liarok uwr me nion-aw non-swa-hokruw, hmo hokruw-a arian mon. Hakwe God so ok-ihey ke uwrkayn irweyk me penkin mesor kow e, hakwe uwr serey ma swa-hokruw me ma-me-sorasor kow. Hakwe senkin sehe lon, hano mey, paraw ma meio o, enekwei enkin ma meio o, makuayk lopa ka lwak. 3Hano wayh Taitus, hane nion Jerusalem mon ma non-ey hiykwe mo Grik-uwr, sawk Juda-uwr somokwe hreme Taitus so owh-ohi se me-sasay ei ampru sow pa. 4Hromkwe lei ampru ok sokwe lohruw-a, payhokuaw, uwr har, kristen-ok ma me homkwe hromo ompok mon ouon-aw po mon loior ne, sawk homkwe kristen korey. Homkwe hromo yor, Krais Jisas hiy hrome ma preisia kow ha ke lira nonkway sue e le. Seyr uwr sohom mo uron mokwe senkin nan, Juda mo sow penkin me e, hromkwe hmo meyki-aw pyay e, seyr hmo mey-uwr puraw lwak e. *5Sawk hromkwe God so ok-ihey ko okar-ok hme nion ma non-wak ke hokuaw kokwe uwr senkin me ipan lon pa, Taitus so owh-ohi se lei ampru sow ey hokwe.

6Sawk uwr serey suko, Jerusalem-sios mo uwr karmay me hieyn ma lira mokwe, mo hom karmay lwak hi, karmay lwak lopa lwak hi, hom penkin uwr lwak e, hakwe aiopey liy nanpanan ley. God so lira mesor anon mey kokwe iwar mo owh kumay ko aiopey hay liy nanpanan ley. Sawk uwr karmay somokwe, hane senkin me pa, God so ok-ihey, ha ma mesor mokwe, ha omok ma-mesor ankin, hakwe irweyk eyn mesor e. 7Korey law, sawk sios mo karmay somokwe senkin lira; mey, God so ok-ihey ke uwr-kayn irweyk me mesor kow ey kokwe God hiykwe hane po kow, hiy mey God so ok-ihey ke Juda me mesor kow ey ke Pita se peyn kow, senkin kow. *8Payhokuaw, God hiykwe Pita se krai po kow, aposel-mey Juda mo ompok mon meio ey hokwe, seyr God hiykwe hane seyn, krai po kow, aposel-mey uwrkayn irweyk mo ompok mon meio ey hokwe. 9Seyr Jems, Pita, Jon-om, sios mo hiy-meio kraipakrai-uwr ok ma me homkwe, hane senkin lira nonkway, God hiykwe hyo maym, mey ipey-ar sokwe meio ey hokwe, hane po kow. Homkwe sawk Barnabas o, ha o, hrere iha seme nekie waykuw waykuw. Sohokwe meir, hom hrere nion uron kamon-aw ma non-wawwaw meio ey se mesair kow. Hrom lowpwarowp mokwe senkin me-sakon kawk, hrorkwe uwrkayn irweyk me hiy-meio ey, seyr homkwe Juda me hiy-meio ey. 10Homkwe hrere kokwe ok kamon senkin ke-aw me-kow, hrorkwe Juda mo kristen omeme ohna ma lwak me hiy-mon wayr-wayr e. Hmo ok sokukwe hakwe kar ley, payhokuaw mey sokukwe hakwe mo sokwe meio e nuw-nanpanan kraiay. *

Pol hiy Pita so yor piap kamon ke mesor hror-say kow

11Sawk Pita hiy Antiok mon le menkin, hakwe hye kokwe yier-ok inopuaw non-me huon, payhokuaw, hiykwe yor piap ke mon, hiy uwrkayn irweyk me nion non-a ankin, hiykwe Juda me ouon-aw nak-wak. 12Hiykwe senkin lon, peyr kristen har Juda ko Jems hiy ma me-ha hom lousne lopa non kokwe, hiykwe uwrkayn irweyk me nion non-a. Sawk enekwei uwr sohom lousne menkin, hiykwe uwrkayn irweyk me nion pase manon-waw-waw e, payhokuaw, hiykwe Juda mo kristen, owh-ohi me ma lei mapru sow ke ma nakruok seme nuw-hok. *13Hiy senkin lon menkin, wo, Juda mo kristen har homkwe sa hyo okrei-yor sokwe ma-pyay meio. Hom lowpwarowp senkin meio menkin, Barnabas hiy seyn, hmo okrei-yor sokwe makiy-nuw-pyay meio.

14Hakwe hom ok-ihey ko okar-ok ko yerki luw-luw-aw mon ma lanio lopa me lira menkin, hakwe sa Pita se hmo lowpwarowp mo inour mon senkin sehe me, “Hunkwe Juda-uwr, sawk hunkwe uwr-kayn irweyk me hieyn-aw nuw-wayr, hunkwe Juda mo sow me pyay pey. Hai, hwon uwr-kayn irweyk me ma me-sasay kraiay, hom Juda mo yor me pyay e, suw penkin so?”

Juda-uwr o, uwr-kayn irweyk o, yerki kamon-aw nonaw huonok prosue ey

15Okar, hromkwe Juda mo ney-nona, hromkwe uwrkayn irweyk, yor piap-araw non ok ma me mo ney-nona korey. 16Sawk hromkwe senkin nonkway, God hiy uwr prueyn se luw-luw-aw-ok ma me hokwe, Jisas Krais se ma nan kiykiy-ay so kueir nonaw me, Moses so sow me ma meio wayr se hokuaw me pey. Hrom seyn, Krais se sehe nan kiykiy-ay, God hiy hreme luw-luw-aw-ok ka me. Moses so sow me meio yerki so kueir nonaw korey, sawk nan kiykiy-ay yor ko kueir nonaw. Payhokuaw, Moses so sow me ma meio yerki so kueir nonaw hokwe uwrsa me kokwe luw-luw-aw-ok liy me ley. *

17Enekwei hrom Krais so kueir nonaw luw-luw-aw lwak e ma nakyas hokwe, hromkwe hromkiaw-ayay senkin lira nonkway, hromkwe uwrsa yor piap-araw non, uwr-kayn irweyk me hieyn. Hai, ok sohok ko meyk kokwe senkin ko, Krais hiykwe yor piap-araw ko mey me hiy-mon kraipakrai? Hakwe hme senkin ma-sahre me: Korey law-ar! 18Sawk hakwe Juda mo sow me pyay yerki, ha ma lokriy hain se ma-meio ie ankin, hrom sow sohom mo ouon mon lwak e, hano ma-meio ie mey sokukwe yor piap ok liy me. 19Sawk Moses so sow hokwe hane po mon okrue. Sow sohiy so nene mon kokwe, hakwe lokrue-uwr se hieyn lwayr, ha God se nion su non-wayr peyow peyow e. Hanekwe Krais se nion hyo now mon po nak-okin pror kawk sawan okrue. *20Sa ha su ma lwayr ohokwe, ha korey, sawk Krais hiykiaw hano mon lwayr. Ha ki mon su ma lwayr ohokwe, hakwe God so ney se nan-kiykiy-ay yor nonaw lwayr. Hiykwe hane uron-pi ko-ar nuw-wak, seyr hiykwe hiykiaw-ayay hane hokuaw po lokrue kow. 21Hakwe God so maym-kow-yor ke mey ayay yaprue ma leip lopa ke hieyn meykyay mon liy sasow ley. Payhokuaw, hane luw-luw-aw-ok me ey hokwe, Moses so sow me ma pyay yerki non lonok hokwe, Krais hiykwe puraw lokrue!

God so Sokior-ok Iwon

© 2013, Wycliffe Bible Translators, Inc. All rights reserved. More Info | Version Index