Search form

Nia 40

Guro kema ki kwerone

1Rwot owaco bot Moses ni, 2“I nino dwe acel i dwe mukwoŋo, cak guro iye kema, en kema me rwatte. 3Ket iye canduk lok me caden, ci iŋab boŋo kicika me laum kom canduk. 4Ka doŋ iter iye meja, ican iye jami ducu kikore, ka dok ikel okar-mac ci icib laput malo i wiye. 5Dok iket keno tyer me jabu me waŋo odok eceta i nyim canduk lok me caden, ci iŋab boŋo cuka laum doggola me kema. 6Ket keno tyer me gitum awaŋa i nyim doggola me kema, en kema me rwatte; 7iket otako lwok ocuŋ i kin kema me rwatte ki keno tyer, ci iony iye pii. 8Dok iŋab boŋo cuka me dyekal irum woko ducu, ci iŋab boŋo cuka me laum doggaŋ me dyekal. 9Kwany moo wir, iwir ki kema ki lwak jami ducu ma gitye iye, kun ikwero en ki jami ma giketo iye ducu gubed maleŋ. 10Dok bene wir keno tyer me gitum awaŋa ki moo, ki jami ticce ducu; kwer keno tyer, ci bidoko maleŋ makato. 11Wir moo bene i kom otako lwok ki tedi tere ikwergi. 12Ka doŋ ibikelo Aron ki awobene i doggola kema me rwatte, ci ilwok komgi ki pii. 13Ka doŋ iruk Aron ki boŋŋi aruka maleŋ, ci iwire ki moo, ikwere wek oti bo ta tic me ajwaka. 14Ka dok ikel awobene bene, irukgi ki kanyi, 15iwirgi ki moo macalo iwiro wongi-ni, wek guti bota tic me ajwagi: wirogi ki moo bimiyo gibedo ajwagi matwal wa i kare pa likwayogi ducu.”

16Moses otimo kit meno kit ma yam Rwot ocike kwede ducu; otimo ducu kit meno. 17I dwe mukwoŋo, i mwaka me aryone, i nino dwe mukwoŋo aye giguro iye kema. 18Moses oguro kema: oryeyo tedi tere; ocibo iye guti, ka orwako iye rii bao, oilo wir malo. 19Ka dok oyaro boŋo opeto i wi kema, oketo laum kema, opeto i wiye, macalo yam Rwot ociko ki Moses. 20Ka dok otero lok me caden oketo i canduk, ka orwako tal i kor canduk, oketo kom me kica i wi canduk; 21ka otero canduk i kema, oŋabo boŋo kicika malo me laumme, ci oumo kom canduk lok me caden woko, macalo Rwot ociko ki Moses. 22Ka dok oketo meja i kema me rwatte, i kema tuŋ acam, ki woko i ŋe boŋo kicika ma oumo canduk-ki 23ka dok ocano mugati i nyim Rwot macalo Rwot ociko ki Moses. 24Ka dok oketo okar-mac i kema me rwatte tuŋ acuc me kema kun okemme ki meja, 25ka ocibo laput malo i nyim Rwot; macalo Rwot ociko ki Moses. 26Ka dok oketo keno tyer me jabu i kema me rwatte i nyim boŋo kicika, 27ci owaŋo odok eceta ma ŋwece kur i wiye; macalo Rwot ociko ki Moses. 28Dok oŋabo boŋo cuka me laum doggola me kema. 29Ka dok oketo keno tyer me gitum awaŋa cok ki doggola kema me rwatte, ka ocako tyero iye gitum awaŋa, ki gityer me moko kwon; macalo Rwot ociko ki Moses. 30Ka dok oketo otako lwok i kin kema me rwatte ki keno tyer, oonyo iye pii me lwok; 31en aye ka ma Moses ki Aron ki awobene gilwoko iye tyengi. 32Ka gicito i kema me rwatte, dok ka ginyiko cok ki keno tyer, ci gilwokke, macalo Rwot ociko ki Moses. 33Oguro dyekal orumo kema ki keno tyer, ci oŋabo boŋo cuka laum doggaŋ me dyekal, Kit meno Moses otyeko tic kakare.

Pol ma oumo wi kema

(Wel 9.15-23)

34-Lacen pol obino, oumo wi kema me rwatte woko, ci deyo pa Rwot opoŋo i kema. 35Moses onoŋo pe twero donyo i kema me rwatte, pien pol oboyo kom kema me rwatte woko, dok deyo pa Rwot opoŋo i kema.

36I kare me wotgi ducu, ka pol owarre woko ki i wi kema, ci jo Icrael gicako wot anyim; 37ento ka pol pe owarre woko, ci pe gimedde ki wotgi anyim, gikuro nio i nino ma owarre woko. 38I kare me wotgi ducu pol pa Rwot umo wi kema dyeceŋ, ki mac bedo iye dyewor, ma kun jo ducu me ot pa Icrael gineno.

Baibul 1985

© 1985 The Bible Society of Uganda

More Info | Version Index