Search form

Atoin Ibranis 7:9-10

9-10Natuin kaꞌo Abraham anbati nfeen naiꞌ Melkisedek bait boꞌ naꞌko baerꞌ ein naan, atoniꞌ bisa natenab ansobaꞌ nak, in nasaah amsaꞌ in sufan-kauꞌn ein reꞌ ka nahonis sin fa feꞌ. Nok ranan naan, hit bisa tak, in nbaen anrair in uup-kaꞌof naiꞌ Lewi in bait boꞌ.

Hit tperluu aꞌnaak rais pirsait huum feꞌu, natuin aꞌnaak rais pirsait amnaaꞌ ka bisa nsaok nain fa sanat

11Oras naiꞌ Lewi in sufan-kauꞌn ein anjarin aꞌnaak rais pirsait, Uisneno anpiir naan kaꞌo Musa in tataf naiꞌ Harun he njair aꞌnaak rais pirsait sin aꞌnaak koꞌu. In es reꞌ ahun-hunut. Aꞌnaak rais pirsait ein sin meupk ein esan reꞌ nakriraꞌ ma naruruꞌ ranan he atoniꞌ bisa nmoni kninuꞌ ma reko nok Uisneno. Maski sin nmoeꞌ natuin atoorn ein naan ok-okeꞌ msaꞌ, mes sin aꞌnaak pirsait on reꞌ naiꞌ Harun ka nabeiꞌ fa nakninuꞌ nain sin. Es naan ate sin nperluu aꞌnaak rais pirsait aꞌtetaꞌ reꞌ humaꞌ meseꞌ on reꞌ naiꞌ Melkisedek.