Search form

1 Camuel 15

Lweny i kom jo Amalek

1-Camuel owaco bot Caulo ni, “Rwot yam ocwala ka wiri ki moo ker me bedo kabaka ma loyo jo Icrael, mumiyo tin ber iwiny lok pa Rwot. 2-Rwot me mony owaco kuman ni, ‘Abiketo can i kom jo Amalek pi gin ma yam gutimo i kom jo Icrael, pien yam gulwenyo kwedgi ma gitye iyo, i kare ma gua ki i Ejipt. 3Cit ilweny ki jo Amalek, idyergi i ciŋ Rwot, ijwergi woko liweŋ ki gin ducu ma gitye kwede. Pe kica omaki i komgi, ento inen co wa ki mon, litino wa ki gin ma pud dot, twoni ki romi, kinaga wa ki kana-gu.’ ”

4Caulo olwoŋo dano ka lweny, ci okwanogi i Telaim. Jo ma giwoto ki tyengi onoŋo giromo alip miya aryo, ki jo pa Juda alip apar. 5Ka Caulo obino i nyim gaŋ pa jo Amalek, ci obuto i nota, okurogi iye. 6Dok Caulo owaco bot jo Keni ni, “Wua, wucit woko ki i kin jo Amalek, wek pe atyekwu woko kacel kwedgi; pien yam kica omakowu i kom jo Icrael ducu i kare ma gua woko ki i Ejipt.” Mumiyo jo Keni gua woko ki i kin jo Amalek. 7Caulo oloyo jo Amalek cakke ki i Kavila o kwede wa i Cur ma cok ki lobo Ejipt yo tuŋ wokceŋ. 8Omako Agag kabaka pa jo Amalek otere makwo, ci odyero jo-nu, ojwerogi woko ki pala lucwan. 9Ento Caulo ki lwak kica omakogi i kom Agag, ci guweko en kacel ki romi mogo ma gibeco, ki twoni, ki roci mucwe, ki litino romi-gu, ki jami mukene ma gibeco ducu, pe guye ni myero gijwergi woko liweŋ, Gin ducu ma gicayo, ki gin maracone, gin aye gujwerogi woko.

Lubaŋa okwero Caulo me bedo kabaka

10Ka doŋ lok pa Rwot obino bot Camuel ni, 11“Atyeko ŋut pi miyo Caulo bedo kabaka, pien obarre woko ki ka lubo kora odok woko cen, pe ocobo cikka.” Ci kiniga omako Camuel, obedo ka kok bot Rwot dyewor benebene. 12Camuel oa odiko con pi rwatte ki Caulo. Ka gitito bot Camuel ni, Caulo doŋ owoto i Karmel, ocibo gin me po pire kene, ci olokke okato anyim, ocito wa i Gilgal. 13Ka Camuel oo bot Caulo, ci Caulo owaco bote ni, “Gum pa Rwot obed i komi. Atyeko cobo cik pa Rwot.” 14Camuel owacci, “Man dok kit koko romi aŋo ma awinyo ki ita-ni, ki koko dyaŋi ma awinyoni?” 15Caulo owacci, “Gikelogi ki bot jo Amalek, pien dano guŋoyo romi ki dyaŋi mabecone me gitum bot Rwot Lubaŋani; ki mudoŋŋe wajwerogi woko ducu liweŋ.” 16Ento Camuel owaco bot Caulo ni, “Liŋ! Abititti gin ma Rwot otito bota tin dyewor.” Caulo ogamo ni, “Doŋ itit bota do.”

17Camuel owacci, “Kadi inen i waŋi kekeni ni itidi, pe in aye iloyo kaka ducu ma i Icrael? Rwot yam owiri ki moo me bedo kabaka pa jo Icrael. 18Rwot ocwali kun waco boti ni, ‘Cit icidyerra jo Amalek ma lubalo, ijwergi woko ducu liweŋ.’ 19Piŋo yam pe iworo dog Rwot? Piŋo icorre i kom gin ma giyako, ki timo gin ma nen marac i waŋ Rwot?” 20Caulo owaco bot Camuel ni, “Atyeko woro dog Rwot. Acito ka ma gicwala iye, akelo Agag kabaka me Amalek, dok ajwero jo Amalek woko ducu liweŋ. 21Ento dano gukwanyo romi ki twoni ki i kin gin ma giyako, gukwanyo gin mabecone ki i kin jami ma onoŋo gidyero me ajwera woko liweŋ, gutero wek gubed gitum bot Rwot Lubaŋani i Gilgal.” 22Camuel ogamo ni,

“Cwiny Rwot bedo yom i gitum awaŋa ki gityer-gu

ma rom ki kit ma cwinye bedo yom kwede ka giworo doge?

Nen, woro dog Rwot ber kato gitum,

winyo cik ber kato dwolo nyogi romi ma giwaŋo me gityer.

23Pien jemo rom ki bal me tyet,

tekwic rom ki bal me woro cal jogi.

Macalo in ikwero winyo lok pa Rwot,

en doŋ okwero in me bedo kabaka.”

24Caulo owaco bot Camuel ni, “Apoto i bal, pien akalo wi cik pa Rwot ki wi lokki, pien onoŋo alworo lwak, aworo doggi. 25Doŋ kombeddi alegi ni itima kica i kom balla, ci wadok kwedi wek aciwor Rwot.” 26Camuel ogamo dog Caulo ni, “Pe abidok kacel kwedi, pien ityeko kwero lok pa Rwot woko, ki Rwot bene otyeko kwero in me bedo kabaka pa jo Icrael.” 27-Ka Camuel olokke me cito woko, Caulo omako dog kanyine, ci oyec woko. 28Camuel owaco bote ni, “Rwot doŋ oyeco ker pa Icrael woko ki boti tin, doŋ otyeko miyone bot lawoti ma en ber makato in. 29Lubaŋa ma en Deyo pa Icrael pe bi loko goba, kadi ŋut bene; en pe dano ma kono oŋut-ti.” 30Caulo owacci, “Apoto i bal; ento tin koŋ iket deyo i koma i nyim ludoŋo pa lwakka ki i nyim jo Icrael, wek wadok kwedi, aciwor Rwot Lubaŋani.” 31Mumiyo Camuel odok cen olubo kor Caulo, ci Caulo oworo Rwot.

32Camuel dok owacci, “Kella Agag, kabaka pa jo Amalek, bota kany.” Agag ocako bi no bote ma tipo kome pe kun wacci, “Lit me to doŋ peke.” 33Camuel owacci, “Kit ma yam pala lucwanni omiyo mon gudoŋ laboŋo litinogi-ni, kit meno meni bene bibedo laboŋo latin i kin mon wadi.” Ka doŋ Camuel oŋido Agag woko matitino i nyim Rwot i Gilgal.

34Lacen Camuel odok i Rama; Caulo ocito mere i ode i Gibea pa Caulo. 35Camuel pe omedo ki neno Caulo o wa i nino me tone, ento Camuel obedo ka kumo pi Caulo. Ci Rwot oŋut pi keto Caulo me bedo kabaka pa jo Icrael.

Baibul 1985

© 1985 The Bible Society of Uganda

More Info | Version Index