Search form

Haef ein sin Retaꞌ 18:1-3

Naiꞌ Paulus anmakhiin ein nok ain Priskila ma aam Akila nbin kota Korintus

1-3Oras naan, uis koꞌu keser Roma, kaan ee naiꞌ Klaudius. In natoꞌon atoin Yahudis sin, rarit in nriuꞌ napoitan sin naꞌko kota Roma nbi propinsi Itali. Onaim sin nsisaeꞌn ok neun mee-mee. Anmuiꞌ naan atoin Yahudis tuaf es, kaan ee naiꞌ Akila, ma nok in fee je, bi Priskila. Sin nua sin naen anpoin naꞌkon propinsi Itali, nnaon neu kota es, kaan ee, Korintus. Naiꞌ Akila reꞌ ia, naꞌko propinsi Pontus. In meupn ii, es reꞌ nmoeꞌ bareꞌ naꞌko pasu.

Oras naan, naiꞌ Paulus annao nasaitan kota Atena, ma in nnao neu kota Korintus amsaꞌ. Anbi naan, naiꞌ Paulus anmakhiin ein nok naiꞌ Akila ma bi Priskila, natuin in amoeꞌ bare naꞌko pasu msaꞌ. Sin natua nabuan, ma nmeup nabuan.

4Karu ntea atoin Yahudis sin neno snasat, naiꞌ Paulus antaam neu sin uim onen. Anbi naan, in nsobaꞌ he nfuriꞌ atoin Yahudis ma atoniꞌ ꞌtetaꞌ sin, he sin npirsain neu Usif Yesus.