Search form

Ejekiel 21

Pala lucwan pa Rwot ma gipako lake mabit

1Rwot oloko kweda. 2Owacci, “Wod pa dano, cik waŋi inen Jerucalem ci itit lok mukemo kabedone ducu maleŋ ka ma dano giworo iye Lubaŋa-ni, Tit lok bene mukemo lobo Icrael. 3Wac bot dano ducu ma gibedo i lobo Icrael ni, an a Rwot awacci, ‘Atye ki lok i komwu. Abiwoto pala lucwanna woko ki i akurane, ci anekowu woko ducu, jo ma kitgi atir ki jo ma gin lutim maraco ducu. 4Doŋ ka atiyo man, abitic ki pala lucwanna kun anekowu woko ducu, jo ma kitgi atir ki jo ma gin lutim maraco, cakke ki yo tuŋ acam o kwede wa yo tuŋ acuc. 5Dano ducu gibiŋeyo ni an a Rwot doŋ awoto pala lucwanna woko ki i akurane; pe doki gibidwoko i akurane matwal.’

6“Wod pa dano, cur calo cwinyi mito dem kun noŋo gen mito rwenyo woko. Cur ki keccwiny madit mada i kabedo ka ma jo ducu twero neni. 7Ka inen dano gupenyi ni piŋo it ye ka cur, ci itit botgi ni pi lok man ma mito timme-ni. Tit botgi ni ka inen lok man bitimme cwinygi bipoŋ ki lworo. Ciŋgi bikwe woko doko goro. Tekcwiny ma yam gitye kwede bitum wako. Coŋgi bene bibedo ka myel amyela calo pii ma tagge. Nen, kare doŋ obino woko; lok man doŋ bicobbe kakare.” Man Rwot Lubaŋa ma owaco.

8Rwot owacca ni, 9“Wod pa dano, tit lokka. Tit lok ma an atye ka waconeni bot dano ni,

‘Palalucwan, palalucwan doŋ gipako lake woko mabit,

dok bene gijwayo kome olil woko maber.

10Gipako lake mabit me neko dano,

gijwayo ni wek omeny calo lutkot.

Ŋat mo ma twero jukone pe;

pien wun doŋ wukwero winyo tamma ma amiyo botwu.

11Doŋ gimiyo pala Lucwan gitye ka rudone,

wek doŋ obed maber ma giromo makone.

Doŋ gipako lake woko mabit dok bene gijwayo kome woko

wek doŋ gimi woko i ciŋ lanek dano.

12Wod pa dano, daŋŋe matek kun ikok kwede,

pala lucwan man gimiyo pi neko jona,

ki pi neko rwodi ducu me Icrael.

Gibinekogi woko

kacel ki jona ma gudonne-gu ducu.

Mumiyo myero idoŋ emi pi gen ma doŋ orwenyo woko!’

13“Man gitye ka temowu atema. Ento ka pud wumedde ki kwero winyo tam ma gimiyo botwu, ci doŋ wutamo ni gin ma kit magi pe bitimme?” Man Rwot Lubaŋa ma openyo.

14“Kombeddi doŋ, wod pa dano, tit lokka. Doŋ ciŋi, ci pala lucwan bibino piny kiryo nyo kidek. Man pala lucwan ma neko mere dano, pala lucwan ma miyo lworo dok ma neko dano tyeko woko ducu. 15Pala lucwan man miyo tekcwiny pa jona rwenyo woko, ki Jo mapol gibipoto i dog gaŋi ducu. Doŋ atyeko miyo pala lucwan ma mil amila; gijwayo meny calo lutkot ma wil, doŋ gityeko rudone woko bene pi neko dano. 16Ŋol tuŋ acuc ki tuŋ acam, in pala lucwan mabit-ti! 17Ci an bene abidoŋo ciŋa, kinigana doŋ bitum woko. An Rwot doŋ aloko.”

Pala lucwan pa kabaka me Babilon

18Rwot doki oloko kweda. 19Owacci, “Wod pa dano, pur yo aryo ka ma kabaka me Babilon bibino ki iye ki pala lucwanne. Gin yo aryo ducu gia ki i lobo acel-lu, Doŋ icib bao aryo me lanyut yo i agikki yo ma cito ka donyo i gaŋ. 20Lanyut acel binyuto yo ma cito i Raba ma en aye gaŋ pa jo Ammon, ki mukenene-ni binyuto yo ma cito i Juda, ma cidonyo wa i dye Jerucalem kikome ma girumo woko ki cel gogo matek-ki. 21Kabaka me Babilon ocuŋ i aŋaka ŋaka yo aryo ka ma gicibo iye bao me lanyut yo-ni. Kabaka ocuŋ kenyo ka tyeto tyet, wek enen yo mene ma myero elubi; oyeŋo atero-gu, ka openyo cal lubaŋane, ci oŋiyo cwiny lee ma gityero me gitum. 22Doŋ kwir ma en omako i ciŋe lacuc nyuto Jerucalem. Man tito bote me ŋamo doge me koko, ki me daŋŋe ki dwan me mony, me keto yat latwom cel orum gaŋ woko bene; ki toro cel lobo orum gaŋ woko. 23Man binen macalo tyet me goba ki tuŋ bot jo Jerucalem, pi kwoŋ maleŋ ma doŋ gukwoŋo-ni, Ento lok man opoyo wigi i kom balgi ci nyuto ni gibimakogi woko. 24Man aye gin ma an Rwot Lubaŋa atye ka wacone. Wumiyo gipo i kom balwu, mumiyo balwu ginyuto giyaro ka maleŋ. Dano ducu giŋeyo ni wubalo. Dok wunyuto balwu woko i gin ducu ma wutiyo. Doŋ atyeko ŋolo kop woko i komwu, pi meno abimiyowu woko i ciŋ lukworwu.

25“Ninoni tye ka bino, in latim marac, rwot marac ma loyo Icrael, en aye nino ma gibiketo iye can i komi me agikki. 26An Rwot doŋ aloko. Kwany lalukana ki kitambara labo wic woko ki i wii. Pe tye gin mo ducu ma bibedo kit macalo gitye kwede-ni. Abitiŋo lucan malo ka maber! Jo ma gitye ki twero me loc-ci gibidwokogi woko piny! 27Abimiyo gaŋ man doŋ doko wi obur, wi obur, wi obur! Ento gin man pud pe bitimme nio wan ma ŋat ma doŋ ayero me keto can i kom gaŋ-ŋi obino.

Lubaŋa biŋolo kop i kom jo Ammon

28-“In wod pa dano, tit lok kun iwacci, Rwot Lubaŋa doŋ owaco lok mukemo jo Ammon, ki kit ma gitye kwede ka yeto jo Icrael. Wac botgi ni,

‘Pala lucwan, pala lucwan doŋ giyubo woko me neko dano;

doŋ gijwayo woko tye ka meny amenya calo lutkot ma wil.’

29Tit bot jo Ammon ni ginanyuta ma gineno i waŋ lek-gu ducu goba, dok bene gityeto tyet me goba me bwologi. Ninogi tye ka bino, gin jo maraco, en aye nino ma gibiketo iye can i komgi me agikki, Gibiŋolo ŋutgi woko ki pala lucwan.

Lubaŋa biŋolo kop i kom jo Babilon

30“Dwok pala lucwan i akura kakare. Abiŋolo kop i komi i kabedo ka ma yam kwoni ocakke iye, i lobo ka ma yam ginywali iye. 31Abionyo kinigana i komi; dok bene abikuto mac me akemona i komi miyo iwinyo arem malit twatwal. Abimiyi woko i ciŋ jo mager ma gin lutim bwami marac ma giŋeyo neko dano twatwal, ci gibineki woko. 32Gibiwani woko ki mac. Gibineki woko i lobowu kikome, pi meno ŋat mo ma bipo piri doŋ bedo pe matwal. Pien an Rwot doŋ atyeko loko.”

Baibul 1985

© 1985 The Bible Society of Uganda

More Info | Version Index