Search form

1 Camuel 17

Goliac otaro jo Icrael

1I kare meno jo Piliciti gucoko monygi kacel pi lweny. Gucokke i Coko i lobo pa Juda, ci gugony i kin Coko ki Ajeka, i Epec-damim. 2Caulo ki jo Icrael gucokke kacel, gugony i nota Ela, ci gurye ki tyen me lweny i kom jo Piliciti. 3Lupiliciti gucuŋ i wi got tuŋcel, ki Luicrael gucuŋ i wi got tuŋ mukene, kun nota tye i kingi. 4Ci twon oita lweny mo obino oa ki i gony pa Lupiliciti ma nyiŋe Goliac, dano me Gat. Borre kato ka futi aboŋwen. 5Oruko otaŋ mola i wiye, dok oruko koti mola lagen kore; pek pa koti molane onoŋo romo ratili miya acel ki pyerabic. 6Oruko mola mukwako tyene, kun okacce ki toŋ alwiro mola wi gwoke. 7Bol toŋŋe mito rom ki rii yat me cweyo boŋo; lak toŋŋe pekke romo ratili apar wiye aboŋwen, kun lamak kwotte otelo nyime. 8En ocuŋ ci odaŋŋe matek i wi mony pa jo Icrael ma gurye i tyen ni, “Kaa wubino ma wurye i tyen pi lweny piŋo? Pe an Lapiliciti? Pe wun lutic pa Caulo bo? Wuyer danowu mo acel, wek en olor piny obin bota. 9Ka en twero lweny kweda ce oneka, ci wan wabibedo luticwu; ento ka an aye aloye, ce aneke, ci wun wubibedo luticwa pi tiyo tic botwa.” 10Lapiliciti meno dok owacci, “Ataro mony pa jo Icrael ma tin gurye i tyengi! Wumiya dano mo wek walweny kwede kacel.” 11Ka Caulo ki jo Icrael ducu guwinyo lwak lok pa Lapiliciti-nu, ci cwinygi oballe woko, gubedo ki lworo madwoŋ twatwal.

Daudi obino i gony pa lumony

12Daudi obedo wod pa dano mo me Eprata ma gaŋŋe Beterekem i lobo Juda; nyiŋe Yece, yam tye ki awobene aboro. I kare pa Caulo, onoŋo en doŋ oti woko, mwaka me ditte doŋ dwoŋ. 13Onoŋo awobe pa Yece adek muteggine gulubo kor Caulo i mony, Nyiŋ awobene adek ma gucito i mony-nyi gin ene: Eliab ma latin kayo, ki ma olube Abinadab, ki me adekke Cama. 14Daudi aye matidine; jo muteggi adek-ki gulubo kor Caulo, 15ento Daudi obedo ka wirre bot Caulo, ka dok paco ka kwayo romi pa wonne i Beterekem. 16Lapiliciti obedo ka bino anyim ci cuŋ kunnu odiko ki otyeno pi nino pyeraŋwen.

17Yece owaco bot wode Daudi ni, “Ber iter nyig bel ma gicelo acela-ni bot omegini, ma romo agwata adek, kacel ki mugati man apar, itiŋ itergi oyot bot omegini ma i gony ca. 18Dok iter cak mutwo muluŋŋe-ni apar bot laditgi me mony ma loyo dano alip, Nen kit ma omegini tye kwede, ci imak gin mo idwog kwede ki botgi.”

19I kare-nu onoŋo Caulo ki omegi Daudi wa ki jo Icrael ducu gubedo i nota Ela, kun gilwenyo ki jo Piliciti. 20Daudi oa odiko con oweko rorru bot lagwokone, ci ocako wot otero cam ma giyubo kit macalo Yece ocike kwede oo i gony ma onoŋo mony doŋ cito ka rye i tyen, kun giwayo me lweny. 21Ci jo Icrael ki jo Piliciti gurwayo cok ka romo; mony okemme ki mony wadi. 22Daudi oweko jami i ciŋ lagwok jami, ocito i ka ryeyo i mony, ci omoto omegine ducu. 23Ka pud tye ka lok kwedgi, ci twon oita mony Lapiliciti me Gat ma nyiŋe Goliac otuc ka maleŋ i nyim mony pa jo Piliciti ma guryeyo, kun loko lok ma rom ki macon ca, ci Daudi owinyo lokke.

24Jo Icrael ducu guriŋo laco meno woko ka gunene, ci gubedo ki lworo matek. 25Lwak jo Icrael guwacci, “Wuneno dano man ma obino-ni? Ada, en obino ka taro jo Icrael. Ka ŋat mo oneko, kabaka bimiye doko lalonyo madit, dok bimine nyare bene obed dakone, dok bimiyo jo me ot pa wonne pe doŋ giculo mucoro.” 26Daudi owaco bot jo ma gucuŋ ka ŋete ni, “Gin aŋo ma gibitimo ka dano mo oneko Lapiliciti-ni, okwanyo kwede cac woko ki i Icrael? Lapiliciti ma pe ŋeyo Lubaŋa-ni aŋa mono, ma myero obed ka taro Lubaŋa makwo-ni?” 27Lwak dok gudokke iye lakite acel-lu ni, “Gibitimo dano ma oneko-ni kit meno.”

28Ka Eliab omin Daudi maditte owinyo ka loko ki dano, kiniga omake i kome ci owacci, “Piŋo ibino? Iweko romiwa manok-ki i tim bot aŋa? Aŋeyo etteni ki keccwinyi; ibino kany ka neno lweny.” 29Daudi ogamo ni, “Atimo gin aŋo kombeddi? Pud aloko aloka keken.” 30Oloko ŋeye oneno ka mukene dok oloko lakite acel-lu, Dano ducu dok gudokke iye kit mukwoŋo-ni.

31Ka lok ma Daudi obedo ka lokoneni owinnye, gutito bot Caulo; ci Caulo ocwalo kwena olwoŋe. 32Daudi owaco bot Caulo ni “Pe iwek cwiny dano mo opoti pi Lapiliciti-nu, ladit; an abicito ka lweny kwede.” 33Caulo owaco bot Daudi ni, “In pe itwero cito ka lweny ki Lapiliciti man, pien in pud latin awobi.” 34Ento Daudi ogamo dog Caulo ni, “Ladit, abedo ka kwayo romi pa wora. Ka yam labwor mo obino, nyo ŋuu mukene, ce omako latm romo mo ki i kin romiwa, 35aryemo kore ci agoyo, alaro latin romo, akwanyo woko ki i doge. Ka ce otokke otiŋŋe i koma, apoto amako yer tike, agoyo aneko woko. 36Ladit, aneko labwor ki ŋuu mukene mapol. Lapilicitini ma pe ŋeyo Lubaŋa bibedo ma rom ki ŋat acel i kingi. Nen, en doŋ otaro nmony pa Lubaŋa makwo woko.” 37Daudi dok owacci, “Rwot yam olara ki i lwet ciŋ labwor ki ŋuu mukene: bilara bene ki i ciŋ Lapiliciti man.” Caulo owaco bot Daudi ni, “Citi. Rwot aye obed kwedi!”

38Caulo oruko Daudi ki jami lwennye, oruko otaŋ mola i wiye, ka oruke ki koti mola. 39Daudi otweyo pala lucwan pa Cauloi wi jami lwennye, otemo wot kwede me noŋo, pien pe oŋiyo wot kwede. Ci owaco bot Caulo ni “An pe atwero wot ki man ducu pien pe aŋiyo kwede.” Olunyogi woko, 40ka okwanyo odoone omako i ciŋe, ci oyero litino gweŋi abic muluŋŋe mapwot ki i laora kulu, opikogi i opiro kwatte, ma en kicaane; omako latandiyone i ciŋe, ka onyiko cok bot Lapiliciti.

Daudi oloyo Goliac

41Lapiliciti obino onyiko cok ki Daudi ki latin kwotte i nyime. 42Ka Lapiliciti oneno kom Daudi, ci otuki cayone woko, pien onoŋo pud latin awobi, kome kwar, dano ma neno mwonya. 43Owaco bot Daudi ni, “An adoko gwok bo, mumiyo ilima ki odoo-ni?” Ka ocako ceno Daudi ki nyiŋ lwak lubaŋane. 44Lapiliciti dok owaco bot Daudi ni, “Bin bota ci abimiyo riŋo komi bot winyo me polo ki bot ŋuu ma i tim.” 45Daudi bene owaco bot Lapiliciti ni, “In ibino bota ki pala lucwan ki toŋ ki toŋ alwiro, ento an abino boti i nyiŋ Rwot me mony, i nyiŋ Lubaŋa me mony pa jo Icrael ma ibedo ka tarone-ni. 46Tin Rwot bimiyo in i ciŋa, abireti woko piny, ci aŋolo wii woko; dok abimiyo kom lumony pa Lupiliciti ma guto tin bot winyo me polo ki bot ŋuu ma wi lobo, wek lobo ducu oneni, Lubaŋa tye i Icrael, 47dok wek lwak man guŋe ni, Rwot pe laro dano ki pala lucwan kadi ki toŋ, pien lweny Rwot aye ma loyo gire, ci en bimiyowu i ciŋwa.”

48Lapiliciti oa obino ka romo ki Daudi, ci Daudi oriŋo oyotoyot i nyim mony ma orye i tyen pi romo ki Lapiliciti. 49Orwako ciŋe i opirone, okwanyo lagwen, obayo, ocelo tur nyim Goliac. Lagwen odonyo woko i tur nyime ci opoto piny aryeba cwiny.

50-Kit meno Daudi oloyo Goliac ki lataŋdiyo ki lagwen, ocelo, oneko woko. Pala lucwan onoŋo pe i ciŋ Daudi. 51-Oriŋo, ocuŋ i wi Goliac, owoto pala lucwan pa Goliac ki i akurane, oneke kwede, ka oŋolo kwede wiye woko. Ka jo Piliciti guneno ni twon oita monygi oto, ci guriŋo woko. 52Lwak jo Icrael ki Juda gutwarre ki oduru gulubo kor jo Piliciti nio wa i Gat, ki i dog gaŋ me Ekron. Omiyo Lupiliciti ma ret omakogi gupoto woko i dog yo cakke ki i Caaraim o wa i Gat ki Ekron. 53Lacen jo Icrael gucako dwogo cen ki ka ryemo Lupiliciti, ci guyako gonygi. 54Daudi okwanyo wi Goliac okelo i Jerucalem, ento oketo jami lwennye I kemane.

Ginyuto Daudi bot Caulo

55Ka Caulo oneno ka Daudi cito ka lweny ki Goliac, ci openyo Abneri ma ladit wi monnye ni, “Abneri, latin awobi-ni wod pa aŋa?” Abneri ogamo doge ni, “Macalo in ikwo-ni, kabaka, pe aŋeyo.” 56Kabaka dok owacci, “Peny pi awobi-ni, ni en wod pa aŋa?” 57Ka Daudi odwogo ki ka neko Lapiliciti, ci Abneri okwanye otere i nyim Caulo, ki wi Goliac i ciŋe. 58Caulo openye ni, “In wod pa aŋa, latin awobi?” Daudi odok iye ni, “An a wod pa laticci Yece ma Labeterekem.”

Baibul 1985

© 1985 The Bible Society of Uganda

More Info | Version Index