Search form

1 Naiꞌ Timotius 1:1-2

Tabe ma haan buseet

1-2Timotius, atoin reko!

Tabe ma haan buseet naꞌko au, naiꞌ Paulus kau. Uisneno npiir kau ꞌjair haef ꞌeu Yesus Kristus. Ma hit tharap ma tafneek teu Usif Yesus, reꞌ anfee kit aꞌhonis piut-piut tok Ne, natuin Uisneno nsoi nafetin anrair kit naꞌko hit sanat ma penu sin.

Tius! Ho on reꞌ au aanh aa kuuk, natuin au ururuꞌ ꞌrair ranan he ho mpirsai meu Kristus. Au ꞌonen ꞌeu hit Amaꞌ Uisneno, ma hit Usiꞌ Yesus Kristus, he Sin nakriraꞌ Sin neek rekon ma rais kasian neu ko, maut he ho mmoni mbi mamut, rameꞌ es nok es, ma taininaꞌ.

Ampaant om muꞌko tuaf ein reꞌ nanoniꞌ nsanan

3Neon goes ii, hit nua kit tabua tbi kota Efesus. Oras au he ꞌnao ꞌeu propinsi Makedonia, au ꞌak ko he mubaar ambi kota Efesus. Oras naan, anmuiꞌ tuaf reꞌ ntakaꞌnanab Usif Yesus In too sraniꞌ, anpaek noniꞌ reꞌ ansaan ma nbeo. Onaim au ꞌtoit ko, he mnao mukainaꞌ sin, he sin kais nakonob sin noinꞌ ein naan.