Search form

Acakki 24

Ginyomo dako bot Icaka

1I kare ma Abraim doŋ oti, ma mwaka me ditte doŋ dwoŋ, dok onoŋo Lubaŋa doŋ otyeko miyo gum ki Abraim i gin ducu, 2ci Abraim owaco ki laticce ma tye i ode, ma onoŋo loyo jamine ducu, ma oteggi i kingi, ni, “Rwak ciŋi odony ki piny i te ema, 3wek ami ikwoŋ ki nyiŋ Rwot, Lubaŋa me polo ki lobo, ni, pe ibinyomo nyako mo bot woda ma i kin anyira Kanaan, ma abedo i kingi-ni, 4ento ibicito i lobo tuwa, i kakawa; en aye ibinyomo iye dako bot woda Icaka.” 5Laticce ogamo ni, “Gwok nyo dako aye pe biye bino kweda wa i lobo man; myero an aye adok ki wodi i lobo tuwu ma yam ibino, ia ki iye-ni?” 6Abraim owacce ni, “Nen maber ni, pe icito ki woda idwoko cen kunnu. 7Rwot Lubaŋa me polo ma yam okwanyo an ki i paco pa wora-ni, ki i lobo ma ginywala iye-ni, ma yam oloko kweda kun kwoŋŋa kwoŋ ni, ‘Abimiyo lobo man bot likwayi,’ en bicwalo lamalaikane i nyimi, ci ibinyomo dako bot woda nia ki kunnu. 8Ento ka dako aye pe oye bino kwedi, ci kwoŋŋa-ni pe bimaki; ento woda aye pe myero idok kwede cen kunnu.” 9Kit meno laticce orwako ciŋe, odonyo ki piny ki i te em laditte Abraim, ocako kwoŋo kwoŋ i kom lok meno.

10Laticce okwanyo kinaga pa rwode ma romo apar, ka ocako wot, kun otero bene jami mabeco mapatpat; ci oa me wot i Mecopotamia, i gaŋ pa Nakor. 11En omiyo kinaga orumo coŋgi piny i ŋe gaŋ ma cok ki waŋ pii i kin otyeno abwora, i kare ma mon gicito iye ka twomo pii. 12Ci olego ni, “Ai Rwot, Lubaŋa pa laditta Abraim, mi lok ducu owotta maber tin. Alegi inyut mar meri ma pe lokke i kom rwoda Abraim. 13Nen, acuŋ i ŋet waŋ pii en, ki anyira ma i gaŋ guebino bene ka twomo pii. 14Nyako mo ma abilege pii amata, ni, ‘Koŋ icib aguluni piny, wek imiya pii amati,’ ci nyako ma biwaco gire kene ni, ‘Koŋ imati, ka doŋ abimiyo kinagani bene gimato’, wek en aye obed nyako ma iyero pi laticci Icaka. Kit meno bimiyo aŋeyo ni; in doŋ inyuto ki laditta mar meri ma pe lokke-ni.”

15Ma pud peya otyeko lokke, ci nen, Labeka, nya pa Becweri, wod pa Mirika, dako pa Nakor, ma omin Abraim, otuc i waŋ pii ki agulu piine ma obolo i wi gwoke. 16Nyakone onoŋo neno mwonya twatwal, nyako ma ŋattt mo peya omako ciŋe. Ci nyako meno olor, odonyo i waŋ pii, otwomo pii opoŋo agulu piine, ka odwogo, okatti kwede woko. 17Latic meno oriŋo, oŋolle i kome, ci owacce ni, “Alegi ba, koŋ imiya pii ma i aguluni amati.” 18Nyako ogamo ni, “Koŋ imat, laditta”; en otugi tiŋo agulu piine i ciŋe, omiye omato. 19Ka otyeko, ci owaco gire kene ni. “Abitwomo pii, amiyo ki kinagani bene, nio ka gumato pii oromogi.” 20Oyotoyot oonyo pii i weer, ci oriŋo odok ka twomo pii i waŋ it, otwomo pii nio ka oromo kinaga ducu. 21Laco meno ociko waŋe i kome laliŋ, wek eniaŋ ka Rwot otyeko miyo luguma okaye i yo wotte-ni, nyo pe.

22Ka kinaga gutyeko mato pii, laco meno okwanyo atego um me jabu ma pekke romo nucu cekel, ki atego jabu aryo me ŋut ciŋ ma pekgi rom ki cekel apar me jabu, omiyo ki nyako meno 23kun penye ni, “In mono i nya pa ŋa? Kabuto mo twero noŋŋe piwa i gaŋ pa woru?” 24En ogamo ni, “An anya pa Becweri ma wod pa Mirika, ma onywalo ki Nakor.” 25Dok otitte ni, “Watye bene ki reŋ kal ki cam ma romo, wa kabuto bene noŋŋe.” 26Laco meno okula wiye piny, ci oworo Rwot, 27kun waco ni, “Gipwo Rwot, Lubaŋa pa laditta Abraim, ma pe oweko mar mere ma pe lokke, ki adane, i kom laditta. An bene, Rwot doŋ otyeko telo wiya, okela wa i ot ma i kaka pa laditta kikome.”

28Ci anyaka oriŋo otito lok mutimme ducu bot jo ma tye i ot pa minne. 29Labeka onoŋo tye ki ominne ma nyiŋe Laban. Ci Laban oriŋo ocito bot laco meno, wa i waŋ it. 30Ka oneno atego um, ki atego i ŋut ciŋ laminne, ki pi winyo lok pa laminne Labeka ni, “Laco-ni oloko bota kit man,” ci owoto bot laco-nu, nen, onoŋo ocuŋ cok ki kinagane i ŋet waŋ it. 31Owacce ni, “Bin wa i ot, pien Rwot otyeko miyi gum; piŋo dok icuŋ ki i ŋe gaŋ woko? Pien doŋ atyeko yubo ot ki kabuto pa kinaga bene.” 32Laco-ni obino, odonyo i ot; ka Laban ocako gonyo del woko ki i kom kinaga, omiyo reŋ kal ki cam bot kinaga, okelo pii lalwok tyene ki tyen jo ma owoto kwede. 33Ka gikelo cam gicibo i nyime wek ocam; ento en owacci, “An peya abicam, nio ka atito kit kwena ma giora kwede.” Ci ogamo ni, “Tit do.”

34Ci en otito ni, “An latic pa Abraim. 35Rwot otyeko miyo gum madit omako laditta, doŋ odoko dano madit, omiyo en olimo lim makwo, dyegi ki dyaŋi, ryal ki jabu, lwak opii ki lwak aŋeca, kinaga mapol, ki lwak kana. 36I kare ma laditta doŋ oteggi, ci Cara dako pa laditta ocako nywalo latin laco, en aye gimiye oleyo lim ducu ma en tye kwede. 37Laditta omiya akwoŋo kwoŋ, kun owacca ni, ‘Pe ibinyomo nyako mo bot woda ki i kin anyira Kanaan, i lobo ma abedo iye-ni; 38ento ibicito i ot pa wora, ki i kin lutuwa, en aye icinyom iye dako bot woda.’ 39Ci agamo dog laditta ni, ‘Gwok nyo dako pe biye bino kweda kono.’ 40Ento en odokka iye ni, ‘Rwot ma abedo alubo cikke-ni bicwalo lamalaikane nywako kwedi yo, ci luguma bikayi iyo wotti; in ibinyomo dako bot woda nia i ot pa wora kikome. 41Ci kwoŋŋa doŋ pe bimaki, ka doŋ icito bot lutuwa; ka ce gin aye pe gumiyi nyako, ci kwoŋŋa doŋ pe bimaki.’

42“Tin ka ao i waŋ pii, ci alego ni, ‘Ai Rwot, Lubaŋa pa laditta Abraim, ka tin ibimiyo luguma kaya i wotta man ma awoto iye-ni, 43ci nen, acuŋ i ŋet waŋ pii en; nyako mo ma bibino ka twomo pii, an abiwacce ni, “Alegi ba, miya pii mo ki aguluni amati,” 44nyako ma bigamo ni, “Koŋ Imati, dok abitwomo mukene pi kinagani bene,” en aye obed dako ma Rwot oyero me bedo dako pa wod pa laditta.’

45“I kare ma pud peya atyeko loko lok ma tye i cwinya, ci nen, Labeka otuc, mubolo agulu piine i wi gwoke, ci olor odonyo i waŋ pii, ka otwomo pii. Ci alege ni ‘Miya pii amat ba!’ 46En otugi tiŋo agulu piine ki i wi gwoke kun waco ni, ‘Koŋ imati, ci abimiyo kinagani bene gimato.’ Ci an amato, ka en omiyo kinagana bene gumato. 47Dok apenye ni, ‘In kono i nya pa aŋa kaa?’ En ogamo ni, ‘An anya pa Becweri ma wod pa Nakor, ma Mirika aye onywalo.’ Kit meno an acako keto agit i ume, ki atego jabu i ŋut ciŋe ryoryo. 48Ka akulo wiya piny, aworo Rwot ci apwoyo Rwot, Lubaŋa pa laditta Abraim, ma otela i yo maber, omiya anoŋo nya pa omin laditta me atera bot wode. 49Kombeddi ka wubitic ki laditta ki mar ki ada, wutitta; ka pe bene wutitta; wek alokke adok yo tuŋ ciŋ acuc nyo tuŋ acam.”

50Laban ki Becweri gugamo ni, “Lok man oa ki bot Rwot; pe watwero dokki iye marac nyo maber. 51Nen, en Labeka tye i nyimi enno; in ikwany en, wuwot kwede, wek en ocit obed ci-wod pa laditti, macalo Rwot doŋ otyeko wacone.”

52Ka latic pa Abraim owinyo lok meno, ocako ryebbe piny i ŋom i nyim Rwot. 53Latic okelo lwak atego ryal ki atego jabu, ki lwak ginaruka, otiŋo omiyogi bot Labeka; ka dok omiyo ki ominne ki bot minne jami me wel. 54En ki jo ma gitye kwede gucako camo cam ki mat, ci gubuto nino acel kunnu. Ka gua malo odiko, ci olego ni, “Doŋ wucwala adok bot laditta.” 55Laban ki minne gugamo ni, “Wek koŋ anyaka obed kwedwa kare manok, ma romo ka nino apar; lacen en doŋ bicito gire.” 56Ogamo kun waco botgi ni, “Pe wugal wiya; macalo Rwot doŋ omiyo luguma okaya i wot man, wuwek doŋ acak wot, adok bot laditta.” 57Gugamo ni, “Koŋ walwoŋ nyako, wapenye.” 58Ka gilwoŋo Labeka, gipenyo kun giwacce ni “Ibiye wot ki laco man?” En ogamo ni “Abiwot.” 59Kit meno gucako cwalo nyagi Labeka ki lapidine, kacel ki latic pa Abraim ki jone. 60Gulamo gum i kom Labeka, kun giwacce ni, “Laminwa, bed min jo alip apar; ki likwayi gulo gaŋ pa lumerokgi!” 61Lacen Labeka ki lwak aŋecane gua, gucako wot, guito wi kinaga kun gilubo kor laco meno; kit meno latic meno ocako wot ki Labeka, kun gidok i yo tugi.

62Icaka onoŋo obino oa ki Beer-lakai-roi; i kare meno onoŋo en bedo i Negeb. 63Ka Icaka ocito woko i bar ka lwodo lok otyeno; ci otiŋo waŋe malo, oneno kinaga ka bino. 64Ka Labeka otiŋo waŋe malo, oneno Icaka, ci olor woko ki i wi kinaga, opye piny. 65Owaco ki latic ni, “Meno laco mene ma loka ca, ma woto i bar kun bino ka romo kwedwa-ni?” Latic ogamo ni. “En aye laditta-ni.” Labeka okwanyo boŋo oumme kwede. 66Latic otito bot Icaka lok ducu ma otimme. 67Icaka okelo Labeka i kema, ci obedo kwede, odoko dakone, kun mare bene. Kit meno cwiny Icaka ocako kwe ki i ŋe to pa minne.

Baibul 1985

© 1985 The Bible Society of Uganda

More Info | Version Index