Search form

Nia 10

Gemo me bonyo

1Rwot dok owaco bot Moses ni, “Cit bot Parao; pien ajiŋo cwinye odoko nwaŋ, ki cwiny luticce, wek anyut lwak lanyut mera man i kingi, 2wek in itit i it litinoni ki likwayi kit macalo abedo ka tuko ki jo Ejipt kit ma iya mito-ni ki kit lanyut ma atiyo i kingi; wek wun wuŋe ni an a Rwot.”

3Kit meno Moses ki Aron gucito gudonyo bot Parao, guwacce ni, “Rwot Lubaŋa pa jo Ibru owaco kuman ni, ‘In ibikwero bedo ki mwolo i nyima pi kare ma rom mene? Wek jona guciti, wek guti bota. 4Pien ka ikwero ni jona pe guciti, ci nen, diki abikelo lwak bonyo i loboni, 5giumo lobo woko lipuk, pe tye ŋatti mo ma bineno lobo; ci gibicamo gin ma pee oŋoyo botwu, ka dok gibicamo yadiwu ducu ma doŋo i poto. 6Gibipono i odini ki i odi pa luticci ducu ki i odi pa jo Ejipt ducu; bibedo gin ma yam wegiwu ki kwariwu pe guneno nia i nino na giketogi wi lobo nio wa i nino man.’ ” Ka olokke ci okato woko ki bot Parao.

7Ci Lutic pa Parao guwacce ni, “Laco man bibedo owic botwa pi kare ma rom mene? Wek jo-nu guciti, wek guti bot Rwot Lubaŋagi: in peya iŋeyo ni Ejipt oballe woko.” 8Omiyo gidwoko Moses ki Aron bot Parao; ci owaco botgi ni, “Doŋ wucit, wuti bot Rwot Lubaŋawu; ento jo mene ma gibicito?” 9Ci Moses ogamo ni, “Wan wabicito ki litinowa, ki luditowa wabicito ki awobewa ki anyirawa; wabigwarre ki lwak limwa ducu matino ki madito, pien myero wakwer nino madit bot Rwot.” 10Ci owaco botgi ni, “Rwot obed kwedwu ka abiweko wun ki litinowu wucito! Nen wun iwu kiruŋgula, wutye ki kop i iwu. 11Pe twerre, co ma i kinwu aye gucit ka miyo woro bot Rwot; pien meno aye gin ma cwinywu pyette iye.” Ci giryemogi woko ki i nyim Parao.

12Rwot dok owaco bot Moses ni, “Rye ciŋi i wi lobo Ejipt wek bonyo obin obed i lobo Ejipt, ocam gin mutwi i lobo ducu ma yam pee oŋoyo.” 13Kit meno Moses otiŋo odoone i wi lobo Ejipt, ci Rwot ocwalo yamo oa tuŋ wokceŋ okodo i lobo dyeceŋ meno ducu ki i dyewor benebene; ka oo odiko ci yamo mua wokceŋ okelo bonyo. 14-Ci bonyo ocorre i lobo Ejipt ducu, ci obuto, ori i lobo ducu me Ejipt, lwak bonyo mumukke madwoŋ ma yam pe tye, ma dok pe binen. 15Pien oumo lobo woko lipuk, ma lobo ocido woko licuc, ci gucamo gin mutwi ducu ma i lobo ki nyig yadi ducu ma yam pee oŋoyo; gin madyak mo pe odoŋ, kadi yat, kadi gin mutwi ma i poto ma i lobo Ejipt ducu. 16Ka Parao dok olwoŋo Moses ki Aron pi oyoto, owaco ni, “Atyeko timo bal i kom Rwot Lubaŋawu, ki i komwu. 17Mumiyo tin wutima kica, man doŋ alegowu kicel enni, dok wuleg Rwot Lubaŋawu wek okwany to man woko i koma.” 18Ci Moses okato woko ki bot Parao, olego Rwot. 19Rwot omiyo yamo okodo matek nia ki tuŋ potoceŋ, otiŋo bonyo ocorogi woko wa i Nam Makwar; bonyo mo acel pe odon i lobo Ejipt. 20Ento Rwot ojiŋo cwiny Parao odoko nwaŋ, pe oweko jo Icrael gucito.

Gemo me colpiny

21Rwot dok owaco bot Moses ni, “Rye ciŋi malo tuŋ polo, wek piny ocid woko Licuc i lobo Ejipt, piny ma ocido woko ma dano winyo wa i kome.” 22-Ci Moses oryeyo ciŋe malo tuŋ polo, ci piny ocido woko matek licuc ma oromo lobo Ejipt pi nino adek; 23pe ginenne kekengi, pe ŋatti mo a malo ki i kabedone pi nino adek; ento ka ma jo Icrael bedo iye onoŋo piny leŋ mere. 24Ka Parao olwoŋo Moses, ci owacce ni, “Cit wuti bot Rwot; litinowu bene myero gucit kwedwu; ento wuwek limwu matino ki madito gudoŋ i ŋewu.” 25Ento Moses ogamo ni, “In bene myero imiwa gitum ki gityer me awaŋa, wek watyer bot Rwot Lubaŋawa. 26Limwa makwo myero gin bene gucit kwedwa; pe oboŋ tyen mo bidoŋ i ŋewa, pien myero wakwany mogo i kingi me miyo ki woro bot Rwot Lubaŋawa, dok pe waŋeyo gin ma myero wati kwede bot Rwot, nio ka wabio wa kunnu.” 27Ento Rwot ojiŋo cwiny Parao odoko nwaŋ, pe oweko gucito. 28Parao dok owacce ni, “A woko ki bota; gwokke keni aye, pe inen waŋa doki; pien i nino ma ibineno iye waŋa en aye ibito iye bene.” 29Moses ogamo ni, “Pe dok abineno waŋi kit macalo iwaco.”

Baibul 1985

© 1985 The Bible Society of Uganda

More Info | Version Index