Search form

Amoc 8

Lok me aŋwenne ma Lubaŋa onyuto

1Rwot Lubaŋa onyutta man: nen, aduku ma tye iye nyig yadi me acama ma gicek i agikki mwaka. 2Ci owacca ni, “Amoc, ineno gin aŋo?” Agamo ni, “Aduku ma tye iye nyig yadi me acama ma gicek i agikki mwaka.” Rwot dok owacca ni,

“Agikki doŋ oo i kom jona jo Icrael;

pe dok abikato ki ka ŋetgi.

3Wer me ot pa Lubaŋa bidoko me koko i nino meno.

Kom jo muto gibibedo mapol;

gibibologi woko laliŋ i kabedo ducu.”

Man lok pa Rwot Lubaŋa kikome.

Can doŋ cok poto i lobo Icrael

4Wuwiny man, wun ma wunyono jo ma piny obwoyogi,

ki ma wumito tyeko lucan woko ki i lobo,

5ma wuwacci, “Kwero por dwe bitum awene,

wek wacat bel?

Cabit bitum awene,

wek wakel ŋanowa me acata?”

Dok ni,

“Wek wacat belwa ki agwata matidi,

wapim limgi ki cekel mapek,

kun wabumu dano ki mijan ma pe pimo kakare,

6wek wawil lucan ki ciliŋ,

wacat jo ma piny obwoyogi pi war tyen,

wacatu wa ki cuŋ bel bene.”

7Rwot otyeko kwoŋo kwoŋ ki nyiŋ gin ma jo pa Yakobo giwakke iye ni,

“Wiya pe biwil i kom timgi mo acel ma gitimo.

8Lobo pe biyeŋŋe pi lok man,

kun ŋat acel acel ma obedo iye koko can?

Lobo ducu biille malo macalo kulu Nail ka opoŋ,

biyeŋŋe dok piny calo kulu Nail ma i Ejipt.”

9Man lok pa Rwot Lubaŋa kikome, ni,

“I nino meno abimiyo Ceŋ poto cwiny dyeceŋ,

abicido lobo woko i kare ma cen ryeny.

10Abiloko ninowu madito doko nino me kwero cola,

ki werwu ducu doko me kumo.

Abimiyo jo ducu tweyo boŋo cola i pyergi,

wi dano ducu gibilyelo woko;

abimiyo bedo calo koko pi latin ma dano onywalo acel keken,

agikkine bibedo nino me cwercwiny madwoŋ.”

11Man lok pa Rwot Lubaŋa kikome, ci,

“Nen, kare obebino ma abicwalo kec i lobo-ni,

pe kec kwon, kadi ki orwo pii, ento kec me winyo lok pa Rwot.

12Dano bimal ata nia ki i nam man

nio wa i nam mukene,

ki nia ki tuŋ acam nio tuŋ wokceŋ;

gibiriŋo ata pi yenyo lok pa Rwot, ento pe gibinoŋo.

13“I nino meno anyira ma gibeco ki litino awobe

komgi biloc woko pi orwo pii.

14Jo meno ma gikwoŋo kwon ki nyiŋ Acima me Camaria,

ma giwaco ni, ‘Macalo lubaŋani tye kwo, in Dan,’

dok ni, ‘Macalo yo Beer-ceba tye makwo-ni,’

gibipoto piny pe dok gibimedo ki a malo.”

Baibul 1985

© 1985 The Bible Society of Uganda

More Info | Version Index