Search form

Rasi Mnitas neu naiꞌ Yohanis 7

Uisneno ntao marak neu tuaf nifun nautn es nifun boꞌ haa mhaa (144.000)

1Rarit au ꞌiit Uisneno In ameput tuaf haa naꞌkon sonaf neno tunan anhaken nbin pah-pinan he ntahan anin. Es anbi pasaꞌ neon-saet, es anbi pasaꞌ neon-teas, es anbi pasaꞌ ponain, ma es anteniꞌ nbi pasaꞌ haaꞌ-nua. Rarit ain ii ka nfuu fa nbi pah metoꞌ ma oe tasi, ma haun guin.+ 2Uisneno nfee kuasa neu sin he nareuꞌ puru-pah, ma tasi. Rarit au ꞌiit ameupt es naꞌko sonaf neno tunan, neem naꞌko pasaꞌ neon-saet. In neik baer mamarak es naꞌko Uisneno abar-barat. Onaim in nkoaꞌ am natoon neu tua haaꞌ ein naan am nak, 3“Kaisaꞌ feꞌ! Kais mireuꞌ puru-pah, aiꞌ tasi, aiꞌ haun guin. Ampao he hai mtao marak ambi Uisneno In aan renuꞌ-aan rekaꞌ sin iirk ein naan feꞌ.”+

4Rarit sin natoon neu kau mnak, ameput naan anmarak naan Uisneno Iin na. Tuaf ein naan, sin nifun nautn es nifun boꞌ haa mhaa (144.000), reꞌ naꞌkon uuf Israꞌel. Sin arsin esan reꞌ:

5naꞌko uuf naiꞌ Yahuda, tuaf nifun boꞌes am nua (12.000);

uuf naiꞌ Ruben, tuaf nifun boꞌes am nua;

uuf naiꞌ Gat, tuaf nifun boꞌes am nua;

6uuf naiꞌ Aser, tuaf nifun boꞌes am nua;

uuf naiꞌ Naftali, tuaf nifun boꞌes am nua;

uuf naiꞌ Manase, tuaf nifun boꞌes am nua;

7uuf naiꞌ Simeon, tuaf nifun boꞌes am nua;

uuf naiꞌ Lewi, tuaf nifun boꞌes am nua;

uuf naiꞌ Isakar, tuaf nifun boꞌes am nua;

8uuf naiꞌ Sebulon, tuaf nifun boꞌes am nua;

uuf naiꞌ Yusuf, tuaf nifun boꞌes am nua;

uuf naiꞌ Benjamin, tuaf nifun boꞌes am nua.

Too neek akninuꞌ sin npures ma nboꞌis Uisneno ma ꞌBib-kaes Anaꞌ

9Rarit au ꞌiit mansian ein amfau-rutun, tar antea ka bisa ꞌsoiꞌ ꞌain sin fa barisi. Sin neman naꞌkon areꞌ pah-pah, uuf-uuf, kanaf-kanaf, ma uab-uab anbin pah-pinan. Sin arsin nabuan ma nbaisenun neun aꞌtoko prenat ma ꞌBib-kaes Anaꞌ naan. Sin npaken baur muti mnanuꞌ ma annaꞌan hau noo peta. 10Rarit sin npures ma nboꞌis buꞌ-buaꞌ am nak,

“Hai mpures ma mboꞌis hai Uisneno,

reꞌ antuun On anbi ꞌtoko prenat ia.

Hai maikas miꞌratan naꞌrat-raat ꞌBib-kaes Anaꞌ ia msaꞌ!

Sin reꞌ ia, esan reꞌ ansoi nafetin kit, ma nfee kit saok sanat ma ꞌhonis.

Sin reꞌ ia, esan reꞌ anrapin ma nfein raan aꞌhonis neu kit.”

11Naꞌuab ein anrarin on naan ate, Uisneno In ameput naꞌko sonaf neno tunan reꞌ nhaken nfuun naan ꞌtoko prenat naan, nriꞌtuun ma naꞌruir ein antean afu, ma nbaisenu ꞌtoko prenat naan. Amnasit boꞌ nua mhaa reꞌ anbin naan, ma muiꞌ maꞌtain haaꞌ ein naan amsaꞌ, nmoꞌen on naan. Sin arsin naꞌruir ein ma naꞌbesan neun Uisneno, 12ma sin nsiin am nak,

“Tebes namneo, tua!

Hai mpures ma mboꞌis Uisneno msaꞌ!

Hai maikas ma miꞌratan Uisneno In kanan amsaꞌ!

Uisneno In ronen ma tenab, ro ka nsaan niit fa.

Uisneno In kuasan, ro kouꞌ besi.

Uisneno In maꞌtanin, ro maꞌtain besi.

Hai mtoit makasi meu Uisneno piut-piut.

Hai mfee hormaat meu Uisneno ka natfeek niit fa.

Tebes namneo, tua!”

13Sin npures ma nboꞌis anrarin on naan ate, tuaf es naꞌko amnasit boꞌ nua mhaa naan nataan kau mnak, “Too mfaun ein reꞌ anpaken baur muit ein ia, ho muhiin sin ii, oo? Sin arsin reꞌ ia, naꞌkon mee?”

14Mes au utaah am ꞌak, “Kaah fa, tua. Au ka uhiin sin fa, tua. Ho es muhiin sin, tua.”

Onaim in natoon kau mnak, “Sin reꞌ naan, tuaf-tuaf reꞌ napenin fetin naꞌko suust am nanaꞌrenat koꞌu.

Sin reꞌ naan, tuaf-tuaf reꞌ anpake nrair ꞌBib-kaes Anaꞌ naan In naaꞌ,

he nboe ma nsaef sin paken,

ma nakninuꞌ sin barun.+

15Natuin rasi naan, sin nhaken anbin Uisneno In aꞌtoko prenat.

Sin ntuthae Je fai-manas anbi In Uim Onen.

Uisneno nok sin piut-piut.

Uisneno npafaꞌ ma npanat sin piut-piut.

16Sin of ka nnaben niit fa rais amnahas antein.

Sin of ka nnaben niit fa rais meon oe ntein.

Sin of ka nnaben niit fa maans ee in maputun antein.

Sin pausk ein of ka npoot ein fa ntein.+

17ꞌBib-kaes Anaꞌ reꞌ anpaumaak nok aꞌtoko prenat naan,

In of es reꞌ njair sin atukus.

In of es reꞌ napooꞌ neik sin,

ma naꞌinuꞌ sin anbin oe mataꞌ reꞌ neiki ꞌhonis.

Uisneno of es annoes nain sin susat,

henatiꞌ sin kais ankaen ntenin.”+