Search form

Dionibai 1

1Yesu Kerisoma yewa bukaro owaowa wakenu ubi we ma boroo yareibi. Enoba Godi Danu ararae yewa wake Danu waiya ukeka oroubairo we ma boroo yafine ibake yewa wakeye Yesubairo wei. Godi Danu ararae i dubuenaro sabu fafeisa eraerabusa aneaneme uke fafeisa ibai emua iwoka sifisane ibake yewa wake Yesubairo wei. Enoba Dawama Yesu Kerisobairo eno weiro nono Yesu Kerisoma Danu aneru we odairo i aneruma Yesu Kerisonu waiya ukeibi mi Dionibairo anike yewa wake yaisina dawabairo wei. 2Na Dioni, nama i ukeibi ibai yaisina ere me sineke Godinu wake yaisina we ma boroo yareke Yesu Kerisonu we ma boroo yari ena ba wakeye i ari enoya we. 3Enoba aina mima yewa buka kakurenewaa ufekuie Godima dawa we ma irauaiai ufeku. Nono aina ainama Godinu faraada ufeku ibai naufeisake yewa bukaro owaowama weaku wake enaenari ufeisaie Godima emua we ma irauaiai ufiaku. Enoya yewa wake naukenewaa uawe! I dubuena kai odo fafine fu sifekuie i eraerabusa yaisina idua sabu fafeisa.

Dionima sosi uwara sewenibairo (7) owaowa yanake odi wake

4Na Dioni, nama nanu wake ya Eisia orofaro sosi uwara seweniro (7) ibinisa oroubake owaowa yanake odakune.

5Nanu ararae Godi Dawae adinaroma ibeebe awoenaini idua ibinuba nono dubuenaro owere fafeku ibake Dawaini i Danu dai yaure ibeka udiro enare ibinisa imumu sewenini (7) Yesu Kerisoini Emuama yabake irauaiai unu kofiakake Emenu irauaiai ukeka yabairo mafiakane ibake weakune. Danu Amara Yesu Keriso Dawae i bokai sini ubi Mi. Nono Dawae Godinu wake wenewaa uike fearike iroma uyariroma nono i dai yawokeka orou yaisina Dawama yawokakune.

Yesu Keriso Dawae iya yaisinabake imukari ukaada iyabake feariro nono Danu iwa yewa dooro isariba ibake Dawama iya yaisina iyanu meramawere ukeibisi iroma imusu mune odii. 6Enoba Dawama iyaini eme yaisinaini iya yaisinae danu Babae Godinu ofereni ode sibore sianeka orou we mune odiiba ibake Dawabairo buna daiwereini arakeka daiwereini idua me ibene ibene ibeifisane weakune, nanu wake idua.

7Erenewaa uawe. Dawae i urero ou ubarenaroma fafekua. Nono Dawae iroma eno uke fafekuro eme yaisinaini nono Dawa ure yanake ukeibisa orou emuaini iini Dawa efeisa. Enoba Yewa orofa akakaro orou yaisina emuama Dawabairo meramawere uke yareibisaba ibai emuama imufeisake emenu mane emenu imukaro uraada ii wefeisa. Nono Dawae i ari eno uburoma fafeku. Nanu wake idua.

8I Dai Godima eno wei, Na mane Nae i bokairoma dubuenaroma i fafeisa eraerabusa i yaisinanu ubiya eno wei. I buna daiwere Godima nono eno wei, Na mane adinami nauwaroma ibeebe awoenaini idua ibineba dubuenaro Nama buna daiwere uke famaua eno wei.

Dionima i Ba Eme Sini Mi eri wake

9Na Dioni, nae ya eme yaisinanu naiye. Yaini naini Yesubairo daba mame ibinisi, ibake Yesu Kerisoma iya yawokakuniro yewa orofaro ibaadae yaini demuiro Danu waiya ukaisi. Eno ukaisi ibake emema iyabairo awe waa faraisaro oferi daiwere wauraisikema nono iya yaisina enare ara ukaisi. Ibake Godima Yesu Kerisobake we ma boroo yari wake nama weba ibake nae mune eka ena ewa ena dawararo nono naisaroe Fadamosi weaisa orofaro odiyakaro ibine. 10Enoba nae iyanu Dai Waria Minu moi dai fura odoro me ibisararo Godinu Imumu Irauma nanu imuka ubarenaro isarike na yawokenewaa ukararo moi mima wake daiwere kawia yama ari nanu yaure ibisara derena enaroma weiro naue. 11I wakeye i ari eno wei, awoena aneme aneme eraku ibai enaenari bukaro owaowa yanake odiake odaiyaro i sosi yaisina seweniro (7) ibinisa oroubairo anifi wei. I Efesaini Simanini Fegamamuini Daidairaini Sadasini Firedefiaini Reiodisiaini i orofa imusu imusuro ibinisa sosiro Godinu wake naukaisa oroubairo anifi wei.

12Nama i wake naueke nono nanu ararae ure owemake emane ure owereke erebaie gorudima ubu uisa ena esiwa sewenima (7) domea ukeibisaro ere. 13I esiwa yareibisa edororo erebaie i Ba Eme Sini Mi ari Mima enare ibiro ere. Danu yafa wauma baruiro Danu umu yaisina dadau ui. Dawae i moi gorudima ubu ukaisa gabagana amayai arabanaro waiarike enare ibiro ere. 14Danu fouma idiye inanakeo ou inana ari eno. Nono Danu naisae inaa domea ari eno ukeibiro ere. 15Danu umue edoro daiwerero ie burasi weaisa ayani ari eno. Dai inaawerero oukeibaisaro ino yaisina eu diriiro ibakuro irauaiai burasi mane amukeibakuro eme emuama ma isuasu ukeibaisaro edoro daiwere uekibaku, Danu umue i ari eno. Danu wakeye adua sisifuma aweoro isare yanake mamaada weibaku i ari eno. 16Dawae i muina seweni (7) Danu baena wanama mame ibi. Nono moi awe eka ena ewa ena fokakai bobo bainedi Danu bebekuro ibiro eno bobo aweawero amui. Danu iboo naisae eweka amuke okoro farakuke ukaku enaenari ui. 17-18Enoba Nama Dawa ereke Danu umu udiro birueke fearaisari ue. Nae eno uero Dawama Danu baena wanama na uri burisada eno wei, ia da sia wei. Nae i bokairoma dubuenaroma i eraerabusa yaisinanu ubiya eno weike nono wei, Nae i me ibine ibine ibeka Mi. Enoba Nae feareke wiroeroma nono awoenaini me ibineba nono dubuenaroe me ibene ibene ibimau Mi. Enoba Nae i feare aneka orofaini i fearaisa orou yaisina yawokakuniaya wei. 19Dawama nono nabairo eno wei, i ari enoya i eraku eraerabusa yaisina owaowa yanake odia wei. Awoena eraku eraerabusaini nono i dubuenaro fafeisa eraerabusaini i yaisina owaowa yanake odia wei. 20Nono i muina seweni (7) Nanu baena wana enaro ibinisaro erinuke nono i gorudima ubu uisa esiwa erinuke, ibaie dubo waure weaisa wake ari eno. I wakenu ubiye i ari eno, i muina sewenie i sosi seweninu aneruro nono i esiwa seweninu ubiye i ari eno, i esiwa sewenie i sosi uwara seweniya Dawama eno weiro na naue.

Godinu irau wake

© 1988, Wycliffe Bible Translators, Inc. All rights reserved. More Info | Version Index