Search form

Ejekiel 15

Jerucalem obedo calo olok ma pe konyo

1Rwot oloko kweda. 2Owacci, “Wod pa dano, gitwero poro yat olok ki yat mukene niŋniŋ? Doŋ yat olok ma giporo ki yat ma tye i buŋani berre rom mene? 3Itwero toŋo yatte itiyo ki gin mo? Dano gitwero toŋo gipayo dok teke ci giguro i kor ot me ŋabo jami? 4Yatte ber me obo mac mere keken. Ka mac doŋ owaŋo doge ryoryo ducu ma doŋ oweko bilo i dyere, pud dok itwero kwanyone itiyo ki gin mo? 5Nen, ma pud pe yat meno owaŋ woko onoŋo konnye doŋ pe. Doŋ kit macalo mac owaŋo woko-ni kun oweko bilo bene i dyere, ci konnye doŋ bibedo pe rom mene, tika dok gitwero kwanyone gitiyo ki gin mo?”

6Man aye gin ma Rwot Lubaŋa tye ka wacone ni, “Kit macalo yat olok gikwanyo ki i kin yadi me buŋa ci waŋ woko-ni, kit meno bene abikwanyo jo ma gibedo i Jerucalem ci aketo can i komgi. 7Abiciko waŋa i komgi, kadi bed gubwot ki i mac, mac pud biwaŋogi; ci man bimiyo wuŋeyo ni an aye a Rwot, ka doŋ aciko waŋa i komgi. 8Abimiyo lobo doŋ doko tim ata, pien pe gubedo ka lubo cikka, man Rwot Lubaŋa ma owaco.”

Baibul 1985

© 1985 The Bible Society of Uganda

More Info | Version Index