Search form

2 Tekwaro 30

Kwero nino madito me Kato (Paska)

1Kejekia ocwalo kwena bot jo Icrael ducu ki jo Juda, ka dok ocoyo waraga ocwalo bot jo Epraim ki Manace, ma tito botgi ni myero gubin i ot pa Rwot ma tye i Jerucalem, ka kwero nino madito me Kato (Paska) bot Lubaŋa pa Icrael. 2-Onoŋo kabaka ki rwodine kacel ki jo ducu ma obedo i cokke i Jerucalem gutyeko moko tam me kwero nino madito me Kato (Paska) i dwe me aryo; 3pien pe onoŋo gitwero kwero nino man i karene kikome pien ajwagi mapol onoŋo pud peya gulonnye kekengi, ki lwak bene pe gucokke i Jerucalem. 4Yub meno onen atir twatwal i waŋ kabaka kacel ki lwak ducu me gubedo i cokke. 5Ci giciko kwede pi yweko lok man wek orom i lobo Icrael ducu cakke ki i Beer-ceba nio kwede i Dan, kun gitito ni lwak myero gubin ka kwero nino madito me Kato (Paska) bot Rwot Lubaŋa pa Icrael, i Jerucalem; pien lwak mapol onoŋo pe gubedo ka kwero nino man kit macalo giciko kwede. 6Kit meno lukwena gutero waraga pa kabaka ki rwodine guwoto i lobo Icrael ki Juda ducu macalo kabaka ociko, kun giwaco ni, “Wun lwak me Icrael, wudwog cen bot Rwot, Lubaŋa pa Abraim, pa Icaka ki pa Icrael, wek en odwog bot jo mudoŋ i kinwu ma gubwot ki i cin luker me Aciria. 7Pe wubed macalo kwariwu ki utmegiwu, ma guŋayo waŋ Rwot Lubaŋa pa kwarigi-ni, pi meno Lubaŋa omiyo lobogi odoko obur kit macalo wutye ka nenone. 8Pe wubed ma ŋutwu nwaŋ kombeddi macalo yam kwariwu gubedo kwede, ento wun wumi kwowu bot Rwot, wubin i kabedo man maleŋ ma en otyeko lonyo matwal, kun wutiyo bot Rwot Lubaŋawu, wek kinigane mager-ri oa woko ki i komwu. 9Ka ce wulokke wudwogo cen bot Rwot, ci kica bimako jo ma guyako utmegiwu ki litinowu, ci gibiye gidwogo i lobo man. Myero wuŋe Rwot Lubaŋa en ber dok lakica, ma pe bi loko waŋe ki i komwu, ka wulokke wudwogo cen bote.”

10Kit meno lukwena gucako wot i gaŋ ki gaŋ ma i lobo Epraim ki Manace, dok gumedde ki wotgi nio wa i lobo Jebulun, ento dano gibedo ka nyerogi kun gicayogi dok ginalogi. 11Jo manok keken ma i lobo pa Acer, pa Manace ki Jebulun aye gumwolle kengi gubino i Jerucalem. 12Lubaŋa oketo ciŋe i kom jo Juda omiyo gubedo ki cwiny acel kun gitiyo gin ma kabaka ki rwodine onoŋo guciko pire ma gulubo lok pa Rwot.

13Lwak jo mapol gucokke kacel gubino i Jerucalem i cokke madit twatwal ka kwero nino madito me Mugati ma Tobi Pe Iye i dwe me aryo. 14Ka gucako tic ci gumuko keno tyer ducu ma yam tye i Jerucalem, ka dok gumuko keno tyer ducu ka ma giwaŋo iye odok eceta gutero gubolo woko i laora kulu Kidron. 15Ci guneko latin romo me Kato (Paska) i nino dwe apar wiye aŋwen me dwe me aryo. Man omiyo lewic omako ajwagi ki Lulevi, oweko gucako lonnye kengi, ka doŋ gukelo gitum awaŋa i ot pa Rwot. 16Gucako mako dog ticgi kit me kare ducu kun gilubo cik pa Moses ma en dano pa Lubaŋa, Ajwagi ticgi obedo me coro remo ma gigamo ki i ciŋ Lulevi. 17Onoŋo tye jo mapol i cokke ma pe gulonnye kengi; pi meno omiyo Lulevi guneko latin romo me Kato (Paska) pi ŋat acel acel ma pe olonnye, wek obed leŋ pi Rwot. 18Jo mapol i kom lwak onoŋo gua ki i lobo Epraim, Manace, Icakar ki Jebulun, ma pud peya gulonnye kengi, ento gubedo ka camo karama me Kato (Paska) i yo mu kene mapat ki ma giciko con. Kadi bed kumeno, Kejekia olego pigi, kun wacci, “In Rwot maber tim kica ki dano acel acel 19ma oketo cwinye ka bino bot Lubaŋa, Rwot Lubaŋa pa kwarine, kadi bed pe ogwoko cik me kabedo maleŋ ma mako lok kom lonnye.” 20Rwot owinyo dog Kejekia, ci ocaŋo lwak. 21Ci jo Icrael ducu ma onoŋo gitye i Jerucalem i kare meno gucako kwero nino madito me Mugati ma Tobi Pe Iye ki yomcwiny madwoŋ pi nino abiro; kun Lulevi ki ajwagi gubedo ka pako Rwot nino ki nino, ma giwero wer bot Rwot ki tekgi ducu. 22Kejekia oloko lok me cuko cwiny bot Lulevi ducu ma gunyuto diro maber i tic pa Rwot. Kit meno lwak gubedo ka cam me kwero nino madito pi nino abiro, kun gityero gityer lakwecwiny-gu, ma gimiyo pwoc bot Lubaŋa pa kwarigi.

23Lacen lwak ducu ma gucokke guye lawaŋacel me medde ki kwero nino madito pi nino abiro mukene; ci gumedde kwede kit meno ki yomcwiny madwoŋ pi nino abiro mukene. 24Onoŋo Kejekia kabaka me Juda omiyo twoni alip acel ki romi alip abiro bot lwak ma gucokke pi gityer. Ka dok rwodine bene gumiyo twoni alip acel ki romi alip apar bot lwak ma gucokke. Omiyo ajwagi mapol gulonnye kengi. 25Lwak jo Juda ducu ma i cokke, kacel ki ajwagi ki Lulevi, medo ki jo ma i cokke ma gua ki i lobo Icrael, kadi wa lubedo ma gua ki i lobo Icrael, kacel ki jo ma gin lubedo ma gibedo i Juda, ducu gubedo ki yomcwiny madit. 26Kit meno lwak gubedo ki yomcwiny madit i Jerucalem, pien nia wa i kare pa Solomon ma wod pa Daudi kabaka me Icrael onoŋo gin macalo man kulu pe onen i Jerucalem. 27Lacen ajwagi ki Lulevi gua malo gucuŋ ci gumiyo gum ki lwak, Lubaŋa owinyo dwangi, dok legagi bene oo bote i kabedone maleŋ ma i polo.

Baibul 1985

© 1985 The Bible Society of Uganda

More Info | Version Index