Search form

Nia 17

Pii mua i pata got

(Wel 20.1-13)

1Lwak Jo Icrael ducu gua woko ki i tim Cin kun giwoto gikobo macalo Rwot ociko, ci gugony Repidim; ento pii amata pa dano obedo pe. 2Mumiyo dano gukeco i kom Moses, guwacci, “Miniwa pii me amata.” Moses ogamo doggi ni, “Piŋo wukeco i koma? Piŋo wuomo i Rwot?” 3Ento orwo pii oneko dano, ci dano gubedo ka ŋur i kom Moses kun giwacci, “Piŋo yam ikwanyowa woko ki i Ejipt ka nekowa ki Litinowa ki limwa ki orwo pii?” 4Omiyo Moses okok bot Rwot ni, “Abitimo jo man niŋniŋ? Gin doŋ gutyeko yubbe me cela woko ki got.” 5Rwot owaco bot Moses ni, “Kat wa i nyim lwak, kwany ludoŋo mogo pa jo Icrael, icit kwedgi; dok ikwany odoo ma yam igoyo ki Nail, mak i ciŋi, iwot kwede. 6Nen, abicuŋ i nyimi, i kom pata got ma i Koreb; ci ibigoyo pata got, ci pii bia ki iye, wek lwak gumati.” Moses otimo kit meno i nyim ludoŋo pa Icrael. 7Olwoŋo nyiŋ kabedo meno ni, Maca* ki Meriba*, pien jo Icrael gukeco i kome, dok pien guomo i Rwot kun giwaco ni, “Rwot mono tye i kinwa nyo pe?”

Lweny ki jo Amalek

8Jo Amalek gubino gulwenyo ki jo Icrael i Repidim. 9Moses owaco bot Yocwa ni, “Yer co ma i kinwa, ci icit icilweny ki jo Amalek; diki abicuŋ i wi got ki odoo pa Lubaŋa i ciŋa.” 10Ci Yocwa otimo kit ma Moses otitte, olwenyo i kom jo Amalek; ci Moses ki Aron ki Kur gucito malo i wi got. 11Ka Moses obedo ka tiŋo ciŋe malo, ci Icrael giloyo; ento ka obedo ka dwoko ciŋe piny, jo Amalek giloyo. 12Ento ka ciŋ Moses ojony woko, ci gikwanyo got gikette piny, ka en obedo i wiye, ci Aron ki Kur gitiŋo ciŋe malo, ŋat acel tuŋ cel kit ŋat acel tuŋ mukene; kit meno ciŋe obedo mutiŋŋe malo nio ka cen opoto. 13Ci Yocwa ojwero Amalek ki jone ki pala lucwan.

14-Rwot owaco bot Moses ni, “Co lok man i buk obed me lapo wic, ci ikwan i it Yocwa matek, ni, An abijwayo Amalek woko ki i tam pa dano ducu ma gitye piny i te polo.” 15Ka Moses ocano keno tyer, olwoŋo ni, Rwot aye benderana, 16kun waco ni, “Ciŋwa omako bendera pa Rwot! Rwot bilweny ki Amalek kare ducu.”

Baibul 1985

© 1985 The Bible Society of Uganda

More Info | Version Index