Search form

Acakki 16

Agar ki Icmael

1Carai dako pa Abram pe omedo ki nywalle latin mo, dok en onoŋo tye ki aŋecane ma anyira Ejipt ma nyiŋe Agar. 2Carai owaco ki Abram ni, “Nen, macalo Rwot ogeŋa nywalo latin mo-ni, cit idony i wi aŋecana, wek gwok nyo abinoŋo iye latin mo ma en binywalo.” Ci Abram owinyo dog Carai. 3Kit meno, i kare ma Abram otyeko bedo i lobo Kanaan mwaka apar, Carai dako pa Abram otero Agar anyira Ejipt ma aŋecane, omiye bot cware Abram wek obed dakone. 4Ocako bedo ki Agar, ci Agar ogamo ic. Ka Agar oneno ni doŋ egamo ic, ocako gayo Carai ki waŋ me cac. 5Carai owaco ki Abram ni, “Kipwola mupoto i koma odok meri! Amiyo aŋecana i kori; ka en oneno ni doŋ egamo ic, ci ocako gayo an ki waŋ me cac. Myero Rwot doŋ oŋol kop mapol i kin in ki an!” 6Ento Abram ogamo dog Carai ni, “Nen, aŋecani tye Dok i tweroni giri, in itim giri kit ma imito i kome.” Omiyo Carai ocako timme aromaroma, nio ka olwi, oriŋo woko ki bote.

7Lamalaika pa Rwot onoŋe i waŋ it mo ma i dye tim; it meno tye i yo ma cito Cur. 8Obino openye ni, “Agar, aŋeca pa Carai, in mono ia ki kwene kaa, dok icito wa kwene kaa?” En ogamo ni, “An alwi ariŋo Carai, min ot ma abedo i ode.” 9Lamalaika ogamo ni, “Dok cen bot min ot meno, ci iwore.” 10Lamalaika pa Rwot dok omedo lok ni, “An abimiyo likwayi nya mapol twatwal, ma ŋatti mo pe romo kwano welgi pi polgi.” 11Dok lamalaika pa Rwot omedde ka wacce ni, “Nen, igamo ic, ibinywalo latin laco, dok ibicako nyiŋe Icmael; pien Rwot obedo ka neno aromani. 12En bibedo dano ma cal ki kana me tim, en bitugge i kom dano ducu, ki dano ducu bene bitugge i kome; en bibedo i kabedone pat kun pyem ki utmegine ducu.” 13Ci Agar ocako nyiŋ Rwot ma oloko kwede ni, “In Lubaŋa ma neno.” Onoŋo en owacci, “An atyeko neno Lubaŋa ada, aneno en ci pud atye makwo gira?” 14Mumiyo nyiŋ waŋ it meno gicako ni, Beer-lakai-roi; ma tye i kin Kadec ki Bered.

15-Agar onywalo ki Abram latin laco; Abram ocako nyiŋ latinne ma Agar onywalo ni Icmael. 16Abram onoŋo tye ki mwaka me ditte pyeraboro wiye abicel i kare ma Agar onywalo Icmael.

Baibul 1985

© 1985 The Bible Society of Uganda

More Info | Version Index