Search form

Ejekiel 41

1Lacen dok dano-nu okela i kicika ma i dyere, Ci opimo yo ma gikato ki iye onoŋo borre romo futi apar, 2ki lacce onoŋo futi apar wiye abicel, ki dit me kom cel onoŋo romo futi aboro yo tuŋ ryoryo ducu. Ka dok opimo kicika onoŋo borre romo futi pyerabicel wiye aŋwen, ki lacce romo futi pyeradek wiye aryo.

3Lacen dano-nu odonyo i kicika me agikkine. Ci opimo doggola me donyo, bone futi adek ki lacce futi apar, ki dit kom kicika yo tuŋ ryoryo ducu onoŋo romo futi apar wiye acel. 4Ka opimo kicika borre oromo futi pyeradek wiye aryo ki lacce futi pyeradek wiye aryo, Ka lacen owacca ni, “Man aye kabedo maleŋ makato ducu.”

Kicika ot ma gigerogi i kom cel me ot pa Lubaŋa

5Dano-nu opimo cel me ot pa Lubaŋa ci ditte oromo futi apar, Doŋ i kom cel man ma orumo ot pa Lubaŋa woko ducu, onoŋo tye iye kicika matitino, ma lacgi onoŋo romo futi abicel. 6Kicika ma i ŋete onoŋo tye i dul adek ma gukubbe gudok malo, ma acel acel onoŋo ododde i wi wadi kun dul odi acel acel tye ki kicika pyeradek. Onoŋo bene tye gin me latyel kor kicika ducu ma orumo cel me ot pa Lubaŋa woko me teno kicika ducu, wek pe gutenne i kom cel me ot pa Lubaŋa. 7Doŋ kicika ma i ŋete-gu gudoko malac kun gutiŋŋe woko malo likuŋ i wi odi wadigi ki dul odi acel acel, ma guporo lac pa gin latyel kor kicika a i kom dul ot acel o kwede i kom dul ot mukene ma gurumo ot pa Lubaŋa, Onoŋo bene tye yo ma giito kwede malo i ŋet ot pa Lubaŋa, kit meno dano-nu twero a ki i dul odi ma piny dok malo i dul odi ma tye i wiye me agikki, kun kato ki dul odi ma tye i dyere. 8Ci aneno kabedo murumo ot pa Lubaŋa bene otiŋŋe malo i kabedo ducu. Ci gipimo te guti ma i ŋete ducu ginoŋo ni borre oromo bor pa lagada acel ma rom ki futi apar. 9Doŋ dit me kom cel ma woko me kicika ma i ŋete ducu oromo futi aboro; ki dul abam ma gibwoto tye noŋo onoŋo romo futi aboro bene. Dok me a i kin abam me ot pa Lubaŋa 10o kwede i kicika me dyekal ma gurumo ot pa Lubaŋa woko, onoŋo lacce romo futi pyeradek wiye aryo. 11Doggola me kicika ma i ŋete-gu ducu gukemo abam ma onoŋo gibwoto tye nono-ni. Doggola acel okemo yo tuŋ acam, ki doggola mukene okemo yo tuŋ acuc, doŋ lac pa dul ma gibwoto odon nono-ni onoŋo romo futi aboro ma orumo ot woko ducu.

Gedo ma tye yo tuŋ potoceŋ

12Ot mo ma onoŋo okemme ki ot pa Lubaŋa ki tun potoceŋ onoŋo lacce romo futi miya acel ki apar wiye aryo, ki cel ma orumo onoŋo ditte romo futi aboro; ki borre onoŋo romo futi miya acel ki pyeraŋwen wiye aŋwen.

Kit pim ducu ma gipimo ki ot pa Lubaŋa

13Lacen dano-nu dok opimo ot pa Lubaŋa, borre obedo futi miya acel ki pyerabicel. Dok opimo piny ki yo tuŋ i ŋe ot pa Lubaŋa dok kwede ariari yo tuŋ i dyekal, medo ki gedo ki celle, borre oromo futi miya acel ki pyerabicel. 14Nyim ot pa Lubaŋa ma okemo yo tuŋ wokceŋ ki dyekalle, onoŋo romo futi mi ya acel ki pyerabicel. 15Ka dok opimo bor pa gedo ma onoŋo okemme ki dyekal ma onoŋo tye yo tuŋ potocenni, ki celle ducu ryoryo, oromo futi miya acel ki pyerabicel.

Lok mukene ducu i kom ot pa Lubaŋa

Kicika maditte ma gidonyo kwede i ot pa Lubaŋa, ki kicika ma i iye, ki kicika ma i doggola me donyo ma tye yo tuŋ woko, 16onoŋo gipetogi woko maber ki bao ma oumo kor ot woko ducu; gin adek-ki ducu onoŋo gitye ki wan dirica mapol madiŋ, Ki malo ka wi dye ot i doggola me ot pa Lubaŋa onoŋo giguro kome ducu girumo ki bao, cakke ki i dye ot piny dok kwede malo wa i waŋ dirica (waŋ dirica onoŋo giumogi woko) 17nio wa i kabedo ma tye malo ka wi doggola, wa i kicika ma i iye ki yo tuŋ woko bene. Doŋ ki i kom cel murumo woko ducu ki i kicika ma i iye ki kicika maditte, onoŋo gigoro cal lukerubi ki cal yadi otit.

18Giketo cal yat otit i kin lukerubi ma gigwennye agwenya. Lakerubi acel acel onoŋo waŋe tye aryo, 19waŋ mo ma nen calo waŋ dano onoŋo okemo otit ki yo tuŋcel, ki tuŋcel bene waŋ ma nen calo wan labwor okemo otit, Gigorogi girumo kwede ot pa Lubaŋa woko litit; 20cakke ki i dye ot piny dok kwede malo ka wi doggola gigoro iye cal lukerubi ki cal otit i kor ot.

Keno tyer ma gitiyo ki bao

21Bao me doggola ducu obedo latwoke aŋwen: ki i nyim kabedo maleŋ onoŋo tye iye gin mo 22ma obedo calo ke no tyer ma gitiyo ki bao, Onoŋo borre romo futi abic ki lacce futi adek. Twoke ducu, ki tedi tere ki murumo ducu onoŋo gitiyo ki bao. Lacen dano-nu owacca ni, “Man aye meja ma gicibo cuŋ i nyim Rwot.”

Lok i kom doggola

23Onoŋo tye doggola la iye aryo i agikki me yo ma donyo i kicika madit, dok bene onoŋo tye doggola la iye aryo i agikki yo ma cito i kabedo maleŋ makato ducu-ni. 24Doggola acel acel onoŋo giyubo laiye aryo ma giwirre giyabbe i dye ot ka maleŋ. 25Dok i kom doggola me kicika maditte onoŋo gigoro iye cal lukerubi ki cal yadi otit, kit macalo onoŋo koŋ gigoro i kor ot me kicika ducu-ni. Ki yo tuŋ woko onoŋo tye iye bolo me bao me geŋo tipo ma tye i nyim doggola me donyo. 26Dok bene onoŋo tye waŋ dirica madiŋ tuŋcel, ki yadi otit tye tuŋcel ki tuŋcel, i kom cel ma i ŋet kicika ma i doggola me donyo.

Baibul 1985

© 1985 The Bible Society of Uganda

More Info | Version Index