Search form

Ejekiel 13

Lok pa Rwot i kom lunebi ma lugoba

1Rwot oloko kweda. 2Owacci, “Wod pa dano, tit lok i kom lunebi me Icrael, tit lok kun itito bot jo ducu ma gitito lok ma gutamo atama ki wigi ni, ‘Wuwiny lok pa Rwot?’ 3Man aye gin ma Rwot Lubaŋa owaco ni, Can i wi lunebi ma lumiŋ-ŋi! Gilubo mere tam ma gutamo atama ki i cwinygi kun noŋo pe guneno ginanyuta mo. 4Wun jo Icrael, lunebiwu gubedo macalo too ma tye i gaŋi ma i kin obur. 5Pe bene gigwoko kabedo ka ma gimuko cel woko ki iye-ni, pe gimito gero cel odoco; mumiyo Icrael pe bicuŋ ka lweny obino i nino pa Rwot. 6Ginanyutagi ducu ma guneno obedo me goba. Gityeto bene lok me goba. Giwacci, ‘Man lok pa Rwot’, ento an gira pe aorogi. Gibedo ka tamo ni myero acob lokgi kakare. 7Awaco botgi ni, ‘Ginanyuta magi ducu ma wuneno obedo me goba, ki lok ma wutyeto-gu ducu obedo lok me goba keken. Wuwaco ni lok magi ducu lokka, ento an gira pe aloko kwedwu.’ ”

8Mumiyo Rwot Lubaŋa owaco botgi kuman ni, “Lokwu ducu obedo me bwolo ki ginanyuta ma wuneno-gu goba keken. Pi meno, atye ki lok i komwu. Man Rwot Lubaŋa ma owaco. 9Abiketo can i komwu, wun lunebi ma wuneno ginanyuta me bwolo-gu, dok bene wutyeto lok goba keken. Pe wubibedo tye ka jona gucokke kacci; dok bene pe gibicoyo nyiŋwu kacel ki nyiŋ jo Icrael mukene-gu; pe wubidok i lobowu matwal. Wubiŋeyo ni an aye a Rwot Lubaŋa.

10-“Lunebi gumiyo jona guŋak woko kun giwacci, ‘Kuc tye,’ ento noŋo kuc mo pe. Jona gubino gugero cel ci lunebi gubino gubuko woko ki raŋi matar me buko kor ot. 11Wac bot jo ma tye ka bukone ki raŋi matar-ri ni, cel bipoto woko piny. Kot ma corre acora bicwer matek, pee madwoŋ bicorre piny, ki yamo lapiru matek bicako kodo i kom cel. 12Cel bimuk poto woko piny, ci dano ducu gibipenyowu gin aŋo ma wutimo pi buko kom cel ki raŋi matarri.”

13Pi meno Rwot owaco kuman ni, “Abicwalo yamo matek cako kodo, kot ma corre acora bicwer, ki pee madwoŋ bicorre piny ki akemona ki kinigana, me muko cel woko. 14Abimuko cel ma wubuko ki raŋi matar-ri areto woko pinyi ŋom, ci aweko te gutine doŋ noŋo. Ka cel opoto ci wuto woko ducu. Man bimiyo wun ducu wuŋeyo ni an aye a Rwot.

15“Meno aye kit ma abitoyo kwede akemona i kom cel ki i kom jo ma gubuko cel ki raŋi matar-ri. Abiwaco botwu ni, ‘Cel doŋ pe matwal, kadi ki jo ma gubuko kome ki raŋi matar-ri bene gipe, 16kadi lunebi ma gubedo ka tito lok ma okemo Jerucalem ni kuc tye iye, kun onoŋo kuc pe-ni bene doŋ gipe.’ ” Man Rwot Lubaŋa ma owaco.

Rwot tye ki lok i kom lunebi ma mon

17Rwot owacci, “Kombeddi in wod pa dano, nen mon ma gitye i kin lutuwu ma gitito lok ma gin tamo atama ki i cwinygi. Juk gin ma gitye ka titone-ni woko, 18kun itito botgi gin ma Rwot Lubaŋa tye ka waco botgi.

“Can i wiwu wun mon ma wukwoyo lwit wutweyo i ŋut ciŋ dano, dok bene wukwoyo boŋo laum wic ma wuboyo iye lwit pi dano ducu kun wulubo kit bor pa ŋat acel acel, wutimo man ni wek gubed ki twero me rwenyo kwo pa dano woko! Imito tic ki twero me kwo ki me to i kom jona wek wunoŋ giwu iye magoba ma cwinywu mito. 19Doŋ wutyeko pyeda woko i kin jona pi cayiri ma romo poŋ ciŋwu keken, ki pi kwon mogo matitino, kun wuneko dano ma onoŋo myero pe guto, ento wubwoto dano ma onoŋo myero guto aye gibedo kwo, pi gobawu ma wuloko bot jona, ma guwinyo lok gobawu-ni.”

20Man aye gin ma Rwot Lubaŋa tye ka wacone ni, “Adag lwit ma wukwoyo i komwu me bedo ki twero i kom dano me kwo ki me to. Abicodo lwit meno-gu woko ki i ŋut ciŋwu ci abimiyo dano ma onoŋo wutye ki twero me loyo kwogi-ni gibwot gicito laboŋo ayela calo winyo. 21Abiyeco boŋo laum wiwu woko bene, ci alaro jona woko ki i ciŋwu, pe doŋ gibibedo i te twerowu matwal. Man bimiyo wuŋeyo ni an aye a Rwot.

22“Wun doŋ wubalo cwiny jo ma kitgi atir woko ki lok me bwolo, kadi bed onoŋo an pe abalo cwinygi, ento wun wucuko cwiny jo ma gin lutim maraco, wek gulokke ki i yo me timgi maraco gular kwogi. 23Pi meno, pe doŋ wubineno ginanyuta me gobagoba matwal, dok bene pe wubityeto tyet. Abilaro jona woko ki i ciŋwu. Man bimiyo wuŋeyo ni an aye a Rwot.”

Baibul 1985

© 1985 The Bible Society of Uganda

More Info | Version Index