Search form

Retaꞌ Ahun-hunut 7

Noe sakoꞌ

1Rarit UISNENO naꞌuab neu naiꞌ Noh am nak, “Au ꞌkisu ꞌbi mee-mee, mes arahaa ho mmees-mees jah es neek amneꞌo. Onaim ho mok ho fee-anah sin mtaam nai meu bnao naan. 2-3Naꞌko areꞌ kanan muꞌit reꞌ sin siisk ein nabeiꞌ he hi meuk sin, ma reꞌ nabeiꞌ he hi mifuat sin meu Kau, ho mutaam pasan hit-hiut meu bnao naan. Naꞌko areꞌ kanan koro ho mutaam pasan hit-hitu msaꞌ. Mes muꞌit bian anteniꞌ ho suma mutaam pasan mes-meesꞌ aah. Nok ranan naan, muiꞌt ein naan, anjarin on reꞌ fini neu sin suufk ein, he sin nmonin amsaꞌ.

4Mumnau murek-rekoꞌ! Aar neno hitu te, Au of usanut uran reꞌ ka nasnaas niit fa, tar antea neno boꞌ haa ma fai boꞌ haa. Au ꞌpaek ranan naan, he uꞌmaet ꞌain areꞌ amoint ein nbin auf metoꞌ, reꞌ Au ꞌmoꞌe ꞌrair sin.”

5Rarit naiꞌ Noh nmoeꞌ natuin on reꞌ UISNENO In aprenat naan okeꞌ. 6Oras noe sakoꞌ naan nsae te, naiꞌ Noh nmoin naan toon natun nee jen (600). 7Rarit naiꞌ Noh nok in fee, ma in aanh ein, ma in aan naenf ein, ntaman neun bnao naan, he sin nsoi naan ok. 8-9Naiꞌ Noh natuin UISNENO In aprenat naan, onaim in nataam areꞌ kanan koro ma muꞌit, es-es ate nok nain in bian, naꞌko muꞌit reꞌ he mansian bole neuk sin siisk ein, ma naꞌko muꞌit reꞌ ka bole fa he neuk sin siisk ein. 10Neno hiut namsopu te, noe sakoꞌ naan neem ma nmurai nmemun pah-piin ii no mes-meseꞌ.

11Oras naiꞌ Noh anmoin naan toon natun nee (600) mfunan nua mneno boꞌes am hiut on naan ate, noe saok gui nmurai ntaam. Oras naan on reꞌ neon goe natfeꞌi, es naꞌ oe ji natꞌoop aah. Ma areꞌ oe maat ein anpeꞌen rafuꞌ-rafuꞌ ma npuran napoitn ein oe. 12Onaim uran naan ansaun ka nasnaas niit fa, fai-manas, tar antea neno boꞌ haa.

13Mes neno naan, naiꞌ Noh, in fee, in aanh ein teun sin, esan reꞌ: naiꞌ Sem, naiꞌ Yafet, ma naiꞌ Ham, ma in aan naenf ein ntaman okeꞌ neun abnao naan. 14Sin ntaam nabuan nok muiꞌ aem ein, muiꞌ fui ngguin, muiꞌ anoonk ein, koron, ma muꞌit bian reꞌ maniniꞌ msaꞌ. 15-16Pasan meseꞌ-meseꞌ naꞌko areꞌ amoint ein, ntaam nabuan nok naiꞌ Noh nbin abnao, natai nok saaꞌ reꞌ Uisneno napreent ee.

Oras sin ntaman nrarin okeꞌ te, UISNENO neikn On naꞌeek ma naꞌretuꞌ bnao naan in enon.

17-19Uur koꞌu naan nsaun piut, tar antea neno boꞌ haa. Onaim noe sakoꞌ nsae piut tar antea bnao naan natboe. Oe ji nsae piut tar nmemun naneuk ꞌtoꞌe mnaun ein okeꞌ. 20Oe naan nsae piut, tar in aꞌraatn ii meter hiut nneis naꞌko ꞌtoꞌe mnaun reꞌuf.

21-23Onaim areꞌ kanan amoint ein nbin auf metoꞌ nmaet sapuꞌ. Amaets ein esan reꞌ: mansian, muiꞌ aem, muiꞌ fui, anonok, ma koro. Suma naiꞌ Noh ma sin abitan abnao goe nanan sin mesen nmonin. 24Oe naan ka nsaun niit fa tar antea neno nautn es boꞌ niim (150).