Search form

Ejekiel 45

Dul lobo ma gipoko gimiyo bot Rwot

1“Ka ce wupoko lobo kun wumiyo dul ki kaka acel acel, ci dul acel myero giket cen pat obed gin maleŋ pa Rwot, Bor pa dul lobo man myero obed mairo apar ki lacce mairo aboro. Doŋ dul lobo meno woko ducu bibedo kabedo maleŋ. 2Dul lobo mo ma twoke aŋwen ducu romrom myero giwek pi ot pa Lubaŋa, ma twoke acel acel noŋo romo futi miya aboro, Kabedo ma giweko noŋo bene bibedo tye murumo kabedo meno woko dyere ma lacce romo futi pyeraboro. 3I kom dul lobo man maleŋ-ŋi myero gipim dul mo ma borre romo mairo apar ki lacce mairo aŋwen, gipok waŋe woko obed pat, at pa Lubaŋa bibedo i kabedo man, ma en aye kabedo maleŋ makato ducu. 4Man bibedo dul lobo maleŋ dok bene bibedo pi ajwagi ma gitiyo i kabedo maleŋ, kun ginyiko cok bot Rwot me tic bote. Man bene bibedo kabedo ka ma odigi bibedo iye ki kabedo maleŋ pi ot pa Lubaŋa. 5Dul mukene ma borre romo mairo apar ki lacce mairo aŋwen, gibiketo pat bedo dul pa Luleyi ma gitiyo tic i ot pa Lubaŋa, Dullobo man Luleyi gibicamo bedo megi matwal, dok bene i kabedo man aye gibigero iye gaŋi ka ma gibibedo iye. 6I ŋet dul lobo ma giketo pat me bedo kabedo maleŋ-ŋi, myero gipim kabedo ka ma gibigero iye gaŋ, ma borre romo mairo apar ki lacce mairo aryo. Kabedo man bibedo pa jo Icrael ducu.

Lobo pi laker ma tye ka loc

7“Myero bene gipim dul lobo giket pi laker, Cakke i kom kabedo murumo kabedo maleŋ ki i kom gaŋ, lobone bidok kwede yo tuŋ potoceŋ ki yo tuŋ wokceŋ i waŋ apokki ma tye yo tuŋ wokceŋ. Cakke ki yo tuŋ wokceŋ o kwede yo tuŋ potoceŋ borre bibedo rom ki bor pa dul lobo ma gipoko gimiyo ki kaka me Icrael-li. 8Meno bibedo dul lobo pa laker i lobo Icrael. Doŋ lukerra ma gin luloc pe doŋ gibiuno jona matwal; ento gibimiyo jo Icrael gigamo lobo kun lubo kakagi ducu.”

Cik pi luloc ma i Icrael

9Rwot Lubaŋa owaco kuman ni, “Wun luloc me Icrael doŋ wutimo bal oromo! Wugik tim bwami ki uno dano woko. Wutim gin ma tye atir dok kakare, Pe myero dok wuryem jona woko ki i lobogi, An Rwot Lubaŋa aye ma atye ka waco botwu lok man.

10-“Wun ducu, ŋat acel acel myero obed ki ratili maber ma en pimo kwede jami ki gen dok kakare. 11Epa* ma gipimo ki jami mutwo bibedo rom ki bat ma gipimo kwede jami ma pige. Bat rom ki acel me apar me komer, ki epa bene rom ki acel me apar me komer; doŋ komer aye bibedo gin ma dano ducu myero gupim ki jami. 12Cekel acel bibedo rom ki gera pyeraryo; cekel abic bibedo cekel abic, ki cekel apar bibedo cekel apar, ka doŋ mina acel bibedo rom ki cekel pyerabic.

13“Man aye gityer ma wubikelo me atyera: acel me abicel me epa ma oa ki i kom komer acel acel me ŋano, ki acel me abicel ma oa ki i kom komer acel acel me cayiri. 14Kit dul ma gimoko me pimo moo tye kuman: acel me apar me bat ma oa ki i kom kor acel acel (kor obedo calo komer, tye iye bat apar). 15Dok bene wubikwanyo romo acel ki i kin lwak romi miya aryo, kun wukwanyogi ki boŋo me dog ot pa Icrael ducu. Man aye gityer ma gibityero pi gityer me moko kwon, gitum awaŋa, ki gityer lakwecwiny, pi timo gin me lakwany bal woko ki i komgi. Man Rwot Lubaŋa ma owaco.

16“Lwak ducu me lobo man gibimiyo gityer man bot laker ma tye i Icrael. 17Doŋ ŋat ma tye ka loc aye ma bimiyo lee me gitum awaŋa, gityer me moko kwon, ki gityer amata i kare me kwero nino madito, i por dwe, ki nino me cabit ducu, ki i kare me kwero nino madito ducu ma giciko pi jo Icrael. En laloc meno bimiyo lee me gitum pi bal, gityer me moko kwon, gitum awaŋa, ki gityer lakwecwiny, pi timo gin me lakwany bal woko ki i kom jo Icrael.”

Kato (Paska)

18Rwot Lubaŋa owaco kuman ni, “I nino mukwoŋo me dwe mukwono, wubikwanyo latin twon ma kome pe ki mwonyo, ci wulonyo kwede kabedo maleŋ. 19Ajwaka bikwanyo remo manok me gitum pi bal ci keto i kom doggola me ot pa Lubaŋa; biketo bene i twok keno tyer aŋwen-ni, ki i kom yat me dogcel me dyekal ma i iye. 20Ibitimo kit meno i nino me abiro me dwe mukwoŋo pi dano mo ma otimo bal pi roc mo nyo pi kwiya piny. Ibitimo gin lakwany bal woko pi lonyo ot pa Lubaŋa wek obed maleŋ. 21-I nino dwe apar wiye aŋwen me dwe mukwoŋo, en aye wubikwero iye nino me Kato (Paska), kun wubedo ka camo mugati ma tobi pe iye pi nino abiro. 22I nino meno laloc bikwanyo latin romo miyo me gitum pi bal pi en ki pi lwak ducu me lobowu. 23Dok i nino acel acel i kom nino abiro me kwero nino me Kato-ni en bimiyo litino twoni abiro ki nyogi romi abiro ma komgi pe ki mwonyo, tyero me gitum awaŋa bot Rwot. En bene bibedo ka tyero nyok dyel acel acel nino ki nino me gitum pi bal. 24En dok bimiyo gityer me moko kwon ma romo agwata adek pi twon acel acel, ki dok agwata adek pi nyok romo acel acel, ki moo ma romo cupa apar pi moko kwon ma romo agwata adek adek.

Nino madito me Bolo

25-“I nino dwe apar wiye abic me dwe me abiro ki pi nino abiro ma gibedo ka kwero nino madito me Bolo-ni, en pud dok bimedde ki miyo gitum pi bal, gitum awaŋa, ki gityer me moko kwon, ki moo bene i kit acel-li.”

Baibul 1985

© 1985 The Bible Society of Uganda

More Info | Version Index