Search form

Rasi Mnitas neu naiꞌ Yohanis 4

Sin naꞌbesan neu Uisneno anbi sonaf neno tunan

1Mansian Batuur-Batuur naan naꞌuab anrair In haan manbasan neun jemaꞌat hiut ein on naan ate, Uisneno nakriraꞌ kau rasi bian anteniꞌ. Nok askeken ate, au ꞌiit eon es masoit et sonaf neno tunan. Rarit au ꞌneen tuaf naan reꞌ in haan ee on reꞌ toꞌis, naꞌuab am nak, “Amsae uum meu ia, he au uꞌitab ko, areꞌ saaꞌ-saaꞌ reꞌ of he njair.”

2Oras naan, Uisneno In Asmaan ee nait neik kau ꞌsae ꞌeu sonaf neno tunan. Nok askeken ate, au ꞌiit aꞌtoko prenat, ma nmuiꞌ tuaf antoko nbi na. 3In masnaaf mamateꞌ ma meꞌe, on reꞌ faut arimat reꞌ maꞌosaꞌ, reꞌ sin nteek ee nak, yaspis ma sardius. Anmuiꞌ enous es, anfuun naan aꞌtoko prenat naan. In asnaaf ee mamateꞌ on reꞌ faut arimat samrut.+ 4Anbi bare naan, anmuꞌi ꞌtoko prenat manaꞌ boꞌ nua mhaa reꞌ aanꞌ-aanꞌ ein, sin nfuun naan aꞌtokoꞌ naan. Anmuiꞌ naan amnasit tuaf boꞌ nua mhaa ntokon nbin aꞌtook ein naan. Sin arsin anpaken paek mutiꞌ, ma naꞌsoeb ein aꞌsobe prenat reꞌ anmoeꞌ je naꞌko noin-moroꞌ. 5Anmuiꞌ rimat reꞌ npiin anpoin naꞌko ꞌtoko prenat reꞌ abit atnaan ee, ma ꞌroots ee ꞌpuun ee nanoon. Anmuiꞌ obor hiut reꞌ anpinan npoin naꞌkon aꞌtoko prenat naan in matan. Sin arsin reꞌ naan, nahuum on reꞌ Uisneno In Asmaan ee reꞌ nmuiꞌ masaf hiut.+ 6Anbi ꞌtoko prenat naan in matan, au ꞌiit on reꞌ oe tasi. Oe tasi naan kniun ii on reꞌ ninu.

Rarit au ꞌiit muꞌit haa reꞌ maꞌtain bes-besin, nfuun naan aꞌtokoꞌ naan. Sin aok ein naheun nok mataf. Sin reꞌ naan, Uisneno In muiꞌt ein reꞌ ntuthae Je.+

7Muꞌit ahuunt ee, in huumn ee, on reꞌ meoꞌ-roiꞌ singa. No nuan ii, on reꞌ bijae keso. No teun ii, on reꞌ mansian. Ma no haan ii on reꞌ kor-garuda natpeen.+ + 8Muiꞌ haaꞌ ein naan, es-es ate, maninif nee. Anbi niinf ein naan koti-mnaan, naheun nok mataf. Fai-manas sin nsiin piut-piut am nak,

“Hai mboꞌis miꞌnaeb Uisneno!

Hai maikas ma miꞌratan Uisneno In kanan!

Uisneno naan, akniun ii kah een!

Uisneno naan, In kuasan maꞌtain besi.

Uisneno nbi nain naa, naꞌko un-unuꞌ.

Uisneno nbi ia, oras ma eti ia.

Ma Uisneno reꞌ tar antea nabar-baar.”+

9Nok siit on reꞌ naan, sin nsiin ma nboꞌis Uisneno, ma nasaeb ein makasi neu Ne, natuin In ntoko nbi ꞌtoko prenat, ma In reꞌ nbi nain ia piut-piut tar antea nabar-baar. Oras sin nsiin, 10amnasit tuaf boꞌ nua mhaaꞌ ein naan anriꞌtuun nbin Uisneno In human ma In matan. Ma Uisneno antoko nbi ꞌtoko prenat. Sin nseeꞌ nain sin aꞌsobe preent ein, rarit sin natunuꞌ sin nbi In aꞌtoko prenat naan in matan, ma naꞌbesan neu Ne, reꞌ nabar-baar Kuun. Rarit sin npures ma nboꞌis Uisneno mnak,

11“Koi, Uisneno!

Hai mboꞌis ma miꞌnaeb Uisneno!

Hai maikas ma miꞌratan Uisneno Ho kanam.

Uisneno Ko, hai Usiꞌ.

Uisneno Ko, hai Uisneon goa!

Uisneno kuun ro es ansium ma ntoup hai siit pures-boꞌis.

Uisneno kuun ro es ansium ma ntoup hai rais hormaat.

Natuin Uisneno kuun ro es akuaas reꞌuf.

Ma Uisneno kuun ro es maꞌtain isat.

Uisneno kuun es reꞌ anmoeꞌ ma npakae areꞌ kanan saaꞌ-saaꞌ ii okeꞌ.

Uisneno kuun es reꞌ namonib ma natorob areꞌ saaꞌ-saaꞌ ii okeꞌ.

Areꞌ saaꞌ-saaꞌ reꞌ ia,

anjarin nrarin, natuin Uisneno nmoeꞌ ma npakae sin.

Areꞌ saaꞌ-saaꞌ reꞌ anmonin,

masnasaꞌ natuin Uisneno kuun es annonaꞌ ma nfee.”