Search form

Kolose 1

Tabe ma haan buseet

1Tabe ma haan buseet naꞌko au, naiꞌ Paulus kau. Uisneno kuun es reꞌ anpiir ma nbetis naan kau he ꞌjair Yesus Kristus In haef. Naiꞌ Timotius amsaꞌ es ia, ma in ansonuꞌ haan tabes ma haan buseet amsaꞌ neu ki arki.

2Au ꞌtui surat reꞌ ia, ma ꞌsoun ee ꞌeit ꞌeu ki arki, es reꞌ Uisneno Iin na abitan kota Kolose, reꞌ anmoeꞌ natuin piut Yesus Kristus In raan aꞌhonis.

Hai mtoit he hit Amaꞌ Uisneno nakriraꞌ In nekan arekot neu ki arki, he hi bisa mmoni mbi mamut, rameꞌ es nok es, ma taininaꞌ.

Naiꞌ Paulus anꞌonen ma anteek apirsait ein abitan Kolose

3Hai mꞌonen es mee te, hai mteek ki, hai mtoit makasi meu Uisneno, es reꞌ hit Usiꞌ Yesus Kristus In Amaf. 4Hai mneen amrair areꞌ rasi mfaun anmatoom nok hi rais pirsait meu Yesus Kristus, ma hi nekam arekot reꞌ ammaneek meu areꞌ apirsait ein ok-okeꞌ. 5Hi mmoeꞌ on naan, natuin hi mihiin areꞌ kanan rais reko, reꞌ matunuꞌ nrair neu ki et sonaf neno tunan. Rasin reꞌ ia, hi mneen miit sin naꞌkon uab ein reꞌ batuur, es reꞌ Uisneno In Rais Reko naan, 6reꞌ tuaf neit natoon ki je naꞌko oras ahunut naan. Rais Reko naan nasiin On, nabeon On ntea bare-bare nbi pah-pinan ia, ma napein afan arekot, natuin in naꞌbaniꞌ tuaf ein sin aꞌmoink ein anjarin reko. Hi ꞌmoinm ein amsaꞌ naꞌbain ein njarin reko on reꞌ naan, anmurai naꞌko neon ahunut oras hi mneen ma mtoup Rais Reko naan, ma mihiin batuur-batuur Uisneno In nekan arekot.

7Hi minoniꞌ mrair rasin reꞌ ia naꞌko hit aok-bian naiꞌ Epafras. Naiꞌ Epafras naan es reꞌ hit partei anbi mepu meseꞌ reꞌ hit tneek. In nmakoe he nanaob Kristus In mepu anbi hi sonam ma hi tnanam.+ 8In natoon kai mbi bare ia anmatoom hi maneekm ein, reꞌ Uisneno In Asmaan ee anfee nrair je neu ki.

9Natuin rasi naan, anmurai naꞌko oras hai mneen rasi anmatoon nok ki, hai mꞌonen piut-piut ma amteek ki. Hai mtoit Uisneno he hi bisa mihiin In roimn ee batuur-batuur, ma hi mihiin rasi mfaun antein, natuin saaꞌ reꞌ Uisneno In Asmaan ee nanoniꞌ ki sin. 10Nok ranan naan, hi bisa mmoin mimnoon goah, ma meik Uisneno In kanan arekot. Ma hi bisa mharineb Uisneno In nekan anbi areꞌ kanan rasi msaꞌ. Karu hi mikriraꞌ hi nekam arekot sin meu tuaf bian, Uisneno of anfee ki upan arekot. Nok ranan naan, hi bisa mihiin mirek-rekoꞌ Uisneno piut-piut.

11-13Hai mꞌonen amtoti msaꞌ he Uisneno nfee In kuasa maꞌtaniꞌ naan, he hi bisa misaah areꞌ kanan rasi nok neek sabaar. Hai mtoit he hi neekm ein nahenun nok rais marine, he hi mtoit makasi piut-piut meu Amaꞌ Uisneno. Fin In nfei ranan he hi bisa mtoup pusaak naꞌko sonaf neno tunan. Pusaak naan, In nfee je neu areꞌ kanan apirsait neu Yesus Kristus. Natuin In nsoi nafetin kit naꞌko kuasa meisꞌokan, rarit nataam kit tjair Yesus Kristus Iin na, he tatua tbi meuꞌ-sineꞌ. In nait naꞌratan Yesus Kristus amsaꞌ, he njair hit Usif. Naiꞌ Yesus naan, Uisneno In Aan nekaꞌ. 14Uisneno annonaꞌ In Anah naan, he nsoi nafetin naan kit, ma nnoes nain hit sanat ma penu sin.+

Kristus naan naꞌraat anneis-neis

15Kristus naan, humaꞌ meseꞌ nok Uisneno,

reꞌ mansian ii ka bisa niit Ee fa.

In nbi nain naan nahuun naꞌko areꞌ kanan saaꞌ,

ma In njari ꞌNakaf ma Usif neu areꞌ kanan saaꞌ reꞌ Uisneno anmoeꞌ sin.

16Fin Uisneno anpaek Je,

he nmoeꞌ naan neon goe ma pah-pinan ia in afan ma in nesan sin ok-okeꞌ.

In nmoeꞌ areꞌ kanan saaꞌ-saaꞌ reꞌ mansian ii bisa niit sin,

ma saaꞌ-saaꞌ reꞌ mansian ii ka bisa niit sin fa.

Tait iꞌtopeꞌ on reꞌ: anaaꞌ aprenat sin, anaaꞌ kuasa sin,

uisf ein, ma aꞌnaakt ein.

Areꞌ saaꞌ-saaꞌ reꞌ Uisneno he nmoeꞌ sin naan,

In nmoeꞌ sin neu Yesus Kristus,

ma Yesus amsaꞌ es reꞌ anmeup sin ok-okeꞌ.

17Nahuun naꞌko areꞌ saaꞌ-saaꞌ ii he njari te,

In nbi nain naa.

Areꞌ saaꞌ-saaꞌ reꞌ anbi naan, mafutuꞌ nok Ne,

ma In es reꞌ anꞌator sin.

18In es reꞌ anjari ꞌNakaf neu apirsait ein ok-okeꞌ,

ma apirsait ein anjarin on reꞌ In aon.

Fin In es reꞌ nanaob sin ok-okeꞌ.

Naꞌko areꞌ kanan amates reꞌ anmoni nfanin,

In es reꞌ pentiing anneis-neisi,

maut he In es reꞌ naꞌraat anneis-neis naꞌko areꞌ kanan saaꞌ-saaꞌ ii ok-okeꞌ.+

19Areꞌ kanan saaꞌ-saaꞌ reꞌ anbi Uisneno In tuan,

anmuꞌi msaꞌ et Kristus In tuan,

ma naan amsaꞌ anharineb Uisneno.

20Uisneno npaek Yesus Kristus,

he narameꞌ areꞌ kanan saaꞌ-saaꞌ reꞌ In nmoꞌe nrair sin naan nok Ne.

In nnonaꞌ ma nfee In Anah,

he njair fuaꞌ-turuꞌ reꞌ natꞌopab In naaꞌ,

ma nmate nbi hau nehe,

he areꞌ kanan saaꞌ-saaꞌ anbi neon goe tnanan,

ma areꞌ kanan saaꞌ-saaꞌ anbi pah-pinan,

bisa nmarameꞌ nfain nok Uisneno.+

21Unuꞌ te, hi kiim ammoni mbi moneꞌ mainuan, miꞌroo miꞌko Uisneno. Hi mmusun Uisneno, natuin hi neekm ein nameisꞌokan, ma hi mmoeꞌ maufinu reꞌ anraabn Ee piut-piut. 22Maski on naan amsaꞌ, mes oras ia In es reꞌ anfei ranan he hit bisa tmarameꞌ tok Ne. Natuin In es reꞌ ansonuꞌ In Anah he njair mansian. Ma In es reꞌ anfee In Anah naan, he njair fuaꞌ-turuꞌ, nok ranan anmaet anbi hau nehe, he hit bisa tmarameꞌ tfain tok Ne. Yesus Kristus anmoeꞌ on naan, he In bisa neik kit atfain, he thake tbi Uisneno In human ma In matan, he tjair tuaf-tuaf akninuꞌ, neek amneot, ma ka tmuiꞌ fa sanat attein. 23Onaim hi ro he maran ma mtahan piut ambi hi pirsait naan. Amnaaꞌ miher-heran he kais naꞌoniꞌ! Kais amtet-koit miꞌko Rais Reko naan, reꞌ hi mneen ma mtoupu mrair Je oras ahunut naan. Fin hi bisa miꞌpeis om meu Rais Reko naan. Tuaf-tuaf annaon ma natoon Rais Reko naan anbi bare mee-mee et pah-pinan ia. Ma Uisneno anhaefaꞌ kau, naiꞌ Paulus, he au aꞌnao utoon ma usineꞌ Rais Reko naan amsaꞌ.

Naiꞌ Paulus anmeup he ntuthae Uisneno Iin na

24Oras Kristus anmoni nbi pah-pinan ia, In napein haꞌmuꞌit. Ma au usaah haꞌmuꞌit humaꞌ-humaꞌ oras ia msaꞌ. Maski on naan amsaꞌ, mes au neek ii anmariin piut. Karu nmuiꞌ tuaf reꞌ ro he napein haꞌmuꞌit ate, maut he au ꞌok usaah haꞌmuꞌit naan, on reꞌ Kristus nasaah haꞌmuꞌit neu Iin na. Natuin Iin na, nahuum on reꞌ In aon. 25Uisneno anfee nrair kau mepu he au ꞌtuthae Iin na. Es naan ate, au unoniꞌ In Kabin ma Prenat sin neu ki tar namnuut. 26-27Anbi oras ahunut ate, mansian ii nneen Uisneno In Kabin ma Prenat. Mes sin ka nahiin batuur-batuur fa feꞌ Kabin ma Prenat naan In sarit. Uisneno In Kabin ma Prenat In sairt ii maꞌnifaꞌ, onaim sin ka nahiin Je fa maat-maat. Mes oras ia, Uisneno nafeek anrair he nfei maꞌnifaꞌ naan neu Iin na. Ma In sarit naan, anjair beno reꞌ anpiin ma nakraah neu areꞌ kanan uuf ma pah anbi pah-pinan ia. Beno naan, es reꞌ:

Kristus anmoin et hi neekm ein!

Naan es reꞌ anmoeꞌ ki he hi mpirsai piut am mak,

In of anmoeꞌ areꞌ kanan rasi reꞌ reko nneis-neisi neu ki arki anbi sonaf neno tunan.

Rasi reꞌ ia, reꞌ mansian kit arkit atpa-pao naꞌko un-unuꞌ.

28Onaim hai mitoon meu areꞌ kanan mansian anmatoom nok Kristus. Hai minoniꞌ sin arsin, ma mimnaub sin imsaꞌ, ampaek areꞌ tenab ma ronef reꞌ Uisneno anfee sin neu kai. Hai mmoeꞌ on naan, he mifaof haꞌtain nekaf meu areꞌ tuaf reꞌ natuin Kristus, he sin bisa nhaken nbin Uisneno In human ma In matan. Ma anbi oras naan sin ka namaeb ok fa, natuin sin nmonin nok neek amneot ma amnonot. 29Etun au ꞌpaasn ok ma ꞌmeup maꞌtaniꞌ ꞌeu ki. Au bisa ꞌaran ma ꞌtahan, ꞌmeup maꞌtaniꞌ on naan, natuin Kristus In kuasan es reꞌ nhaꞌtain kau. Ma In kuasan naan, maꞌtain reꞌuf!