Search form

Mesair Hrahra Ha Ok 3

Mamey sios Sardis ko me ma mey kow hok non

1“Kwa mey kow ha, ensel sios Sardis ko se.

Ok omokwe Uwr, God so Niohney iha sirom mu nareysyar non o, seyr napuar iha sirom mu nareysyar non o, hyo ok. Hakwe nonkway, uwrsa homkwe hno yor mokwe su ma lwayr se hieyn lira me, sawk hakwe mey, hwon ma meio somokwe, papo nonkway, hunkwe papo lokrue. * 2Saw-oksian nok. Yor yaprue har ma kor-wak hain sohom o, seyr ma lokrue pror kreik e ma mon sohom o, seme kwa manak-mon kraipakrai. Payhokuaw, hakwe senkin lira, yor hwon ma mon somokwe, peyr hano God so nene mon kokwe mnow-mnow-aw lwak pey. 3Kwa ma-nanpanan, paraw hne ma hiy-mon sorasor seme, seyr ok paraw hwon ma lonuayk seme. Hmo meyki ley nok, hno yor piap-araw me kankoum sow hain. Hunkwe loksian lopa lwak ankin, hakwe yokun-uwr se hieyn le, seyr hunkwe enekwei ha le ey hokwe nonkway lopa. *

4Sawk hmo uwr har Sardis ko homkwe, hmo klos mokwe mon seipasei pa. God hiykwe hme kokwe hom orki lopa ma lwak me yaprue lira, sa homkwe hane nion klos weyspey me-aw seme lie nak-anio sayok ey. *5Unsaney aw-owk yaprue lowk ankin, hiykwe klos weyspey senkin me ya lie a. Seyr hakwe hmo uru sa-u mamey su lwayr ey ko mokwe mon-say lopa. Hano Aio so inour mon o, seyr hyo ensel mo inour mon o, hakwe senkin me-kumay kow ey, homkwe hano. *6Uwr nweyk non hiykwe ok, Niohney hiy sios me ma mekow seme kwa lonuayk.”

Mamey sios Filadelfia ko me ma mey kow hok non

7“Kwa mey kow ha, ensel sios Filadelfia ko se.

Ok omokwe Uwr pekneyweys-ar o, seyr ok-arar ma lwak o, hyo ok. Hiykwe Devit so ki se nakruok. Yerki hiy kampi ankin, uwr prueyn liy ma-piaray ley, seyr hiy piaray ankin, uwr prueyn liy ma-kampi ley. * 8Hakwe nonkway, weynpaweyn hwon ma mon somokwe. Seyr hakwe nonkway, hunkwe krai-ney non. Seyr hunkwe hano hiy-mon sorasor yor ko meyki po ley, seyr hunkwe hano uru se mey-a-mey me pey. Hakwe seyr yerki kokwe hno inour mon po kiy-kampi yay kow, sawk uwr prueyn liy ma-piar-ay ley. * 9Kwa lonuayk, okrei-uwrsa Satan so, hom homkiaw-ayay Juda-uwr-ok ma me-loior somokwe, hakwe hno sune mon me-sasay kampueys won-sowkway ey. Uwr somokwe Juda korey, sa okrei-uwr somokwe liy nonkway, hakwe hne uron-pi ko-ar nuw-wak. *

10Hano me-kupaku-ok, hwon ki erey mon lorok kraiay ey hokwe, hunkwe meyki po ley. Low senkin senkin uwrsa lowpwarowp me mon ir ey, ki erey lousne ankin, hakwe hnekwe liy-liy-aw sehe ma-nakruok kraiay ey. *

11Hakwe peypey le ey korey. Hunkwe payay se nakruok e, hunkwe kwa nakruok kraiay. Sawk hno makwey-kokway ke uwr prueyn hiy kahya way lak. 12Unsaney aw-owk yaprue lowk ankin, hakwe hyekwe a-nop-i aiopey hay se hieyn swaprein kawk harok ey, hano God so a pekneyweys mon kokwe. Hiykwe God so a sehe liy lokriy hain ley. Hakwe nop-i sohiy so owh mon kokwe, hano God so uru o, hano God so taun so uru o, seme mey iarok ey. Taun sohokwe Jerusalem iwon, hano God so owh ko se ma lay-nak-aye ey hiy non. Hyo owh mon kokwe seyr hakwe hano uru iwon se nak-mey kow ey. *13Uwr nweyk non hiykwe Niohney so ok, sios me ma mekow seme kwa lonuayk.”

Mamey sios Laodisia ko me ma mey kow hok non

14“Kwa mey kow ha, ensel sios Laodisia ko se.

Ok omokwe Uwr, Ok-ar ma me o, seyr God so ok-ar-ok ke mesor-wayr-uwr o, hyo ok. Hiykwe omeme lowpwarowp God hiy ma mon-hre mo meyk-arar hiy non. 15Mey, hwon ma meio mokwe, hakwe papo nonkway. Hunkwe weyp lwak pey, seyr hunkwe ya-ar se hieyn loum pey. Mo hwon weyp-aw lwak hi, mo hwon ya se hieyn ma loum hi, sohokwe piap-araw-ar korey. * 16Sawk hunkwe weyp lwak pey, seyr ya ke hieyn loum pey, sawk hunkwe sowpwareney kor-oum hniyhniy. Hwon senkin ma lwak se hokuaw kokwe, hnekwe hakwe hano woki ko se lopron-say ha ey. 17Hunkwe senkin me, ‘Hakwe omeme poya-poya non, seyr hakwe eir mon lwak. Hakwe payay se ma-lohna sow ley.’ Sawk hunkwe kiy-ira nonkway pey. Hunkwe piap-araw-araw, nuw-ey kwopakwo, omeme lopa, apaw-hro, nene kopyo. * 18Hakwe hne senkin kiyhiy-me now-a-now. Hunkwe hano gol, ya mon ma leynow mnow-a-mnow me kwa nakway, suw hunkwe omeme ihey-ar kraiar non liy lwak. Seyr klos weyspey me kwa nakway, hno owh, apaw ma nak-anio owh-mar owh-mar yay sehe nak-ie hiyhiy ey hokwe. Seyr wel nene ko se nakway nok, nene mon neyr, suw hunkwe liy lira. *

19Uwrsa, ha uron-pi ko-ar ma lwak somokwe, hakwe lonkuwrowp anok anok. Hnekwe hakwe mo sehe me, hunkwe hno weynpaweyn piap-araw me ma kankoum sow hain sohokwe, okar okar-aw kwa nuw-mon kraiay. *20Kwa lonuayk, hakwe yerki-awei mon yerki-pokre ke liarok okin koko. Uwr prueyn hano wouk-ok ke lonuayk kampi ankin, hakwe hyo a mon lyawriy nok, hye nion ayay non-a ok. Hiy seyn, hane nion non-a. *21Uwr, aw-owk yaprue lowk ankin, hakwe hyekwe hane nion siraw-aw hano sia-king mon isay iwak ey, paraw ha aw-owk yaprue ma lowk, seyr ha Aio se nion hyo sia-king mon ma liwak senkin. 22Uwr nweyk non hiykwe, ok, Niohney hiy sios me ma mekow seme kwa lonuayk.”

God so Sokior-ok Iwon

© 2013, Wycliffe Bible Translators, Inc. All rights reserved. More Info | Version Index