Search form

Nwoyo Cik 30

Lubaŋa bidwoko gum pa jo Icrael botgi ka gudwogo bote

1“Ka gin man ducu doŋ opoto i komwu, gum ki lok me ceno dano ma atyeko ketone i nyimwu-ni, ka wupo pire ki i kin rok ducu ka ma Rwot Lubaŋawu yam ocwalowu iye-ni 2ce wudwogo cen bot Rwot Lubaŋawu, wun ki likwayowu, ci wucako woro doge i lok ducu ma acikowu kwede tin-ni ki cwinywu ducu ki tipowu ducu, 3ci Rwot Lubaŋawu bidwoko gum mewu botwu; en dok bicokowu woko ki i kin rok ducu ka ma yam okeyowu iye-ni. 4Kadi wa jowu ma obayogi ka mabor wa i agikki te polo, Rwot Lubaŋawu bicokogi woko ki kunnu; en biomowu woko ki kunnu. 5Rwot Lubaŋawu bikelowu i lobo ma yam kwarowu gucamo-ni wek wun bene wucam obed mewu. Lubaŋa-bimiyo wubedo ki lwak lonyo mabeco, kun wunya mapol makato kwarowu. 6Rwot Lubaŋawu bimiyo wubedo jo mulirre i cwinywu, wun ki likwayowu bene, wek wumar Rwot Lubaŋawu ki cwinywu ducu ki tipowu ducu wek wubed makwo. 7Rwot Lubaŋawu biketo lok magi me ceno dano I kom lumonewu ki lumerokwu ma guunowu, 8ci wun dok wubiworo dog Rwot kun wugwoko cikke ducu ma acikowu kwede tin-ni. 9Rwot Lubaŋawu bimiyo wubedo ki jami mabeco madwoŋ mada ma wubinoŋo pi ticwu; wubibedo ki litino mapol, limwu makwo binya mapol bene, potowu biceko cam mabup, pien cwiny Rwot dok bibedo yom pi miyowu lonyo ki jami mabeco, kit ma yam cwinye obedo yom i kom kwarowu-ni. 10Ka ce wubiworo dog Rwot Lubaŋawu, ma wugwoko cikke ki gin ma ociko ducu ma gicoyo i buk man me cik, ka ce wudwogo cen bot Rwot Lubaŋawu ki cwinywu ducu ki tipowu ducu, ci Lubaŋa bimiyowu gum man.

11“Pien cik ma acikowu kwede tin-ni pe tek twatwal ma cobone loyowu, dok pe tye ka mabor kwedwu. 12-Pe tye wa i polo, ma kono omiyo wuwacci, ‘Aŋa ma bicito ka omone botwa ki malo i polo kuca, wek okel botwa ka wek wawiny lokke walubi?’ 13Dok pe tye wa loka nam, ma kono omiyo wuwacci, ‘Aŋa ma bicito piwa wa loka nam kuca, wek okel botwa ka wek wawiny lokke walubi?’ 14Ento lokke tye cok kwedwu; wumako doŋ i cwinywu, ci wubedo ka tucone ki dogwu, miyo wutwero lubone.

15“Nen maber ni, tin atyeko keto i nyimwu kwo ki lonyo ki to ki keckom. 16Ka ce wuworo cik pa Rwot Lubaŋawu ma ocikowu kwede tin-ni, wek wumar Rwot Lubaŋawu, ma wulubo yone kun wugwoko cikke ki gin ma en ociko nyo oŋolo ducu, ci wubikwo dok wubinya mapol, dok Rwot Lubaŋawu bimiyowu gum i lobo ma wubidonyo iye ka camone-ni. 17Ento ka ce cwinywu odok cen ka ryebbe i nyim lubaŋa mukene ki tiyo botgi ma wukwero winyo dog Rwot, 18atuco atir botwu tin ni wubito wutum woko; pe wubiri pi kare malac i lobo ma wubecito iye loka Jordan ka camone-ni. 19Alwoŋo polo ki lobo me bedo lucaden i komwu tin, ni, atyeko keto i nyimwu kwo ki to, gum ki lok me ceno dano; mumiyo wuyer kwo wek wun ki likwayowu wubed makwo, 20-ma kun wumaro Rwot Lubaŋawu, wuworo doge ci wumoko i kome matek; en aye kelo kwo botwu, ci miyo wuri pi kare malac, wek wubed i lobo ma yam Rwot okwoŋo pire bot kwarowu Abraim, Icaka ki Yakobo ni ebimiyogi.”

Baibul 1985

© 1985 The Bible Society of Uganda

More Info | Version Index