Search form

1 Tekwaro 13

Daudi okelo tam me kela canduk pa Lubaŋa i Jerucalem

1Daudi yam oyubo lok ki ludito ma loyo buca mony me jo alip ki buca mony me jo miya, ki ludito ma i dul acel acel. 2Ci Daudi oloko ki kacokke pa jo Icrael ducu kun wacci, “Ka ce bedo ber botwu, ma Rwot Lubaŋawa bene mito, ci wacwalu kwena orom kin utmegiwa ma gudoŋ i lobo Icrael ducu, kacel ki ajwagi ki Lulevi ma i gaŋi ma gitye ki lobo me kakwatgi, wek gubin gucokke kacel botwa. 3Ka wek doŋ wakelu canduk pa Lubaŋawa botwa, pien i kare pa Caulo yam watenyo woko ata.” 4Ci kacokke ducu oye ni gitim kit meno, pien lokke onen atir bot lwak ducu.

Daudi ocito ka omo canduk pa Lubaŋa

(2 Cam 6.1-11)

5-Daudi ocoko jo Icrael ducu cakke ki i Cikor ma i Ejipt nio wa i yo ma donyo i Kamat, pi kelo canduk pa Lubaŋa ki i Kiriat-jearim. 6-Daudi ki jo Icrael ducu gucito i Baala, ma en aye Kiriat-jearim ma tye i Juda, ka omo canduk pa Lubaŋa woko ki kunnu, en aye canduk ma gilwoŋo ki nyiŋ Rwot ma bedo i wi komker malo ka wi lukerubi. 7Ci gutiŋo canduk pa Lubaŋa i wi gadigadi manyen, gukelo woko nia ki i ot pa Abinadab, ci Uja ki Akio gubedo ka Leko twoni ma ywayo gadigadi. 8Daudi ki jo Icrael ducu gubedo ka yarre ki myel ki yomcwiny i nyim Lubaŋa ki kero komgi ducu, ki wero wer-gu, ki goyo opuk-gu ki naŋa-gu ki ajaa-gu, ki atego agoya-gu ki tum-gu.

9Ka guo i laro moyo pa Kidon, Uja ocwalo ciŋe pi mako kom canduk, pien onoŋo twoni gucato. 10Ci kiniga omako Rwot i kom Uja, ci oneke woko pien onoŋo oketo ciŋe i kom canduk; oto woko kunnu i nyim Lubaŋa. 11Ci kiniga omako Daudi, pien Rwot otugge i kom Uja; mumiyo kabedo-nu gilwoŋo ni Perej-uja nio wa onyoo. 12Daudi obedo ki lworo i kom Lubaŋa i nino meno; owacci, “Abikelo canduk pa Lubaŋa wa paco bota niŋniŋ?” 13Kit meno omiyo Daudi pe otero canduk wa i gaŋ kal pa Daudi, ento oŋak kwede woko i ot pa Obed-edom ma jo Gat. 14-Canduk pa Lubaŋa obedo i ot pa Obed-edom pi dwe adek; ci Rwot omiyo gum bot Obed-edom ki jone ducu.

Baibul 1985

© 1985 The Bible Society of Uganda

More Info | Version Index