Search form

2 Tekwaro 3

Solomon ogero ot pa Lubaŋa

(1 Luker 6.1-38)

1-Solomon ocako gero ot pa Rwot i Jerucalem i wi got me Moria, ka ma yam Rwot onyutte iye bot wonne Daudi, i kabedo ma yam Daudi oyero, i kom laro moyo pa Oman ma jo Jebuc. 2En ocako gerone i dwe me aryo i mwaka me aŋwen me locce. 3Solomon opimo ot pa Lubaŋa ma en omito gerone-ni kit man: borre romo futi pyeraboŋwen, ki lacce futi pyeradek. 4Ki kicika ma i doggola me donyo ma i nyim kicika me ot lacce romo futi pyeradek, ma roni ki lac me ot maditte; borre tuŋ malo roma futi miya acel ki pyeraboro. Omwono iye woko ki jabu ma giliyo maber. 5Solomon oguro kor ot me kicika maditte ki bao ciprec, ci omwono kom bao woko ki jabu maberre, ma gigoro iye cal yadi otit ki nyor. 6Odeyo i ot mamwonya mada ki godi matino me wel ma gimwono i kom jabu. Jabune obedo jabu ma gikelo ki i Parvaim. 7Kit meno en omwono i ot ducu ki jabu, riine, rii doggolane, kor kicika ot ducu, ki doggolane; ka dok ogoro cal lukerubi i kor kicika ot.

8-En dok otiyo kabedo maleŋ makato ducu; borre futi pyeradek, ma rom ki lac me kicika ot maditte, ki lacce bene futi pyeradek. Omwono kome woko ki jabu maberre ma romo talanta miya abicel. 9Pek me mucumar me jabu ma giguro kwede obedo cekel pyerabic. En dok omwono kicika ma malo ducu ki jabu.

10-I kabedo maleŋ makato ducu en oketo iye cal lukerubi aryo me bao ma gipayo, ci omwono komgi woko ki jabu. 11Bwom lukerubi ducu borre muyarre romo futi pyeradek. Bwomgi acel acel borre romo futi abiro ki nucu. Wi bwom lakerubi acel ogudo kor ot, kun bwome tuŋcel ma borre futi abiro ki nucu, wiye ogudo wi bwom lakerubi wadi; 12ki bwom lakerubi man bwome acel ma borre futi abiro ki nucu-ni, wiye bene ogudo kicika ot, ki bwome mukene, ma romo futi abiro ki nucu-ni, wiye orwatte ki bwom lakerubi mukwoŋo-ni. 13Bwom cal lukerubi magi borgi muyarre oromo futi pyeradek. Gucuŋ ki tyengi ma gineno tuŋ kicika ot maditte. 14-Okwoyo boŋo kicika ki boŋo ma bulu ki ma lamar lamar ki makwarre, ki boŋo camanini maberre, ma odero ki callukerubi.

Tic pa Kuram i ot pa Lubaŋa

(1 Luker 7.5-51)

15En dok otiyo wir aryo ma bocogi romo futi pyerabic wiye aryo, ki lalukana i wigi ma bocogi romo futi abiro ki nucu, ci oketogi i nyim ot. 16Ka dok otiyo nyor macalo tiko ŋut, ci oketogi i wi wir aryo ducu, ka dok otimo cal nyig okwer pomegranat miya acel, ci oketogi i kom nyor. 17Ocibo wir magi i nyim ot pa Lubaŋa, acel yo tuŋ acuc, ki mukene yo tuŋ acam. Ocako nyiŋ ma yo tuŋ acuc-ci ni, Jakin, ki ma yo tuŋ acam-mi olwoŋo ni Boaj.

Baibul 1985

© 1985 The Bible Society of Uganda

More Info | Version Index