Search form

Nwoyo Cik 19

Gaŋi me laro lunek dano

(Wel 35.9-28; Yoc 20.1-9)

1“I kare ma Rwot Lubaŋawu doŋ otyeko lurok woko ma en bimiyo lobogi botwu-ni, ma doŋ wucamo lobogi ci wubedo i gaŋigi ki i odigi ducu, 2ci wubipoko gaŋi adek woko pat i lobo ma Rwot Lubaŋa doŋ omiyowu me bedo mewu. 3Wubiyubo yo gudo dok wubipoko dye lobo ma Rwot Lubaŋawu bimiyowu i dul adek wek okony ŋat ma oneko dano me riŋo iye wek olar iye kome.

4“Man aye lok me konyo kom lanek dano. Ka dano mo pe oneko lawote akaka, ma yam mone mo pe i kingi, myero en oriŋ kunnu wek olar kome. 5Labolle ka dano mo ocito i buŋa ki lawote mo ka toŋo yen, ce otiŋo latoŋ me toŋo ki yen me areta piny ci latoŋ oput woko ki i purre, ogoyo lawote oneko woko, en myero oriŋ olar kome i gaŋ mo acel ma i kin gaŋi meno. 6Ka pe kumeno, miyo lacul kwor remo ka kinigane olyetti biryemo kor lanek, mako woko iyo, pien noŋo piny bor, ci cobo neko woko. Ento dano macalo meno pe romo aneka, pien pe onoŋo mone mo tye i kingi i kare macon, 7en gin mumiyo acikowu pi poko gaŋi adek pat. 8I kare ma Rwot Lubaŋawu oyabo waŋ lobowu omedo malac kit ma yam okwoŋo kwede bot kwarowu, ma doŋ ominiwu lobo ducu ma yam ociko ni ebimiyo bot kwarowu, 9dok ka ce wubigwoko cik man ducu ma acikowu kwede tin-ni, ni wumar Rwot Lubaŋawu, wulub yone ducu i kare ducu, ci dok wubimedo gaŋi mukene adek i kom maca. 10Kit meno pe gibionyo remo pa dano mo ma pe ki bal i lobo ma Rwot Lubaŋawu bimiyowu me aleyawu, ci miyo alii me to pe bedo i wiwu.

11“Ento ka dano mo iye dag lawote, ce obuto okure i yo, ci olwenyo i kome, ocobo omedo ki neko woko, ka laco meno oriŋo olaro i gaŋ mo i kin gaŋ adek-ki, 12ci ludoŋo me tuŋ pa lanek-ki gibicwalo dano giome ki kunnu, gimiye i ciŋ lacul kwor remo, wek gineke woko. 13Kica pe bimakowu i kome, ento myero wulwok alii me to pa dano ma pe ki bal woko ki i Icrael kit meno, wek ariya mo obed pe i nyimwu.

Waŋ lobo ma ludoŋo gupoko

14-“Pe ibikobo got ma poko waŋ lobo pa lawoti ma yam ludoŋo gutyeko pokone ki i lobo ma ibileyo bot kwarowu i lobo ma Rwot Lubaŋawu bimiyowu me bedo mewu.

Cik ma mako lucaden

15-“Lacaden acel pe miyo pido loyo dano mo pi kit bal mo nyo kit tim marac mo ma onoŋo otimo; ento kop biloyo dano pi lok pa lucaden aryo nyo adek. 16Ka ce lacaden ma lagoba odoto dano mo ni otimo bal, 17ci gin lupido aryo ducu gibicito i nyim Rwot, ki i nyim ajwagi pa Lubaŋa ki luŋolkop ma gitye i dog tic i kare meno. 18Luŋolkop gibipenyo lokke mot. Ka ce lacaden ma lagoba odoto ominne ki adot me atoŋa 19ci gibiketo can i kome ma rom ki can ma nene en mito ni giket i kom ominne-ni: kit meno miyo wubijwero tim marac woko ki i kinwu. 20Jo mukene gibiwinyone, miyo gilworo, miyo ŋat mo pe dok bitimo tim marac macalo meno. 21-Kica pe bimakowu i kome; kwo gibiculo ki kwo, waŋ ki waŋ, lak ki lak, bad ki bad, tyen ki tyen.

Baibul 1985

© 1985 The Bible Society of Uganda

More Info | Version Index