Search form

Acakki 40

Yucepu ogonyo te lek pa lumabuc

1Ka kare okato, latyer koŋo vino pa kabaka me Ejipt ki lated mugatine gubalo i nyime. 2Kiniga omako Parao i kom ludito ticce aryo-nu, ladit latyer koŋo vino ki ladit me tedo mugati, 3ci oketogi i ot pa ladit ma loyo askari lukur-piny po gwokogi, i ot mabuc ma Yucepu bene gitweye iye-ni. 4Ladit ma loyo askari lukur-piny oketogi i ciŋ Yucepu, en okurogi; ka gitweyogi i ot kol kare mo. 5Ci guleko lek i nino acel, latyer koŋo vino ki lated mugati pa kabaka me Ejipt, ma gitweyogi i ot mabuc; ŋat acel acel oleko gire lekke, kun lek acel acel tye ki tyen lokke. 6Ka Yucepu obino botgi odiko, ci onenogi kun gitye ki cwercwiny. 7Ci openyo ludito tic aryo pa Parao ma gitye kwede i ot kol i ot pa laditte, ni, “Tin waŋwu oballe woko piŋo?” 8Gugamo ni, “Tin waleko lek, ci pe tye dano mo ma gonyowa te lekke.” Yucepu owacogi ni, “Pe Lubaŋa gire aye lagony tere? Koŋ wutitta lekke mono.”

9Ci latyer koŋo vino ocako tito lekke bot Yucepu, kun wacce ni, “I waŋ lekka onoŋo olok tye i nyima, 10olok onoŋo tye ki jaŋe adek; ka pud oluro me keto: ture, ci onyak, olugo ocek woko. 11Ka amako kikopo pa Parao i ciŋa, ci aŋolo nyige, abiyo i kikopo, ka amiyo kikopo i ciŋ Parao.” 12Yucepu ogamo, owacce ni, “Man aye te lekke: jaŋe adek-ki, meno nino adek; 13i nino me adekke Parao bitiŋi ci dwoki i dog ticci, ci dok ibimiyo kikopo pa Parao i ciŋe kit macon ca, kit macalo con i kare ma in latyer koŋo vinone. 14Ento ber ipo pira ka doŋ idok i dog ticci; alegi ni in bene itima ber do, itit pira bot Parao, wek gigonya woko ki i ot man. 15Pien yam gikwala akwala ki i lobo pa jo Ibru; man bene dok giketa kany i ot kol noŋo ma pe abalo gin mo.”

16Ka ladit me tedo mugati oneno ni gigonyo te lek maber, en owaco ki Yucepu ni, “An bene onoŋo aleko lekka: onoŋo adodo aduku adek i wiya. 17I aduku mamalone ca onoŋo tye iye lwak kit gin ma gitedo ducu pi Parao, ento winyo obedo ka camogi woko ki i aduku ma tye i wiya-ni.” 18Yucepu ogamo ni, “Man aye te lekke: aduku adek en aye nino adek; 19i nino me adekke Parao bitiŋi malo, ci biŋabi i kom yat, ka winyo gibicamo riŋo komi woko.”

20Ka nino adek oromo, en aye nino ma ginywalo iye Parao, ci otedo karama ki luticce ducu, ci Parao okelo ladit latyer kono yino kacel ki ladit lated mugati i nyim luticce. 21Odwoko ladit latyer koŋo vino i dog ticce me tyero koŋo vino, ci otiŋo kikopo pa Parao omiyo i ciŋe; 22ento oŋabo: ladit lated mugati malo i kom yat kit ma nene Yucepu ogonyo kwede te lekgi. 23Ento ladit latyer koŋo vino pe omedo ki po pi Yucepu, wiye owil woko i kome matwal.

Baibul 1985

© 1985 The Bible Society of Uganda

More Info | Version Index