Search form

Matyu 21

Jisas hiykwe Jerusalem mon kokwe king se hieyn ley

(Mak 11:1-11; Luk 19:28-40; Jon 12:12-19)

1Enekwei sohokwe homkwe ley nonaw lwak, sawk hom yier Jerusalem ohriar mon lwak menkin, homkwe yier Betfage, mnuw-ney Oliv mon ma lwak mon lousne. Sa Jisas hiykwe hyo ki-wayh prueysyar se peyrmawk me-ha. 2Hiy hme kiynak-me, “Hohkwe yier seriey kwa non-ey, serey mon kokwe hohkwe liy lira, donki-pow kamon mays non ma piynay orok ke. Seyr donki sokukwe ney kamon non. Hohkwe hehe non-kahror nok nok, donki kreysyar seme erey hano owh mon lowk nake kow. 3Sawk hehe kokwe ok posokwaw mesopok e, hohkwe senkin kwa makiy-sahre mekow, ‘Hakamay, hiykwe mey non so.’ Uwr sohokwe po kiy-isay ha a.”

4Weyn somokwe seme mon ousne hrahra ha, ok paraw profet hiy ma mesor ke kiy-mon ousne sompay sompay popriy. Ok sokukwe senkin me,

5“Ok okukwe uwrsa yier aiopey hay Saion ko+ me kwa mekow, ‘Homkwe kwa kiy-ira huon, hmo king hiykwe pa hmo owh mon kiy-e ey. Hiykwe liwak marowhway uwr se hieyn donki eir mon liwak ne. Hiykwe donki-eyr samwaw so eir mon liwak ne, hmo owh mon kokwe.’” Sek 9:9

6Jisas so ki-wayh prueysyar hoh seseyn, Jisas hiykiaw ma mekow ha, senkin meio. 7Hohkwe donki-pow sohok o, donki-eyr samwaw sohiy o, hehe Jisas so owh mon hiy-e nok, hoho omeme owh ko seme donki kreysyar so owh eir mon lwawr say kow. Sa Jisas hiykwe donki eir mon sehe lie iwak ha. 8Uwrsa popua hay ma nuw-ondar kowpkawk kowpkawk somokwe hmo omeme owh ko me kama-seyn nok, yerki mon seyp nok kow. Uwrsa har homkwe now-kueim ma non me lokin ma-lor nok, yerki mon seyp nok kow. 9Uwrsa popua hay Jisas so peyr mon ma ley o, har meyki ma le o, somokwe lowpwarowp yu senkin nak-me aun sian nok,

“Hosana, Devit so ney-nona so uru hokwe ayaw-ar mon ka lwak. Uwr, Hakamay so uru non ma le ohokwe, God hiy ka hiy-mon ihey. Hosana, hyo uru hokwe eir-arar mon ka aynuw-wak.” Sng 118:25-26

10Enekwei Jisas hiy Jerusalem mon lyawriy menkin, uwrsa lowpwarowp taun ko somokwe sawk nuw-ira preiryay huon. Homkwe sa senkin mesopok, “Uwr sohokwe posokwaw soney?”

11Uwrsa popua hay Jisas se nion ma le somokwe senkin makiy-sahre mekow, “Uwr ohokwe Jisas, profet Nasaret ko, Galili mo kipay mon ma lwak hiy non.”

Mey, Jisas hiy God so a mon ma lyawriy meio hok non

(Mak 11:15-19; Luk 19:45-48; Jon 2:13-22)

12Sa Jisas hiy God so a pekney-weys mon lyawriy menkin, hiykwe sawk bisnis-uwr, hom bisnis-mey serey ma meio kwawk seme kiynuw-me okin su ha. Hiykwe uwr meinowon me ma non-sawos kow mo sey o, uwr ahney woukmow me ma nak-iwak sir nakway sohom mo sey o, seme nak-okin koum say kow ha. 13Hiykwe bisnis-uwr seme kokwe senkin kiynak-me kow, “God so mamey porih mon kokwe senkin mey, ‘Hano a hokwe hane nian-aw mesopok a.’ Sawk homkwe yokun-uwr mo lwon-kwawk sue a po mon ousne.” Ais 56:7; Jer 7:11

14Sawk uwrsa har nene kopyo non o, owh ma lomposyay o, hom Jisas so owh mon nake nene, God so a pekneyweys mon. Sawk hiy sehe ma-mon popriy kow lowpway. 15Sawk pris karmay o, Juda mo sow ke hiymon-sorasor uwr o, homkwe mey ipey-ar Jisas hiy ma meio ousne seme lira nok, seyr ok, ney hom senkin ma lokre me seme nak-onuayk, “Devit so ney-nona so uru ohokwe ayaw mon ka nuw-wak.” Homkwe sawk uron piap-araw seme nuw-wak.

16Hom sawk Jisas se senkin mesopok, “Hunkwe ok, ney senkin sohom ma lokre me seme po lonuayk o?”

Jisas hiy sa hme senkin makiy-mekow, “Oo, hakwe mo po lonuayk. Sawk homkwe ok, God so mamey mon enkin ma me kokwe lira mesor pa mo?

‘God hiykwe, ney nopre o, ney mu la ey o, hme po me sian, hyo uru se ayaw mon lowk nakie e, hmo woki non.’” Sng 8:2

17Jisas hiykwe uwrsa seme lokriy hain nok, taun Jerusalem se manak-okriy hain nok, yier Betani mon hiy-ey. Arawh enekwei hokwe hiykwe serey hiy-wayr nayr.

Jisas hiy now fik se ma me som hiy non

(Mak 11:12-14,20-24)

18Sawk Jisas hiykwe leisnon-arar loksian nerie nok, taun Jerusalem mon mahiy-ey. Sawk enekwei sohokwe Jisas hiykwe siowp lokrue. 19Sa hiykwe now-fik yerki meykyay mon liarok se ka-ira ne. Hiykwe sawk ohriar ley nok, lira, now-fik hiy i leip nak-iawon ame. Sawk now-fik sohokwe i pase leip nak-iawon e. Sa ma homkwaw lwak me-aw lira. Hiykwe sawk now-fik sehe senkin sehe kiy-me, “Hunkwe i ma-leip nak-iawon wayr-wayr lopa.” Sa peypey pa, now sohokwe sa sehe som iarok.

20Jisas so ki-wayh homkwe hyo mey sokwe lira menkin, homkwe sa seme kowkow-yay ira me, senkin, “Now-fik ehe me, penkin kiy-on se saw-som so?”

21Sawk Jisas hiykwe hyo ki-wayh mo ok mokwe senkin ma-lonuayk me, “Hakwe hme ok-ar kiy-mekow, hunkwe God se nan kiykiy-ay ankin, seyr hunkwe imnok-amnok nan lopa lwak ankin, hunkwe now-fik se, ha ma me som, liy-liy-aw eyn liy mon. Seyr mey sohokwaw korey. Sawk hunkwe mnuw ehe senkin kiy-me ankin, ‘Mnuw ohiy, hunkwe kwa ley, hunkiaw-ayay sour yawp-ar mon maka-hnuarok keyn.’ Mnuw sohokwe senkin liy mon ousne. * 22Seyr hunkwe God se nan kiykiy-ay ankin, hwon payay se mesopok e, God hiykwe hne liy kow.” *

Jisas so krai hokwe posokwaw kow so?

(Mak 11:27-33; Luk 20:1-8)

23Enekwei sohiy non kokwe Jisas hiykwe God so a pekney-weys so a-yier mon lyawriy nok, uwrsa me hiy-mon sorasor. Sawk Jisas hiy hiy-mon sorasor nonaw, pris karmay o, Juda mo uwr hakamay o, hom hyo owh mon le nene nok, hye senkin mesopok, “Mey hwon ma meio somokwe, hunkwe hiy-wayr krai penkin non meio o? Hai, hnekwe mey seme meio ey hokwe, hiy-wayr krai posokwaw kow so?”

24Sa Jisas hiykwe hme kokwe senkin makiy-sahre mesopok, “Ha seyn, hakwe mesopok kamon non, hme mesopok ley. Homkwe hano mesopok sokukwe ok yaprue ke ma-sahre mekow ankin, ha seyn, hme liy mekow, hiy-wayr krai, ha ma meio okukwe poso hiy-wayr krai non meio pak e. 25Homkwe penkin nan o, Jon so hu mon prouk mey kokwe, God so mon po le pak, uwr ki ko mo owh ko ke po le pak?”

Hom Jisas so mesopok sokwe lonuayk menkin, sa homkiaw-ayay-aw senkin lohruw-a nok, me, “Hromkwe penkin kiy-me ey mo? Hrom senkin me ankin, ‘God so mon le’, hiykwe sa senkin kiy-mesopok a, ‘Hai homkwe sa Jon so ok me nanpanan kiykiy-ay pa panoke lwak mo?’ 26Sawk hromkwe senkin me ankin, ‘Jon so mey somokwe unsaney ki ko mo owh ko ke le’, hromkwe uwrsa popua hay me hok. Payhokuaw, uwrsa lowpwarowp homkwe Jon se kokwe senkin po lira nan liyay, hiykwe profet.” *

27Sa homkwe Jisas se kokwe senkin mekow, “Hromkwe nonkway lwak pey.” Jisas hiykwe seyr hme senkin mekow, “Ha seyn, mey, ha ma meio mokwe, hakwe hiy-wayr krai penkin non meio e, hakwe hme liy mekow ley.”

Ney norwayo prueysyar so owhnan-ok

28Sawk Jisas hiykwe Juda mo karmay me senkin makiy-mesopok, “Hai, homkwe owhnan-ok, ha ma kiy-me ey okukwe, penkin nan a? Enekwei kamon hokwe uwr prueyn hiykwe ney norwayo prueys non. Hiykwe ney prueyn so owh mon ley pie nok, hye mesopok, ‘Ney ara, pokon kokwe hunkwe wain-wueir mon kwa ley meio.’

29Ney sohokwe sa orih se senkin mekow, ‘Hakwe liy ley meio ley.’ Sawk ney sohokwe hyo uron se omok ma-nan sakei nok, wain-wueir mon ley meio.

30Orih hiy ney meyki ko so mon ma-ley nok, mesopok, ‘Ney ara, pokon kokwe hunkwe wain-wueir mon kwa ley meio.’ Ney sohokwe sawk senkin mekow, ‘Oo, ha po ley meio a.’ Hiy sawk pase ley meio e.”

31Owhnan-ok sokwe mesor lowpway menkin, Jisas hiy sa senkin mesopok, “Hai, ney prueysyar sohokwe hoho orih so uron so meyki mon posokwaw ley so?”

Hom me, “Ney peyr-mon ma mesopok pie hiykiaw.”

Jisas hiykwe hme senkin mekow, “Hakwe hme ok-ar kiy-mekow, uwr takis meinowon lonok uwr o, yokun-sa o, homkwe God so Wayr-hre-yier mon kokwe ya lyawriy a, sawk homkiaw kokwe liy lyawriy ley. 32Payhokuaw, Jon hu mon prouk uwr hiy hmo mon ma le hokwe, hiykwe yerki luw-luw-aw-ar se me-sorasor kumay kow ne. Sawk homkwe God so ok, hiy ma mesor seme nan kiykiy-ay pa. Wo, sawk takis lonok uwr o, yokun-sa o, homkwaw nan kiykiy-ay. Ama, mo hom uwrsa sohom mo uron kankoum yor me lira hi, homkiaw kokwe uron kankoum sow nan kiykiy-ay pa.” *

Uwr, wain-wueir se ma lonkeke meio mo owhnan-ok

(Mak 12:1-12; Luk 20:9-19)

33Jisas hiykwe Juda mo karmay me senkin manak-mesor kow, “Homkwe owhnan-ok kamon okwe kwa manak-onuayk. Paraw kokwe uwr prueyn hiykwe wain-wueir meio nok, hir nak-yay awndiy awndiy kwawk nok, ki-saw se nak-opru, wain-i me lour ompos kreik kow ey se. Hiy senkin lon nok, i-a, uwr hom nak-iarok ira ey se nak-meio. Wo, wain-wueir sohokwe hiykwe sa bisnis-uwr har mo iha mon kow hain. Sawk hiykiaw kokwe yier se lokriy hain nok, yier meiaw-ar ko mon nuw-ey wayr. * 34Enekwei wain-ou me loun hriaw ey hiy lousne menkin, hiykwe sawk hyo mey-uwr har me me-ha, bisnis-uwr wain-wueir sehe ma meio mo owh mon, hom hye nian wain-ou har loun hriaw kow ha e, hyo mey-uwr mo iha mon.

35Sawk bisnis-uwr wain-wueir sehe ma meio homkwe mey-uwr seme nekie sakreik liyay prosue nok, prueyn se lomniy noho noho yay ha. Sei, prueyn se kokwe nuw-okin kwor okrue yay, prueyn se kokwe mein non swama-pror kawk. 36Wo, sohiy so meyki mon hokwe wain-wueir se iaup uwr hiykwe mey-uwr kraiar me ma-me-ha. Mey-uwr sohom mo meir mokwe mey-uwr paraw ma me-ha mo eir mon lwak. Bisnis-uwr wain-wueir sehe ma meio homkwe mey-uwr seme kokwe, weynpaweyn piap-araw liy-liy-aw senkin ma-lon. 37Wo, sohiy so meyki mon hokwe hiykwe hyo ney arian se hmo owh mon ma-me-ha. Hiykwe senkin me, ‘Homkwe hano ney se mon komnow komnow ey.’

38Sawk bisnis-uwr somokwe hyo ney arian-ar se lira huon menkin, homkwe sawk homkiaw-ayay senkin lohruw-a, ‘Ohokwe wueir-yiaup-uwr so ney arian. Oue, hromkwe hye lokin kwor e, sa hyo omeme mokwe hromo ka lwak.’ * 39Bisnis-uwr somokwe sa hye sehe nekie nok, wain-wueir so meykyay mon lowk nakey nok, hye lokin kwor okrue yay.” *

40Jisas hiy makiy-mesopok, “Hai, homkwe penkin nanpanan o? Enekwei wain-wueir se ma iaup uwr hiykiaw le ankin, hiykwe bisnis-uwr seme penkin lon ey mo?”

41Homkwe sawk hyo mesopok sokukwe senkin ma-sahre mekow, “Hiykwe bisnis-uwr piap-araw senkin somokwe lo kekie lowpway ey. Sawk wain-wueir sohokwe bisnis-uwr har yaprue me manak-me kow meio. Bisnis-uwr senkin somokwe homkwe wain-i leip enekwei hokwe, homkwe hye nian kokwe liy ma-loun hriaw kow.”

42Jisas hiykwe seyr hme senkin ma-mesopok,

“Hmey, homkwe God so mamey porih ko ok, enkin ma me ke, pankaw lira mesor?

‘Mein, a meio uwr hom ma me-puar hokwe, ipey-ar po lousne, a se hiymon kraipakrai ey. Hakamay hiykwe senkin meio, sa sohokwe hromo nene mon kokwe ihey-ar nuw-wak.’ Sng 118:22-23

43Hakwe hme kokwe senkin sehe kiy-me, God so Wayr-hre-yier hmo mon ma lwak se maka-hya ey, sawk unsaney God so Wayr-hre-yier so ayay me ma mon eip sawan kreik me ma-kow ey. 44Sawk mein-pow sohiy so eir mon posokwaw makuayk e, hye kokwe kusamaun say nopre nopre ey. Sa mein-pow sohokwe unsaney prueyn so eir mon maka-kuayk ankin, hye kokwe maka-oun soksok sowhuan sowhuan kekie ey.”+

45Juda mo pris karmay o, Farisi o, hom lowpwarowp Jisas so owhnan-ok seme lonuayk menkin, homkwe sa seme kiy-nonkway, owhnan-ok somokwe hiykwe hme nian lohruw-a memeir. 46Sa homkwe hye nekie yerki se lira pawk lokruok, sawk homkwe uwrsa popua hay ma nuw-nwakon nwakon seme nak-hok. Payhokuaw, uwrsa homkwe Jisas se kokwe senkin lira nan, hiykwe profet.

God so Sokior-ok Iwon

© 2013, Wycliffe Bible Translators, Inc. All rights reserved. More Info | Version Index