Search form

2 Luker 18

Loc pa Kejekia

(2 Tek 29.1-2)

1I mwaka me adek me loc pa Kocea wod pa Ela kabaka me Icrael, en aye Kejekia wod pa Akaj kabaka me Juda ocako iye loc. 2Ocamo ker ma mwaka me ditte pyeraryo wiye abic, ci obedo ka loc pi mwaka pyeraryo wiye aboŋwen ki i Jerucalem. Nyiŋ minne Abi, ma nya pa Jekaria. 3Kejekia obedo ka tiyo gin ma nen atir i wag Rwot kun lubo gin ducu ma yam kwarone Daudi otiyo. 4-Omuko lwak waŋ jogi ma i wi godi, oturo wir jogi-gu ducu, ka otoŋo yadi ma gicomo pi woro jok ma dako ma gilwogo Acera woko, ka dok oŋido twol mola ma yam Moses otiyo-ni, pien nio wa i kare meno onoŋo jo Icrael gubedo ka waŋo odok eceta pi worone. Yam gilwogo ni Nekucitan. 5En obedo ka geno Rwot, Lubaŋa me Icrael, mumiyo pe gatti mo onen ma rom ki en ki i kin luker me Juda ducu ma gulubo geye, kadi wa i kin luker ma gukwogo nyime bene. 6Omoko i kom Rwot matek; pe obwoto lubo kor Rwot, ento obedo ka lubo cik ducu ma yam Rwot ociko ki Moses. 7Rwot bene yam tye kwede; wa ka ma cito iye ducu, en noŋo iye gum. En ocako jemo woko i kom kabaka me Aciria, okwero bedo i te locce. 8Olwenyo ki jo Piliciti nto wa i Gaja ki lobo ma i ŋete; oloyogi i kabedogi ducu, cakke ki i kom lubele pa lukur-piny nio kwede wa i gaŋi ma girumo ki cel gogo.

Camaria opoto i cio jo Aciria

9I mwaka me aŋwen me loc pa Kejekia, ma en aye mwaka me abirone me loc pa Kocea wod pa Ela kabaka me Icrael, Calmanecer kabaka me Aciria obino ka lweny i kom Camaria ci orumo woko ki monnye. 10Oloyo ma onoŋo mwaka adek okato. I mwaka me abicel me loc pa Kejekia, ma en aye mwaka me aboŋwenne me loc pa Kocea kabaka me Icrael, en aye giloyo kwede gaŋ Camaria. 11Kabaka me Aciria otero jo Icrael i opii wa i Aciria, ci oketogi i Kala, ki i ŋet Kabor, ma en aye kulu ma i Gojan, ki i gaŋi pa jo Medi, 12pien gukwero woro dog Rwot Lubaŋagi, ento gukalo wi gicikkene, kacel ki lok ducu ma yam Moses ma latic pa Rwot ocikogi kwede; pe guwinyo kadi ki woro doge.

Cenakerib omonyo lobo Juda

(2 Tek 32.1-19; Ic 36.1-22)

13I mwaka me apar wiye aŋwen me loc pa kabaka Kejekia en aye Cenakerib kabaka me Aciria obino kwede ka lweny i kom gaŋi ducu me Juda ma girumogi ki cel gogo, ci omayogi ducu. 14Kejekia kabaka me Juda ocwalo kwena bot kabaka me Aciria wa i Lakic kun wacci, “An atimo bal; dok cen, wek lweny i koma obedi, gin ducu ma ibiŋolo i wi ya abiculone.” Kabaka me Aciria oŋolo i wi Kejekia kabaka me Juda wel me ryal ma romo talanta miya adek, ki jabu ma romo talanta pyeradek. 15Kejekia ocako miye ryal ducu ma onoŋo i ot pa Rwot, ki i ot kano lim ma i ot pa kabaka. 16I kare meno Kejekia omuko jabu woko ducu ma yam gimwono i kom kika me ot pa Rwot, ki jabu ma yam en Kejekia kabaka me Juda omwono kwede okar me doggola, ci otino omiyo bot kabaka me Aciria. 17Kabaka me Aciria ocwalo ludito wi monnye ma gilwoŋo Tartan, Larabcaric ki Larabcake ki mony madit ma gua ki Lakic gucito Jerucalem. Gucako mol gucito wa i Jerucalem. Ka guo kunnu, gucito gucuŋ i ŋet yo pii ma mol a ki i joro ma malo, i yo gudo ma woto i poto pa Lalwok-boŋo. 18Ka gulwoŋo kabaka, ci Eliakim wod pa Ilkia aye obino botgi, ma en aye ladit ma loyo jami ma i ot pa kabaka, kacel ki Cebna ma karan, ki Joa wod pa Acap, laco lok matimme.

19Larabcake owaco botgi ni. “Wuwac bot Kejekia ni, ‘Kabaka madit, kabaka me Aciria, owaco kuman ni, In ijeŋo genni i kom gin aŋo? 20In itamo ni lok dog noŋo bedo rom ki ryeko me lweny ki mony madit me loyo lweny? In kombeddi ijeŋŋe i kom aŋa, mumiyo ijemo woko i koma-ni? 21Nen, kombeddi iloko Ejipt obedo odoo ma ijeŋŋe i kome, kun en lagada ma otur otyer woko, ma bituco cin dano mo ma ojeŋŋe i kome. Meno kit ma Parao kabaka me Ejipt bedo ka timo kwede jo ducu ma gijeŋŋe i kome. 22Ento ka wuwacca ni, “Wan wajeŋŋe giwa i kom Rwot ma Lubaŋawa,” pe en aye waŋ jogine ma i wi godi, ki keno tyerre ma Kejekia doŋ omukogi woko, kun waco bot jo Jerucalem ki Juda ni, “Wubiworo Lubaŋa i nyim keno tyer man ma i Jerucalem”? 23Koŋ ijeŋ gin me camme ki laditta kabaka me Aciria! An abimiyi aguragura alip aryo, ka ce in ki tuŋ boti bene itwero noŋo lubed i wigi. 24In itwero dwoko ladit me lweny acel mo cen ki i kin lutic pa laditta matinone niŋniŋ ka ce ijeŋŋe i kom Ejipt pi noŋo gadigadi lweny ki wegi aguragura? 25Dok bene itamo ni an abino ka lweny i kom kabedo man wek atyek woko, laboŋo twero pa Rwot? Wai Rwot aye ma owacca ni, Cit icilweny i kom lobo man ityek woko yo!’ ”

26Cutcut Eliakim wod pa Ilkia, ki Cebna ki Joa guwaco bot Larabcake ni, “Walegi ilok ki wan luticci i leb Aram, pien wawinyo. Pe ibed ka lok kwedwa i leb Juda ma lwak ma gitye i wi cel bene giwinyo.” 27Ento Larabcake ogamo doggi ni, “Itamo ni rwoda ocwala ka loko lok magi bot laditwu ki botwu keken bo, pe bot lwak ma gubedo i wi cel-li bene, ma gin kacel ki wun gukemo can me camo cetgi kengi ki mato lacgi kengi?”

28Larabcake ocun ocako daŋŋe ki dwan maloŋo i leb Juda ni, “Wuwiny lok pa kabaka madit, kabaka me Aciria! 29Kabaka owaco kuman ni, ‘Pe wuwek Kejekia obed ka bwolowu, pien en pe bitwero larowu ki i ciŋa. 30Pe wuwek Kejekia omi wujeŋŋe i kom Rwot kun wuwacci, Rwot aye bilarowa, gaŋ man pe gibimiyo i ciŋ kabaka me Aciria.’ 31Pe wubed ka winyo lok pa Kejekia; pien man aye lok ma kabaka me Aciria owaco, ni meno, ‘Wuyub lok me kuc kweda, ci wukatti woko bota; kit meno ŋat acel acel bicamo nyig olok ma i potone, ŋat acel acel bicamo nyig odurone, ki ŋat acel acel bimato pii ma i taŋine kikome; 32nio ka abiterowu wa i lobo ma rom ki mewu-ni, lobo ma ceko kai ki koŋo vino, lobo ma miyowu kwon ma tye iye poto olok-gu, lobo ma moo jeituni ki moo kic dwoŋ iye, wek wubed ma komwu yot, wek pe wubed ka to atoya, Pe wubed ka winyo lok pa Kejekia ma tye ka bwolowu kwede marac kun wacci, Rwot bilarowa. 33Tye lubaŋa pa lurok mo ma yam olaro lobone ki i ciŋ kabaka me Aciria? 34Lubaŋa pa jo Kamat ki Arpad gitye kwene kaa? Lubaŋa pa jo Ceparvaim, nyo Kena ki iya gitye kwene? Gin gularo Camaria ki i ciŋa bo? 35Lubaŋa me lobo mene ki i kin lubaŋa ducu ma gitye ki lobogi, ma yam koŋ olaro lobone ki i ciŋa mono, mumiyo wutamo ni Rwot bilaro Jerucalem ki i ciŋa-ni?’ ”

36Ento lwak ducu guliŋ aliŋa, pe gudokke iye lok mo kadi ki acel, pien onoŋo kabaka ociko ni, “Pe wubigamo doge.” 37Eliakim wod pa Ilkia ma en aye ladit ma loyo jami ma i ot pa kabaka, kacel ki Cebna ma karan, ki Joa wod pa Acap ma laco lok matimme guyeco boŋŋigi, gucito kwede wa bot Kejekia gutitte lok ducu ma Rabcake owaco.

Baibul 1985

© 1985 The Bible Society of Uganda

More Info | Version Index