Search form

2 Tekwaro 14

Loc pa Aca

(1 Luker 15.9-12)

1Abija oywe kacel ki kwarine, ci giyike i gaŋ kal pa Daudi; wode Aca aye oleyo ka tyene. I karene lobo oywe mot ki kuc pi mwaka apar. 2Aca yam obedo ka tiyo gin maber dok ma nen atir i wan Rwot Lubaŋane. 3En okwanyo keno tyer ki waŋ jogi ma i wi godi pa lurok woko, omuko wir jogigi bene, ka dok otoŋo yadi ma gicomo pi woro lok ma dako ma gilwoŋo Acera ducu oreto woko piny, 4ka dok ociko jo Juda ni gubin bot Rwot, ma Lubaŋa pa kwarigi, dok gugwok cikke ki gin ma en ociko. 5En bene yam omuko waŋ jogi ma i gaŋi ducu ma i Juda, okwanyo keno tyer me waŋo odok eceta ducu, Ker okwe mot i karene. 6Ogero gaŋi ma girumo ki cel gogo i Juda, pien lobo onoŋo okwe mot. Pe obedo ki lweny i lwak mwaka-nu ducu, pien Rwot omiyo kuc. 7En owaco bot jo Juda ni, “Wageru gaŋi magi, warumogi woko ki cel ma wagero i kome odi matego ma ocudo malo, waket bene doggola iye ma gicego ki rii; lobo doŋ pud mewa, pien wabedo ka bino bot Rwot Lubaŋawa, wabedo ka bino bote ci en omiyowa kuc i kabedo ducu.” Gugedo dok gubedo ki lonyo madwoŋ. 8Aca obedo ki lumony ma gua ki i Juda ma giromo alip miya adek, ma gitye ki kwodi ki toŋi, ki lumony ma gua ki i Benjamin ma giromo alip miya aryo ki pyeraboro ma gutiŋo kwodi, ma gin bene lucel atum; gin ducu twoni oteka lweny ma gitego.

9Jera ma Laetiopia obino ka lweny i komgi ki mony ma romo jo milion acel ki gadigadi miya adek; gubino guo cok ki Mareca. 10Ci Aca ocito ka rwatte kwede, kun monygi oryeyo i nota Jepata i Mareca. 11Aca okok bot Rwot Lubaŋane ni, “Ai Rwot, pe tye lakony mo macalo in, ma koriyo jo magoro ka lweny i kom jo matego, Konywa, ai Rwot Lubaŋawa, pien wageno in, wabino ka lweny i kom lwak man madwoŋ-ŋi pi nyiŋi. Ai Rwot, in aye Lubaŋawa; pe iye dano mo oloyi.” 12Kit meno omiyo Rwot oryemo jo Etiopia woko ki i nyim Aca ki i nyim jo Juda, omiyo jo Etiopia guriŋo woko. 13Aca ki monnye guryemo korgi nio wa i Gerar, ci guneko jo Etiopia matek ma dano mo acel pe obwot makwo; pien guket woko ata ki i nyim Rwot ki monnye. Jo Juda gutiŋo lwak jami madwoŋ ma guyako gucito kwede. 14Guturo gaŋi ducu ma gurumo Gerar, pien Rwot omiyo lworo opoto i komgi. Guyako gaŋi ducu, pien onoŋo jami me ayaka dwoŋ i igi twatwal. 15Guputo kema pa jo ma yam wegi dyaŋi, guyako romi madwoŋ twatwal ki kinaga-gu, Gudok kwede cen i Jerucalem.

Baibul 1985

© 1985 The Bible Society of Uganda

More Info | Version Index