Search form

Acakki 39

Yucepu ki dako pa Potipar

1Gitero Yucepu woko i Ejipt, ci Potipar ladit tic pa Parao, ma loyo askari lukur-piny, ma Laejipt, owilo en woko ki bot jo Icmael ma gutere kunnu-ni. 2-Rwot yam tye ki Yucepu, ci odoko lakomegum; ocako bedo gire i ot pa laditte ma Laejipt; 3ci laditte bene oneno ni Rwot tye kwede, pien Rwot omiyo gin ducu ma en tiyo bedo maber. 4Cwiny Potipar obedo, yom i kom Yucepu, ci odoko laticce. Ocako kete obedo ladit ma loyo ode ki jamine ducu. 5Nia i kare meno ma okete obedo ladit ma loyo ode, ki lalo jamine ducu, Rwot ocako miyo gum obedo i ot pa Laejipt meno pi Yucepu; gum pa Rwot opoto i kom jami ma yam tyekwede ducu, ma i ot ki ma i poto-gu. 6Ci Potipar omiyo jami ducu i te loc pa Yucepu; pi bedo kwede omiyo doŋ pe paro gin mo, kono pi cam keken ma en camo-ni.

Onoŋo Yucepu nen mabulobulo, dok mwonya matek. 7Lacen dako pa laditte cwinye ocako pyette i kom Yucepu, ci owacce ni, “Wabut kwedi.” 8Ento en okwero woko, ci owaco bot ci-laditte ni, “Nen ba, pi bedona kany omiyo laditta pe doŋ paro pi gin mo ma tye i ot-ti, dok otyeko keto gin ducu ma etye kwede i ciŋa. 9En pe doŋ tye ki dit makato an i ot man, pe tye gin mo ma dok okano ma peya omiyo i ciŋa, kono in keken, pien in i dakone. An dok acorre ka tiyo bal madit marac kuman niŋniŋ, kun atimo wa bal i kom Lubaŋa kulu?” 10Kadi bed dako meno obedo ka bito Yucepu jwijwi, pe omedo ki winyo lokke, pe oye buto kwede, kadi bedo kwede.

11Ento ka nino mo acel owec, ma, onoŋo laco mo pe i ot, ka Yucepu odonyo i ot ka tiyo ticce, 12ci dako-nu omake ki boŋone, kun wacci, “But kweda.” Ento Yucepu omwomme oweko boŋone i ciŋe, okato gire woko ki i ot. 13Ka dako-nu oneno en oweko boŋone i ciŋe, omwomme gire oka-to woko ki i ot, 14ci olwoŋo co ma gibedo i ode, ci otittigi ni, “Nenu, ladit-ti okelo Laibru-ni kany me nywarowa; obino bota i ot ni ebut kweda kulu, ci atokke adaŋŋe ki koko matek. 15Ka oneno ni atiŋo dwana malo kun agorre matek ki koko, ci otenyo ginarukane bota, ci omwomme oka-to woko ki i ot.” 16Ci opyelo boŋone ka ŋete nio ka won ot odwogo paco. 17Otitte kit lok acel-lu, kun waco ni, “Opii Laibru-ni ma ikelo i kinwa obino bota i ot ka nywara; 18ento ka atiŋo dwana oyotoyot kun adaŋŋe, ci oweko ginarukane bota, omwomme gire woko ki i ot.”

19Ka Potipar owinyo lok ma dakone olokke, ni, “Man en aye kit ma opiini otima kwede”, ci kiniga omake matek mada. 20Ocako mako Yucepu, oketo i mabuc, i kabedo ma gitweyo iye lumabuc pa kabaka, ci obedo i mabuc kunnu. 21-Ento Rwot onoŋo tye ki Yucepu, ci onyutte mar mere ma pe lokke, ci omiyo en oyomo cwiny lagwok ot mabuc. 22Lagwok mabuc omiyo twer ki Yucepu me gwoko lumabuc ducu ma gitye i mabuc; gin ducu ma gitiyo kunnu, en aye loyo. 23Lagwok ot mabuc pe doŋ tamo pi gin mo ma oketo i ciŋ Yucepu, pien onoŋo Rwot tye kwede; gin ducu ma en tiyo, Rwot omiyo iye gum.

Baibul 1985

© 1985 The Bible Society of Uganda

More Info | Version Index