Search form

Jon 19

Pailat hiykwe Jisas se aw-uwr me mekow omniy mamniy

1Sa Pailat hiy aw-uwr me mekow, homkwe Jisas se kiy-huonok nok, lomniy mamniy. 2Aw-uwr homkwe ur inan non ke lonok nok, king so makwey-kokway ke hieyn ho-a-ho nok, Jisas so makwey mon swakon kawk kow. Seyr owh mon lie ey oupuey ke lway nok, Jisas se manak-ie kow. *3Seyr homkwe Jisas so ohriar mon le nok, hye senkin nak-me-kweyr, “Eypok yaprue-ar, Juda mo King ara.” Homkwe senkin me nok, hye lomniy mamniy.

4Sa Pailat hiykwe ki apau mon ma-lousne nok, uwrsa lowpwarowp seme senkin mekow, “Kwa lira, hakwe hye pokon ki apau mon hiy-ousne, hme senkin me-nonkway kow ey, hakwe uwr sohokwe heyn kamon hye mon okrue ey hokwe lirway pa.” 5Sa Jisas hiykwe omeme hyo owh mon ma lwak mokwe senkin nak-ousne, makwey-kokway ur inan non ma ho-a-ho o, omeme owh ko oupuey ma lie kow sohok o. Sa Pailat hiykwe hme kokwe senkin kiy-mekow, “Ama, uwr mo ehe, kwa lira.”

6Wo, pris karmay lowpwarowp o, God so a pekney-weys se hiy-wayr-sosor-uwr o, hom hye lira menkin, homkwe senkin lokre me, “Now mon nak-okin pror kawk sawan e, now mon nak-okin pror kawk sawan e.”

Sa Pailat hiykwe hme senkin makiy-mekow, “Uwr sohokwe homkiaw kiy-huonok nok, nak-okin pror kawk sawan. Hakiaw kokwe uwr sohokwe heyn kamon hye mon piapay ey hokwe, lirway pa.”

7Sa Juda homkwe Pailat so ok kokwe senkin ma-sahre me-kow, “Hromkwe sow non, sa hiykwe hromo sow mo ok ko liy-liy-aw hokwe liy lokrue, payhokuaw, hiykwe God so Ney-ar ma lwak-ok po me.”

8Wo, Pailat hiy senkin lonuayk menkin, hiykwe sawk hok ipey-ar non nuwnak-wak. 9Hiykwe sawk hyo gavman-a arian mon ma-lyawriy nok, Jisas se senkin ma-mesopok, “Hunkwe yier perey suko se le so?” Sawk Jisas hiykwe hyo ok ke pase ma-sahre onuayk me e. * 10Sa Pailat hiykwe hye senkin me, “Hunkwe hano ok ke lonuayk me pa, panoke lwak o? Hmey, hunkwe senkin pankaw kiy-nonkway o, hakwe krai non, hne kumay mon preisia ha ey o, seyr hne now mon nak-okin pror kawk sawan ey o.”

11Jisas hiy sa hyo ok ke senkin ma-sahre onuayk me, “Hne God ayaw ko hiy krai kow lopa hokwe, hakwe hno iha mon lwak lopa po lwak. Uwr hane hno iha mon ma kow sohiy so yor piap-araw kokwe, hno yor piap-araw ko eir mon sehe lwak.” *

12Pailat hiy ok seme lonuayk menkin, hiykwe sawk yerki, Jisas se preisia ha kow ey se pawk. Sa Juda homkwe senkinaw lokre me, “Sawk hunkwe uwr sehe preisia ha ankin, hunkwe Sisar so wayh-ih-ar korey. Uwr senkin ma me sohokwe ‘hakwe king’ hiykwe Sisar se akre akre me uwr hiy non.” *

13Enekwei Pailat hiy ok sokwe lonuayk menkin, hiykwe Jisas se ki apau mon hiy-ousne ha nok, hyo sey, ok liwak onuayk anon anon ey mon liwak. Yop sohok ko uru hokwe, mein-keip-ok me. Hibru ok non kokwe senkin mowie, Gabata. 14Eypok sohokwe, Pasova-ayay me lonhan onhan koruay ey, enekwei sohokwe pau 12 klok senkin lwak.

Pailat hiy sa Juda me senkin sehe mekow, “Hmo king hokwe ehe ow.”

15Sawk Juda homkwe hye senkin lokre me, “Hye lokin kwor okrue e, hye lokin kwor okrue e. Now mon nak-okin pror kawk sawan e.”

Pailat hiy ma-mesopok, “Hmey, ha hmo king se nak-okin pror kawk sawan e?”

Pris karmay hom sa senkin mekow, “Hromkwe king lopa, sawk Sisar hiykwaw.”

16Wo, sa Pailat hiykwe Jisas se kokwe hmo iha mon sehe kow ha, Jisas se ayaw mon nak-okin pror kawk sawan e. Sa aw-uwr homkwe hye sehe nekie owk nakey.

Jisas se now ayaw mon ma nak-okin pror kawk sawan hiy non

(Mat 27:32-44; Mak 15:21-32; Luk 23:26-43)

17Sawk now hye nian nak-okin pror kawk sawan ey hokwe, Jisas hiykiaw-aw lway nakey. Hiykwe yier kamon makwey-oiow-ok ma mowie mon lway nakey. (Yier sohokwe Hibru mo ok kokwe senkin me, “Golgota.”) 18Yier serey kokwe uwr prueysyar se kokwe seyr serey nak-okin pror kawk sawan. Prueyn se kokwe sayar mon, prueyn se kokwe irayh mon. Jisas se kokwe ompok mon nak-okin pror kawk sawan.

19Sawk Pailat hiykwe ok kamon ke mey nok, Jisas so now mawk-eir mon nak-okin pror kawk iarok ha. Ok sokukwe, senkin mey, “Ohokwe Jisas Nasaret ko, Juda mo King hiy non.” 20Uwrsa kraiar homkwe ok sokwe lanio ira mesor, payhokuaw, yier Jisas se ma nak-okin pror kawk sawan hokwe, taun ohriar mon lwak. Ok sokukwe om krompri non mo ok non meyamey, Hibru-ok o, Rom-ok o, Grik-ok o. 21Sawk Juda mo pris karmay homkwe Pailat se senkin mekow, “Hunkwe ok senkin peie mey o, ‘Juda mo king’ sawk hunkwe senkin mey e, ‘Uwr ohokwe senkin me, hakwe Juda mo king.’”

22Sawk Pailat hiykwe hme senkin mekow, “Korey, ok, ha ma mey sokukwe, senkinaw lwak ey.”

23Aw-uwr hom Jisas se now mon nak-okin pror kawk sawan menkin, homkwe Jisas so omeme owh ko seme lopri nok, iha-iha-aw anon kekie sowkriy. Sawk aw-uwr prueyn prueyn-aw homkwe kopi kamon kamon-aw lway. Seyr aw-uwr somokwe hyo siot meiamei sokwe ma-nakway nok, lira, siot sokukwe laplap kopi kamon-awaw nonaw nak-pror kumey.

24Sa aw-uwr homkwe homkiaw-ayay senkin me, “Ama, hromkwe peie kama-sopre o. Hromkwe heyow kamon satu-ok ma me ke-aw mon onkuw-seyn ey. Uwr-ar siot meiamei sokwe lway ey hokwe, satu ko sor-mey hok ka mesair kow.”

Yor sokukwe liy-liy-aw-ar seme mon ousne, God so ok, mamey porih mon ma mey ke nuw-mon ousne hrahra ha. Ok sokukwe senkin me,

“Homkwe hano owh mon ma lie mokwe, kekie anon anon opri, homkiaw-ayay-aw. Seyr homkwe hano siot meiamei kokwe, heyow satu non mon onkuw-seyn lway.” Sng 22:18

Weyn sokukwe aw-uwr homkwe senkin seme lon.

25Sawk Jisas so pouh arian o, hyo pouh ko nay-ih o, Maria, Klopas so sah o, Maria Makdala ko o, homkwe now, Jisas se ma nak-okin pror kawk sawan ohriar mon nakrok. *26Enekwei sohokwe Jisas hiykwe hyo pouh ke lira nok, seyr hyo ki-wayh hyo uron-pi ko-ar ma nuw-wak se nak-ira, ohriar ma lorok sehe. Sa hiykwe hyo pouh ke senkin me-kow, “Akwa, hiykwe hno ney.” * 27Seyr hyo ki-wayh sehe makiy-mekow, “Ara, hokwe hno ipey.” Sa enekwei sohiy non kokwe Jisas so ki-wayh sohokwe Jisas so pouh Maria ke huonok nok, hyo a mon hiy-ey nok, hiy-wayr.

Jisas hiy ma lokrue hiy non

(Mat 27:45-56; Mak 15:33-41; Luk 23:44-49)

28Sawk Jisas hiykwe senkin nonkway, hyo mey lowpwarowp mokwe po nuw-meio lowpway. Seyr ok mamey porih mon ma lwak me mon ousne hrahra ey mokwe, hiykwe senkin sehe makiynak-me peykyay, “Hano huei hokwe sonay.” * 29Seyr yowr kamon wain-hu lankre non hokwe ohriar serey mon nakrok. Aw-uwr homkwe laplap-kopi kamon ke lonok nok, wain-hu lankre non serey sakeyn prouk. Sawk laplap-kopi sokukwe now-ho-kueim kamon, hisop-ok ma me sohiy non waynan kraipakrai nok, Jisas so woki ohriar mon arnak-wayon kow, hiy lowswa e. * 30Jisas hiykwe wain-hu sehe lowswa menkin, kiynak-me, “Mey okukwe sopiaw.” Sa hiykwe hyo makwey se kyor-sakworay nok, hyo niohney se isay ha.

Aw-uwr prueyn hiykwe Jisas so nayh-meyk-yowp sok swa-kros kawk

31Enekwei sohokwe sabat-enekwei se lonhan onhan koruay. Seyr sabat-enekwei sohokwe ipey-ar, payhokuaw Pasova-sabat hiy non. Sawk Juda homkwe senkin seme nan, owhi-sopok mokwe now mon-aw liy isay sawan kreik e ko. Homkwe sa Pailat se sehe mesopok, uwr, now mon ma sawan sohom mo oiow me lokimaun sawan kreik nok, owhi-sopok me kama-lieys lonar nok. *32Sa aw-uwr hom ley nok, uwr peyr mon ko so oiow me lokimaun pie nok, hai, prueyn so oiow me ma-lokimaun. Uwr prueysyar sohokwe Jisas se nion ma nonnak-okin pror kawk sawan hiy non. 33Sawk hom Jisas so oiow me ma-lokimaun e le ira liok menkin, homkwe sa senkin lira, Jisas hiykwe sa papo saw-okrue sawan. Wo, hom sa hyo oiow me pase lokimaun e. 34Sa aw-uwr prueyn hiy yeik non Jisas so nayh-meyk-yowp mon ar-swa-kros kawk. Sa nioh o, hu o, hoh non-swa-nonsow kumey. 35(Uwr, Jisas so lokrue enekwei se ma lorok ira hiykwe, yor hiy ma lira somokwe, hme po mesor kumay kow. Hiykwe nonkway, ok hiy hme ma mesor kumay somokwe, ok-arar. Hiykwe ok somokwe seme mesor kumay kow, hom God se-aw nanpanan kiykiy-ay e.) *36Weynpaweyn somokwe seme mon ousne, ok mamey porih mon ma lwak seme nuw-mon hrahra ha e. Ok sokukwe senkin me, “Hyo oiow kamon nopre hokwe liy lokiaun sow ley.” Sng 34:20

37Seyr ok kamon, mamey porih mon ma lwak kokwe senkin me, “Uwrsa homkwe uwr, yeik non ma swapru kawk se kokwe ya lira a.” Sek 12:10

Jisas se ma lopru kwawk hiy non

(Mat 27:57-61; Mak 15:42-47; Luk 23:50-56)

38Enekwei sohiy so meyki hokwe sawk Josep, om Arimatea ko hiy lousne nok, Pailat se mesopok, hiy Jisas so owhi-sopok ke hye isay lway nakey e. (Josep hiykwe Jisas so ki-wayh prueyn ouon-aw ma lwak hiy non, payhokuaw, hiykwe Juda mo hakamay me hok.) Pailat hiy sa ipan sehe lon. Sa Josep hiykwe ley nok, Jisas so owhi-sopok ke kandieys way nok, lway nwakey. 39Sawk uwr Nikodemus, paraw arawh Jisas se ma ley ira nayr pie sohokwe, hiykwe siraw non-e. Nikodemus hiykwe sanda prawk yaprue non se nake. Sanda sohokwe now kreysyar so nioh non monhre. Sanda sohiy so low hei hokwe sankaw, 30 kilogram. *40Sa Josep, Nikodemus leys hohkwe Jisas so owhi-sopok ke lway nok, sanda prawk yaprue non sehe Jisas so owhi-sopok ke low neyr-a-neyr kow nok, laplap yaprue non swakuwmay ho-a-ho. Hohkwe senkin sehe lon, Juda mo sopok me lopru kwawk yor mo meyki ley. 41Yier, Jisas se ma nak-okin pror kawk sawan so ohriar mon kokwe, wueir kamon hokwe serey lwak. Sawk wueir serey mon kokwe, peir-saw kamon iwon hokwe serey nak-wak. Peir-saw sohokwe paraw uwr-sopok kwawk kreik pa. 42Seyr peir-saw sohokwe ohriar lwak, hohkwe Jisas so owhi-sopok kokwe sa serey sehe nwakey way kwawk. Payhokuaw, enekwei sohokwe sabat-enekwei se lonhan onhan koruay ey.

God so Sokior-ok Iwon

© 2013, Wycliffe Bible Translators, Inc. All rights reserved. More Info | Version Index