Search form

1 Camuel 30

Daudi oloyo jo Amalek

1Daudi ki jone guo i Jiklag i nino me adekke, ci gunoŋo jo Amalek gumonyo Negeb ki Jiklag. Guloyo Jiklag woko, guwaŋo woko ki mac, 2dok guyako mon ducu ki jami ducu ma tye kunnu, wa dano ducu matino ki madito. Pe guneko dano mo, ento guterogi makwo, gucito kwedgi woko. 3Ka Daudi ki jone guo i gaŋ ci gunoŋo tye ka waŋ awaŋa, dok mongi ki awobegi ki anyiragi ducu giterogi woko, 4gucako wo ki koko, nio ka tek me koko otum woko. 5-Mon pa Daudi aryo-nu bene giterogi woko, Akinoam me Jejreel ki Abigail me Karmel, dako pa Lyel Nabal. 6Piny oloyo Daudi woko matek, pien jone bene gubedo ka lok pi cele woko ki got, pien cwinygi ducu obedo kec matek kun dano acel acel tamo pi awo bene ki anyirane. Ento Daudi olimo tekcwiny ki bot Rwot Lubaŋane.

7-Daudi owaco bot ajwaka Abiatar wod pa Akimelek ni, “Kella epod.” Ci okelo bot Daudi. 8Daudi openyo dog Rwot ni, “Aryem kor mony man? Abimakogi woko iyo?” Rwot odokke iye ni, “Ryem korgi, pien ibimakogi woko i yo ada, dok ibilaro jowu.”

9Daudi ocako wot ki jone miya abicel-li kacel kwede. Ka guo i kulu Becor, ci jo ma doŋ guol ma pe gitwero ŋolo kulu gudoŋ kenyo, gubedo iye. 10Ento Daudi omedde ka ryemo kor jo Amalek ki jone miya aŋwen kacel kwede, kun jo miya aryo ma komgi oloc, ma ŋolo kulu oloyogi gudoŋ cen.

11Gunoŋo Laejipt mo i dye bar ci gukele bot Daudi, Gucako mine mugati ocamo, ka gimiye pii amata omato, 12dok gimiye nucu poki oduro mutwone ki tuga olok aryo mutwone. Ka doŋ otyeko cam ci cwinye odwogo; pien onoŋo pe ocamo cam mo kadi wa pii bene pe omato pi nino adek dyeceŋ ki dyewor. 13Lacen Daudi ocako penye ni, “In kono i dano pa aŋa? la ki kwene?” En ogamo ni, “An wod jo Ejipt, latic pa La-amalek mo. Laditta otenya woko ata, pien onoŋo two aye omaka, ma ari kwede nino adek mukato-ni. 14Wan wamonyo Negeb pa jo Keret, ki pa jo Juda, ki Negeb pa jo Kaleb, ka dok wawaŋo Jiklag woko.” 15Daudi openye ni, “In ibitera bot mony meno?” Awobi-nu ogamo ni, “Kwoŋŋa kwoŋ ki nyiŋ Lubaŋa kun iwaco ni pe ibineka, dok pe ibidwoka i ciŋ laditta, ci abiteri bot monygi.”

16Otero Daudi kunnu, ci onoŋogi guket woko ata i kabedo meno ducu kun gicamo, gimatte ki myel-gu, ma cwinygi yom pi lwak jami ma giyako madwoŋ ki i lobo pa jo Pilciti ki i lobo Juda. 17Daudi opoto i komgi kwarpiny, olwenyo kwedgi nio wa otyeno. Dano mo i komgi pe obwot makwo, kono nyo awobe miya aŋwen ma guito wi kinagani, guriŋo kwede woko. 18Daudi oyako gin ducu ma jo Amalek onoŋo guyako, olaro bene monne aryo ducu. 19Gin mo pe orwenyo kadi wa gin matidi nyo maditte; awobe ducu wa anyira ducu ki jami ma giyako ducu, ki gin mo keken ma jo-nu gutero, Daudi odwokogi ducu cen. 20Omayo wa dyegi ki romi ki dyaŋi ducu, ci jone guleko lim meno ducu i nyimgi kun giwacci, “Man aye lim ma Daudi oyako.”

21Ka Daudi odwogo bot jo miya aryo-ni ma yam komgi oloc woko ma pe doŋ gitwero lubo kore, ma onoŋo giwekogi i dog kulu Becor-ni, ci jo-nu gukato ka jolo Daudi ki lwak ma gucito kwede-ni. Ka Daudi onyiko cok, en bene omotogi. 22Ci jo maraco ducu ki lutim aranyi ma i kin lwak ma gucito ki Daudi guwacci, “Jo-ni pe gucito kwedwa, pienno wan pe wabimiyogi gin mo i kom jami ma wayako wadwogo kwede-ni. Wek dano acel acel oter dakone ki litinone ci guciti.” 23Ento Daudi ogamo ni, “Pe wubitimo kit meno, utmegina, ki gin ma Rwot omiyo botwa. En aye obedo ka gwokowa, ci otiŋo mony ma gubino ka monyowa, omiyogi i ciŋwa. 24Aŋa ma twero ye lokwu i kom lok man? Kit ma gipoko ki jami bot dano ma ocito i mony-nyi, gibipoko bot dano mudoŋ ka gwoko jami bene kit meno, Gibipoko bot dano ducu ma rom.” 25Meno odoko cik matwal cakke i kare meno, ma jo Icrael gibedo ka lubo nio wa onyoo.

26Ka Daudi odwogo i Jiklag, ci ocwalo dul jami ma giyako-ni bot lureme ma gin ludoŋo pa jo Juda kun wacci, “Motwu ene ma wayako ki bot lumerok pa Rwot.” 27Ocwalo jami pi jo ma i Betel, ki i Ramot ma i Negeb, i Jatir, 28i Aroer, i Cipmot, i Ectemoa, 29ki i Rakal, bot jo ma bedo i gaŋi pa jo Jeramel ki pa jo Keni, 30bot jo ma i Korma, Boracan, Atak. 31Kebron ki i lwak kabedo ducu ma yam Daudi ki jone guwok ki iye.

Baibul 1985

© 1985 The Bible Society of Uganda

More Info | Version Index