Search form

Naiꞌ Markus 15:40-41

40-41Anmuiꞌ naan bifee fauk reꞌ napeen Naiꞌ Yesus In aꞌmaten naꞌkon aꞌroo. Sin esan reꞌ nahunu te antuthaen Naiꞌ Yesus nok In atoup noinꞌ ein anbin pah Galilea. Sin esan reꞌ ain Salome, bi Maria naꞌko kuan Makdala, nok ain Maria (reꞌ naiꞌ Yakobus muniꞌ nok naiꞌ Yoses sin ainaf), ma bifee mfaun bian anteniꞌ reꞌ neem nabu-buan nok Naiꞌ Yesus neun Yerusalem.

Sin nsuub Usif Yesus In taꞌun neu noup fatu

(Naiꞌ Mateos 27:57-61, Naiꞌ Lukas 23:50-56, Naiꞌ Yohanis 19:38-42)

42-43Rarit atoin es naim ranan he nasanut Naiꞌ Yesus In aon-taꞌun amates naꞌko hau nehe. Atoniꞌ naan kaan ee, naiꞌ Yusuf. In naꞌko kota Arimatea. In reꞌ naan tuaf es naꞌko pukan afeek rais pirsait Yahudi. In neekn ee reko. In anpao-pao prenat Uisneno reꞌ he neem.

Naiꞌ Yesus anmaet nok neon nimaꞌ. Nokaꞌ te nateef nok atoin Yahudis sin neon onen. Es naan ate, anbi neon nimaꞌ naan, naiꞌ Yusuf he nasanut nahunun Naiꞌ Yesus In aon. Naiꞌ Yusuf anhaꞌtain in nekan, ma nnao nbaiseun gubernur Pilatus he nasanut Naiꞌ Yesus In aon amates naan.