Search form

Dioni 8

Moi eme bobo aweka danu eme medike moi mibake ukeibiro fou uka wake

1-2Yesuma Oriwa oraararo amuke anike iro aini. Ainiro wai uriro Yesu owerike isare aarike dai sosi uwararo ani. Ane fariro eme keuwere fakake ku siane ibisaro Yesuma yaure ibaada we ma iwoka ukeibirie. 3-4Yesuma we ma iwoka ukeibiriebaie moi Du orounu darawadu we ma iwoka ukeka orouini Ferosi orouini emua moi awekabonu emeakaini dodoo ukeibi aweka mukake waure aare Yesubairo faka. Waure fakake i ku siane ibisa orounu ibooro ma enare oisake Yesubake eno weisa, Sisa, yewa aweka merama ukinuro erisike ibake we waure faraisia eno weisa. 5Eno weisake nono weisa, Mosesinu darawaduma eno weaku, i moi emeakabake ukeifeisa awekabo omama ure ma feaewe weakua weisa, ibake ama aneaneme wefaku weisa? 6-8I orou emenu ararae Yesu we nauke efisaro Yesunu wefi wake naufisane ibake Yesu we iruke ereibisa. Eno weisaro Yesu ubiri afua umanike wanama dooro owaowa ukeibibaie emuama areare weada eno weisa, A wearo naufe weibisabake Yesuma uyarike emuabake eno wei, yabairo i merama merama uke dakaku mi dawako yewa aweka omama siane ufi weike nono ubiri afua umanike wanama nono dooro owaowa ui. 9Yesuma eno uiro i Du orouma ekake fema fiake demui demui emenu dai orouko anisaro moibai emua ai dubuenama anisa. Yesuini i awekaini i ku siane ibisa orounu ibooro emenu imusu enare ibisi. 10Emenu mane enare ibeebe Yesuma uyarike i awekabake eno wei, anu wayai weeka orou aboro anisa wei? Abake do mamekaisaba me wei. 11Yesuma eno weibaie i awekama ma owerike eno wei, Dai Mi, i orou anisaya wei. Eno weiro Yesuma wei, Naini iini abake da we foramanea aniake moi merama ukeka nono da ua wei.

Yesu Dawae yewa doonu edoroya wei wake

12Moi odoro Yesuma i dai sosi uwara ubarenaro yaure ibisa oroubake eno wei, Nae dai ramefa edoro ari. Ibake yewa orofa akaka orou yaisina we ma iwoka ukakuniaba ibake Nae emenu ramefa edoro ari. Nanu umuro aafeisa oroue emuabairo dumu meba anifeisake i orofa akaka aboro aboro anifeisaie i me ibene ibene ibeka edoro emuabairo ibeifekua eno wei. 13Eno weiro i Ferosi orouma ma owekake eno weisa, anu mane anu onamibake weakuba ibake ae meo weaku ari iyama eno we imukaisia eno weisa. 14Eno weisaro Yesuma nono wei, meo mero ba weakunea wei. Nanu mane Nanu ukeka sineka wake weakuneba ie ba wakeya wei. Nanu aare orofa Na iwoka ukakuneke nono Nanu animau orofa Na iwoka sinakunero nono yae iwoka meya eno wei. 15Yesuma eno weike nono wei, yama Na kodo urakunekaie ya iwoka mero emenu kodo ari urakuneka. Nono Nama ya awoena kodo ure dakakune. 16Enoro nono kodo uraadae Nanu mane mero Na we odaikara Godi Dawa Na unu kofarakuba ibake Nanu umau kodoe baya eno wei. 17Nono yanu darawaduma eno weaku, eme una raarama ba erisua wake demui weaisiie emenu wakeye baya emema eno weaisaya wei. 18Yesuma eno weike nono wei, Naini nono Na we odaikara Godini uwa Nanu onamibake demui wake weaisua wei. 19Yesuma eno weiro Dawabake ma owekake eno weisa, Anu Babae aboro weisabaie Yesuma wei, Naini Nanu Babaeini ya iwoka meya wei. Yama Na iwoka sifokoronae Nanu Babae iwoka sifonea eno wei.

20Yesuma i wake i dai sosi uwara oi muneka ooruro weiro nono emema Dawa muneka odo fare da uiba ibake i dai Du orouma Dawa mune dauisa.

Yesuma wei, ya Nanu anakune orofaro da anifoisaya wei wake

21Yesuma emuabake nono eno wei, moi wake i ari enoya wei, Na animauro ya Na yodia ukeebe Na da fou ufokoisaie yanu merama merama ukeka idua yabairo ibifekuro i bobo feafoisaya eno wei. Ya feafoisake Nanu animau orofaro da aafoisaya eno wei. 22Yesuma eno weiro i Du orouma ma owekake eno weisa, Danu onami faya kuufekuba aneme ariya eno weisa? Anemebake eno weaku, Nanu animau orofaro ya da aafoisaya weaku weisa? 23-24Eno weisaro Yesuma wei, yae dooroma fakaro nono Nae ureroma isare fare. Ibake yae doo ubi orouro nono Nae ureroma isare fareba ibake Nae ure ubi Miya eno weike nono wei, ibake yewa wake weakunea wei. Eno weike wei, yama Nae i Mesaia i ma wirokeka miya da imufokoisaie Yanu merama merama ukeka yabairo ibifekuro feafoisa eno wenea wei. 25Eno weiro i orouma Dawabake eno weisa, a ainadeiro? Eno weisabaie Yesuma wei, Nanu wake adinami nauwaroma weibakunea wei. 26Yabairo Nanu onamibake wake keuwere wemauke ya kodo daiwere uraada yanu merama merama ukeka yaisina ma boroo yamaua eno wei. Na we odaikara Godi, Dawae ba, ibake Dawama aneme aneme Nabairo weakuro enaenari yewa orofa akaka oroubairo weibakunea eno wei.

27-28Yesuma Babae Godibake weiro i orouma ma nuna uisaro Yesuma emuabake nono wei, yae i Ba Eme Sini Mi korosiro ikokoma ufoisaie i odoro Nae i Mesaia ibai idua iwoka sifokoisaya wei. Eno weike wei, nono moiye yama eno iwoka sifokoisa, Nae Nanu imukekaro uke dakakuneke Godinu imukekaini we ma iwoka ukekaini i mane weakune, eno iwoka ufokoisaya wei. 29Na we odaikara Godi Nabairo ibinu. Enoba Danu imukeka mane ukakune ibake Dawa rooro ukakuke Na mede dakakunaraya eno wei. 30Yesuma eno wei ibake eme keuwere emenu imuka yaisina Yesubairo oisa.

Me eneibaka orouini meramawere yawokakuneka oroubake wei wake

31-32Yesuma Danu wake naukeibisa Du oroubake eno wei, Nanu wake naukenewaa ufoisaie Nanu ba iwoka ukeka orou sifoisake Nanu wake iwoka ufoisa ibake Nanu wakema ya ma wirofiakuro irau me ibifoisaya eno wei. 33Yesuma eno weiro emuama ma owekake eno weisa, iyae Eibaramunu sisia sirorari orou ibake moi orouma iya yawoke dakakunisabairo anemebake yanu meramawere yawokeka ibai idua me sifeku weakua eno weisa? 34Eno weisaro Yesuma emuabake nono wei, Nanu ba wake wemaro nauawe wei. Aina ainama merama ukaisaie i meramama emua yawokakuneba ibake emuae i meramawere yawokeibakuneka orou aria wei. 35I meramawere waiya ukaku mi dawa danu yawokaku minu uwararo da ibifeku. Nono i yawokaku minu amara danu dooro ibeifeku furo danu babaenu uwararo ibeifeku. 36Enoba Na Godinu Amarama Nama ya ma wiromiauie yanu merama ukeka sineka idua medifoisake me irauaiai ibenewaa ufoisaya eno wei. 37Yae Eibaramunu sisia orou Na iwokaroma nono ya arara me Nanu wake weeka ibake yae Na ma feafokone ukaisaya wei. 38Nae Nanu Babaenu ba irau wake naueba yabairo weibakunero nono yae yanu babaenu wake naukeibaisa ibake eno ukaisaya wei. 39Eno weiro i orouma Yesubake ma owekake eno weisa, Eibaramu dawae iyanu babaeya weisaro Yesuma wei, yae ba Eibaramunu amarakuronae danu ukeibi enaenari ukeifonea eno wei. 40Enoba awoenae yama Na ma feareka daaba yodia ukaisaya wei. Nae Godibairo naue wake yabairo weibakunero nono yama Na ma feafokone daaba yodia ukeibaisaya wei. Yae eno ukaisa ibake yae Eibaramunu ukeibi waiya enaenari uke dakaisaya wei. 41Yama i ari eno ukaisaie yanu babaemukunu ukeka sineka enaenari ukaisaya wei. Eno weiro emuama nono weisa, iyanu amaemukuma iya daabaro dore dauisaya eno weisa. Iyanu babaeye demuiya, Dawae Godiya weisa. 42Eno weisaro Yesuma emuabake nono wei, Godiye yanu Babae me. Dawa Yanu Babaeronae yama Nabake imukari ufonea wei. Godima Na we odaikararo Dawaini demuiro ibeebe medeke Dawabairoma isare aare ibake Godi Dawa yanu Babaeronae yanu imuka yaisina Nabairo odifonea wei. 43Anemebake Nanu wake nauke dakaisa wei? Ya arara me Nanu wake weekaro ya naukeka ibake yanu ome dadau ukaisake Nanu wake nauke dakaisaya eno wei. 44Ibake yanu babaeye seidani. Yae danu amaraku ibake yae danu weaku ukaku i ari enaenari mane ukaisaya wei. Adinami nauwaroma seidani dawae ma feareka mi. Enoba dawa arara me ba irauaiai ukeka. Dawae meo weeka mane iwoka ibake dawae ba me mi. Dawa wake weakuie meo wake mane weaku ibake dawae meo weekanu babae. 45Enoba yabake ba ofe ariri wake weakunero ya nauke imuke dakaisaya wei. 46Ainama Nabake Ae merama ukakua wefeku? Eno da wefeku, Nae ba irau wake mane weakunero nono anemebake Na imuke dakakuneka eno wei? 47Aina mi dawa Godibairoma fafekuie Godinu wake naukenewaa ufekua wei. Yae Godibairoma fare dauisaba ibake yae Godinu wake nauke dakaisaya Yesuma eno wei.

Yesuini Eibaramuini emenu wake

48Yesuma emuabake i wake eno weiro i dai Du orouma Dawabake eno weisa, iyae Abake eno weaisi, Ae seidaninu merama imumu bobo Samaria orofa miya weaisi ieba, ba meo weaisi weisa? 49Eno weisaro Yesuma wei, Nabairo seidaninu merama imumu ibe me wei. Nae Nanu Babae we ma irauaiai ukakunero nono yama Nabake merama wake weaisaya wei. 50Nanu onamibake we ma irauaiai uke dakakunero Godi Dawama Na we ma irauaiai ukakunaraba i meo weaisa orou yaisina kodo gienabu ufiakua wei. 51Yesuma eno weike nono wei, Nanu ba wake wemaro nauawe wei. Aina ainama Nanu wake nauke ukenewaa ufeisaie da feafeisake me ibene ibene ibifeisaya wei. 52Eno weiro i Du orouma Dawabake ma owekake eno weisa, abairo seidaninu merama imumu ibinuro iya iwoka sinaisia eno weisa. Eibaramuini i we bou ukeka orou yaisina feakade aneaneme danu wake nauke ukenewaa ufeisaie da feafisake me ibene ibene ibifisane weaku weisa? 53Iyanu babae Eibaramu dawa feari. Nono i we bou urieka orouini iini feakade nono eno anemebake weaku weisa? Ae daiwerero nono i oroue okoanaku eno imukaku weisake weisa, Ae ainadei, wearo naufe weisa. 54Eno weisaro Yesuma wei, Nanu imusu Nanu onami we ma irauaiai umauie ba meya wei. Yama eno weaisa, Godiye Nanu Babaeya yama eno weaisakema nono Danu wake nauke dakaisa. I Godima Na we ma irauaiai ukakunarake Na ma daiwere ukakunaraya wei. 55Yae Dawa ma nuna ukaisaro nono Nae Dawa iwoka ukakunea wei. Nama Godi Dawa iwoka meya wemauie yanu meo weaisa wake ari wemaua wei. Nae Godi iwoka ukakuneke Danu wake nauke ukenewaa ukakunea wei. 56Yesuma nono wei, yanu babae Eibaramuma Nanu fareibisarabai erike rooro uia eno wei. 57Yesuma eno weiro i Du orouma ma owekake eno weisa, Ae awoena miya weisa. Anu dai sineka oya fifidi (50) mune mero nono Eibaramu erike weaku weisa? 58Eno weisabaie Yesuma wei, Nako ibisararo Eibaramu danu amaema dawa ai dubuenaro doria wei. 59Eno weiro i Du dai orouma dino uisake oma mukake Yesu umafisane uisaro Yesu me ari uike i dai sosi uwara medike ani.

Godinu irau wake

© 1988, Wycliffe Bible Translators, Inc. All rights reserved. More Info | Version Index