Search form

Ruki 8

Yesuini aneibisa awekabobake wei wake

1-2Moi odo odoro Yesuma Godinu yawokaku orofabake irau wake moi goi goiro we eneiareibi. Danu iwoka ukeka orou duero (12) Dawaini anisaro Yesuma seidaninu merama imumu bobo arama uke ibisaro ma wiroi awekaboini moi awekaboini Dawaini eno anisa. Moi awekanu ibiye Meri Magidarini weaisa aweka, Yesuma i awekanu imuka ubarenaroma seidaninu merama imumu seweni (7) we yowerieke i aweka ma wiroi. 3I awekaini Dusanu aweka Doana, danu eme Dusae Erodinu waiya ukeka orou yawokeibirie mi. I moi aweka ibiye Susanaini nono moi awekabo keuwereini emuama aneibisake Yesuini Danu iwoka ukeka orouini emuabairo urunaini oini makeibirieka.

I yo sianeka mibake dubo waure wei wake

4-5I goi goi orou keuwere fare ku siakaro Yesuma emuabake dubo waure wake weada eno wei, moi mima yobai waifine waiyaro ani. Ane farike diru muni. Diru mune me sinike yobai munike siane eneibi. Yobai siane eneibiro yo moibai daabaro isakaro emema duboro amuke adiadi yare aneibisaro nono gasiroma iseibisa. 6Nono moi yobai oma firifiri bobo dooro isakake sabu kua fareibisaro nono doo ubarenaro gibudike doo ubarenaro adua fofo meba ibake boke ure me sika. 7Nono moi yobaie sinisini bobo ou kunu ubarenaro isakake irau warakakema nono ou kunuwereba onu eriro kai uwane dauisa. 8Nono moi yobaie irau dooro isakake irauaiai warakake kaibai keuwere uwaka. Yo kai demuima moi kaibai wani aderedi (100) uwania weike wei, i ome bobo oroue ya Nanu wake naukenewaa uawe wei.

Ibake i wake dubo waure wei

9-10Danu iwoka ukeka orouma Yesubairo eno weisa, i dubo waure wenu i wakenu ubide aneme ari weisa. Eno weisaro Yesuma ma owerike emuabake eno wei, Godinu ararae yama Danu ure yawokaku irau fe wakenu ubi iwoka ufone ibake ma boroo yarakunekema nono i moi emebairo dubo waure weeka wakeroma weakune. I orouma i wakenu ubi ma nuna ukaisaba ibake awoena eraisakema ba bai ere dakaisa. Ibake naukeka naukaisakema nono ba bai nauke dakaisaya wei.

Yesuma i yo siane eneibi minu dubo waure wei wake ma boroo yari wake

11Yesuma eno weike nono wei, i dubo waure wene wakenu ubiye eno, i yobaie Godinu wake ari. 12I daabae Godinu wake naukaisa orou ari. I miye Godinu wake we enarakuro i daabaro enereibeka orouma Godinu wake naukaisaro seidanima sabu farakuke i naukaisa wake idua ma nuna ukakune, i orouma naunao ufeisake wironao ufeisaba ibake eno uke yarakune. 13Enaenarie moi orou emua oma firifiriwere dooro siani, i ari eno emuama Godinu wake naukaisake rooro ukaisaro Godinu wakebake awe waa emuabairo farakuro ibake weada Godinu wake naukenewaa uke dakaisake emenu Godi imukeka imukae irauaiai me. Emenu imukekae irauaiai mebake i wake medaisa. 14Moi oroue i ou kunuwere orofa ariba ibake Godinu wake naukaisakema nono emenu imukeka imusu imusu imukaisake emenu arara eraerabusa munaisake emenu arara yaisina ukaisake i wakenu daaba dadau ukaisaba ibake irauaiai ukenewaa dakaisa.

15Nono moi orou emuae i irau dooro isakake irauaiai waraisa ari eno, Godinu wake naukaisakema nono emenu irau imukama imukenewaa ukaada irau wake wenewaa ukaisake ibenewaa ukaada irauaiai ukenewaa ukaisaro emema eraisaya Yesuma eno wei.

Okea wowonaro ramefabake wei wake

16Yesuma nono eno wei, ramefa biafoisake okea wowonaroba sebo wowonaro odifoisa? I ari eno ufoisa? Me, eno da ufoisa! Ramefa mune biafoisaie aiso odeka orofaro aiso odifoisaro eme aweka i edoro eraada ibifeisaya wei. 17Enaenarie Godinu yawokaku orofabake fema imuke bou ukaku eraerabusa yaisinaini i fema ukeka yaisina ma boro yafekuke edororo odifekuro eraada iwoka ufeisaya eno wei. 18Enoya i naukeka eraerabusa aneaneme wefeisaie naukenewaa uawe wei. Ainama naukenewaa ufekuie Godima moi naukeka dawabairo mafekua wei. I daiwere naukaku mibake moi naukeka mafekuke nono i demuinaku imukaisa orouma we imukaisa, nanu naukekae iduaya we imukaisaie emenu dai menaku naukaisa ibai mareke mufiakua wei.

Yesunu amaeini Danu naburakaini emenu wake

19Yesu Danu amaeini Danu naburakaini Yesubairo anifisane faka. Ane fakakema nono eme keuwere fare ku siane ibisake i daaba dadau uisaba ibake Yesubairo ane fare dauisa. 20Ane fare dauisake ewa dewa enare ibisaro moi orouma emua eriekake Yesubairo ane fakake eno weisa, Anu amaeini naburakaini A emekane aarisake uwara udiro enare ibinisaya eno weisa. 21Eno weisaro Yesuma emuabake eno wei, Nanu amaeini Nanu naburakae Godinu wake naukada enaenari ukaisa oroue emua iduaya eyakawe wei.

Yesuma i kuna ufe we kuuri wake

22Moi odoro Yesuini Danu iwoka ukeka orouini boudiro amukaro Yesuma eno wei, kuna ekabokenaro siraa yafe wei. Eno wei enaenari aneibisa. 23Aneibisabaie Yesu nauka aine ibiro oyau daiwere fari. Oyau daiwere fariro kuna ufe daiwere uyariro boudi inuu yafine uiro i orou feafisane uisa. 24I orouma Yesu ma uyakake eno weisa, Dai Waria Mi, iyae feafene ukaisia weisa. Eno weisaro Yesuma naisa forakada uyarike oyauini adua ufeini we kuuriro oyauini adua ufeini me sinike me mo ari sini. 25Eno uiro Yesuma Danu iwoka ukeka oroubake eno wei, Na imukenewaa ukakunekaba me wei? Yanu imukeka aboro wei? Eno weiro Danu iwoka ukeka orouma ia sinaada imuka foria uisake we makanada eno weisa, yewa miye abo miro oyauini aduaini Danu wake naukisa weisa.

Yesuma seidaninu moi merama imumu bobo mi ma wiroi wake

26-29I Gerasi orofaro seidaninu moi merama imumu bobo mima ibeibi. I mi dawae odo keuwere wau rune dakeibike uwararo aine dakaada i eme feareibisaro ane odeibirieka oma eraboro aineibi. I seidaninu merama imumuma i mibairo odo keuwere berukeibiba ibake emema i minu umu wana senima uwane kariseibisake yawokeibisa. Eno uke odeibisaroma i mima seni ma furufuru yareibiro i seidaninu merama imumuma danu derenaro amuiro eme ibe me orofaro ani. Yesuini Danu iwoka ukeka orouini emuama i Gerasi orofa kuna ekabokena iro ane enaka. I Gareri orofa moi enaroe i Gerasi orofa moi enaro nono i kunae abanaro ibi. I Gerasi orofaro ane enakaro Yesuma gibudiro isare enaribaie i seidaninu merama imumu bobo mima Yesu fou uri. Dawae Yesu fou uriro Yesuma i seidaninu merama imumubake eno wei, danu imuka ubarenaroma amuke ania wei. Eno weiba ibake i mima Yesu eraada ifoma kodudu yanakada daiwere eno wei, Yesu, dai urero ibinu Godinu Amara aini naini demui meya anemebake aarinu wei. Eno weike wei, na fanisi da maina wei. I Mi dawae odo keuwere wau rune dakeibike ofe mane enaada ba goiro ane dakeibike eme feareibisaro ane odeibirieka oma eraboro aineibi. (I seidaninu merama imumuma i mibairo odo keuwere berukeibiba ibake emema i minu umu wana senima uwane kariseibisa. Eno uke odeibisaroma i mima seni ma furufuru yareibike i seidaninu merama imumuma danu derenaro amuiro eme ibe me yao orofaro ani.) I mima Yesubairo aareibibaie Yesuma i seidaninu merama imumubake ania weibaie i mima Yesu eraada Yesunu umu udiro iboo yanakaisari ukaada wake daiwereroma eno wei, Yesu, Dai urero ibinu Godinu Amara nabake aneme ufane ukaku wei. Mediake na fanisi da maina wei. 30Eno weiro Yesuma i minu ibi we nauke eribaie seidaninu merama imumu keuwere i minu imuka ubarenaro ibisaba i mima ibake eno wei, nanu ibiye keuwereya wei. 31Eno weiro i seidaninu merama imumuma Yesubake nono weisa, i merama orofaro iya da we odaiya weisa. 32Eno weada ekabaie borosiri keuwere oraararo uruna iseibisaro ekake Yesubairo eenu weada eno weisa, iyanu ararae i borosirinu imuka ubarenaro amufene weaisia weisaro Yesuma wei, iro aniawe wei. 33Yesuma eno weiba ibake i seidaninu merama imumu i minu imukaroma amuke fakake anisake i borosirinu imuka ubarenaro isaka. Eno uisa ibake i borosiri yaisina durame anisake oraara okoroma bibi ukake kunaro isare imu iseake feaka.

34I borosiri yawokeibisa orouma i uisabai ekake goiro durame anaadae i goi orou yaisinabairo ibai ane wayai weisaro nauisa. 35I goi orouma ibai nauisake efisane anisa. Ane Yesubairo i seidaninu merama imumu meisake anisa mi, dawae awara irauaiai uiro wau runike yaure ibiro ekake ia sirie. 36Ibai ekake i seidaninu merama imumuini borosirinu uisa ibai eka orouma i awoena faka orou ibai yaisina weisaro nauisa. 37I Gerasi orou yaisina ia daiwere iyakake Yesubake eno weisa, iyanu orofa mediake imusu ania weisaba ibake Yesuma boudiro anifine ane amui. 38-39Ane amuibaie i seidaninu merama imumu me sini mima nono wei, naini anifu weibaie Yesuma meya weike wei, anu goiro aniake Godima abake imukari daiwere ukinu ibai yaisina wearo naufisa wei. Eno weiro i mima anike i goiro eme yaisinabairo Yesuma dawa ma wiroi ibai yaisina weiro nauisa.

Dairasinu arumaini Yesunu wauro ure burike wiroi awekaini emenu wake

40Yesuma nono owerike Gareri enaro nono ani. Eme keuwere Yesu koro ukeibisabaie Yesu idua fariro Yesubake arie wake weisa. 41-42Moi mi danu ibiye Dairasi, dawae moi Du orounu sosi uwara yawokeibi mi. Dawama Yesubairo farike Yesunu umu udiro iboo yanakaisari ui. I minu arumanaku una demuiba dawa arama uike feafine ukeibiro ibake Yesubairo farike eno wei, nanu uwararo aara wei. Eno weiro Yesuma i mi Danu uwararo ani. Aneibibaie eme keuwere Danu umuro enare waiyakake anisa. 43I aneibisa ubarenaro moi aweka dawaini iini ani. I aweka dawae arama daiwere uike ibaada iwa mane dore aineibi. Oya duero (12) iwa mane doraada i arama ma wirokeka oroubairo anaada danu oi yaisina sianeibiroma danu arama irau sine dakeibi. 44I awekama Yesunu dubuenaro farike Danu wau barunaro ure buribaie danu iwa doreibi ibai idua di kuuri. 45Eno uiro Yesuma wei, ainama Na ure burinara wei? Eno weibaie i eme yaisinama iyae iwoka meya weisa. Eno weisaro Fidama eno wei, Dai Waria Mi, eme keuwere Anu umuro enare waiyare aaraisa iro ea wei. 46Eno weiro Yesuma wei, ainama Na ure burinara ari. Nanu buna Nabairoma dawabairo ainuro Na karanea wei. 47Yesuma eno weibake i awekama we imui, Dawae iwoka ukakua we imukadae ia daiwere sinike iura mamaada Yesubairo farike iboo yanakaisari ukaada danu arama irau sini ena wake idua i oroubairo weike eno wei, nae Dawa ure burinero nanu iwa dorakuneibai idua di kuurinua wei. 48Eno weiro Yesuma ma owerike eno wei, aruma ama Na imukeka imukae daiwere ibake wirokinua weike nono wei, aniake me irauaiai ibia wei.

49Yesuma eno weibaie moi mima Dairasinu uwararoma emuabairo farike Dairasibake eno wei, anu aruma fearinua Sisa Mibairo wake goro da wea wei. 50Eno weiro Yesuma nauike Dairasibake eno wei, ia da siake imukenewaa uaro dawa wirofi wei. 51Dairasinu uwararo ane fakake Yesuma i orou yaisina medirieke Fidaini Dionini Deimisini i arumanu amae babaeini emua i uwara ubarenaro waure amurie. 52Waure amukada nauibaie uwara ubarenaro yaure ibisa orouma sorara ukeibisaro nauike eno wei, ii da weawe. I aruma feare mero nauka kunawere aine ibinua wei. 53Yesuma eno wei ibaibake i orouma yo weisa. I aruma dawae fearinuba nono da uyafekua weisake ibake yo weibisa. 54Yesuma i arumanu wanaro munike eno wei, arumanaku uyaa wei. 55-56Yesuma eno weibaie i ai dai sineibi arumanakuba idua imu sianada iroma uyari. Uyariro Yesuma eno wei, uruna dawa maaro ifi weiro danu amae babaema imuka foria uisi. Uisiro Yesuma emuabake nono wei, eme moibairo i wake da weawa wei.

Godinu irau wake

© 1988, Wycliffe Bible Translators, Inc. All rights reserved. More Info | Version Index