Search form

Mesair Hrahra Ha Ok 4

Sia-king nonkumey ko hok non

1Sohiy so meyki hokwe, hakwe sawk senkin makiy-ira, yerki-pokre nonkumey ko kokwe papo kampi iarok. Seyr wouk-ok seik-saw-hu se hieyn ma lwoun, ha peyr-mon ma lonuayk, hiy hane makiy-me, “Erey lie e, hakwe hne mesair kow ley, ompay-ompay omok lousne ey me.” * 2Peypey lopa, hanekwe sawk Niohney hiy kiynuw-wanohyay. Nonkumey mon kokwe, hakwe sawk sia-king kamon, hano inour mon lwak ke kiynuw-ira. Uwr prueyn hiykwe sia-king serey liwak. * 3Uwr sohokwe mein jaspa o, konilian o, hme hieyn nuw-ok-sanweyr-anweyr yar. Unameioku, mein emeral ke hieyn hokwe sia-king ke nuw-awndiy kawk. * 4Sia-king aiopey kokwe, sia-king sune seys, iha seys, iha-iha-aw hom nakrok-kay awndiy kawk. Seyr sia-king somokwe sios makwey-uwr sune seys, iha seys, iha-iha-aw hom liwak sir. Homkwe omeme weyspey me-aw lie. Seyr king mo makwey-kokway gol non ma meio mokwe, hmo makwey mon lwak liyay. * 5Sia-king ko kokwe sawk, eiwa hom lok-sanweyr-anweyr, nompow aiopey hay hom lwoun kawk owk-mniy-ma-mniy merie merie. Sia-king ko inour mon kokwe lam iha sirom mu nareys-ar non hom nuw-yar nekie nekie. Lam somokwe God so Niohney iha sirom mu nareys-ar non hom non. * 6Sia-king ko inour mon kokwe hu kamon, sour-yawp-ar, kawk-ir ke hieyn ma lira sakeyn sakeyn ha hiy lwak. Hu sohokwe oro-araw.

Seyr sia-king ko por ererey mokwe ay iha-iha-aw su ma lwayr homkwe serey nakrok awndiy kawk. Ay iha-iha-aw su ma lwayr sohom inour mon o, hmo meyki mon o, nene homkwaw nuw-kreyr hriykow hriykow. * 7Ay peyr ko hokwe laion se hieyn lira. Ay, laion so meyki ko hokwe, bulmakau-eyr se hieyn lira. Ay, bulmakau-eyr so meyki ko hokwe, iwar mo ine-maku se hieyn lira. Ay meyki-ar ko hokwe, wayp ma sian se hieyn lira. 8Ay iha-iha-aw su ma lwayr sohom mo kamon kamon-aw mo someykyow mokwe, sankaw lwak, iha sirom pruw non. Seyr hmo owh mokwe nene homkwaw nuw-kreyr hriykow hriykow, hmo someykyow ouon seyn, nene homkwaw nuw-kreyr liyay. Eypok arawh, eypok arawh, homkwe yayh lowk korpe korpe pey. Homkwe senkinaw-aw nuw-owk wayr-wayr:

“Pekney-weys, pekney-weys, pekney-weys hokwe, God Hakamay, Krai Lowpwarowp non hiykwaw. Hiykwe peyr-ar ko, seyr pokon ko, seyr ya le a.” *

9Ay ihaiha-aw su ma lwayr somokwe, uwr, sia-king mon ma liwak, seyr ma lwayr peyow peyow se senkin me-kuw, hiykwe seirpey-ar, seyr ayaw-ar nuw-wak, seyr me-ihey-ok mokwe hiykwaw ka lonok. Hom senkin lon mokwe, 10sawk sios makwey-uwr, sune seys, iha seys, ihaiha-aw homkwe, uwr sia-king mon ma liwak, seyr su ma lwayr peyow peyow so inour mon pamuow kampueys won-sowkway me-ihey. Homkwe hmo makwey-kokway me sia-king ko inour mon kama-seyn yay sowkriy nok, senkin nak-me-ihey ok, *

11“Hunkwe hromo Hakamay, seyr hromo God. Panpaniowni o, uru ayaw mon ma lwak o, seyr krai o, hunkiaw-aw kwa nak-wayr e. Payhokuaw, omeme lowpwarowp mokwe hwon mon-hre. Seyr omeme omokwe hno uron arian non mon-hre nok, inaw mesay wayr.”

God so Sokior-ok Iwon

© 2013, Wycliffe Bible Translators, Inc. All rights reserved. More Info | Version Index