Search form

Acakki 43

Omegi Yucepu gudok i Ejipt ki Benjamin

1I kare ma kec doŋ lyet twatwal i lobo, 2dok kal ma gikelo ki i Ejipt doŋ gucamo otum woko, wongi owaco botgi ni, “Wudok kunnu, wuciwil ki wan cam mo manok.” 3Juda ogamo doge ni, “Dano ca ocikowa matek kun waco ni, ‘Pe wubineno waŋa ka ominwu pe i kinwu.’ 4Ka icwalo ominwa owoto kwedwa, ci wabicito kunnu ka willi cam; 5ento ka pe icwalo en, pe wabicito kunnu, pien dano ca owacowa ni, ‘Pe wubineno waŋa ka ominwu pe i kinwu.’ ” 6Icrael owacci, “Piŋo wutima marac kuman? Piŋo dok wutito ki dano ca ni wutye ki ominwu mukene?” 7Gudok iye ni, “Dano ca openyowa ki lwak peny mapol i komwa ki i kom kakawa, kun waco ni, ‘Wonwu pud tye makwo? Ominwu mukene tye?’ Wan wadok iye i kom gin ma openyo; wan onoŋo watwero ŋeyo niŋniŋ ni en biwacci, ‘Wukel ominwu kany’?” 8Juda owaco bot wonne Icrael ni, “Mi latin i ciŋa, cwale wawot kwede, ci wabia wacito, wek wabed kwo, pe wato, wan kacel ki in ki litinowa bene. 9An abicuŋ pire; ibipenya pire. Ka ce pe abikelo en boti i kare ma adwogo, akete i nyimi, ci wek an aye abed won alii matwal; 10pien ka nene pe wagalle, kono man doŋ wawirre kunnu kiryo.”

11Ci wongi Icrael dokowaco botgi ni, “Ka doŋ myero obed kumeno ba, doŋ wutim kit man: wuter nyig yadi mogo ma wuyero me lobo-ni i kicaawu, wuter mot ki dano-nu, moo makur manok ki moo kic, odok yat ki murra, nyig otitimo ki yaa. 12Dok wuter lim ma romo culo wil tyen aryo; wutiŋ lim ma nene gidwoko giketo i dog kicaawuni; gwok nyo yam wigi owil awila. 13Wuter ki ominwu, wek wua, wucit dok bot dano-nu; 14ber Lubaŋa Matwero-ducu aye omi kica omak dano-nu i komwu, wek ocwal ominwu mukene ca ki Benjamin. Ka gityeko litinona woko, doŋ gityeka arumo do!” 15Ci gutero mot, ki wel lim ma dodo tyen aryo, kacel ki Benjamin; gua gucito i Ejipt, gucuŋ i nyim Yucepu.

16Ka Yucepu oneno ni Benjamin tye i kingi, ci owaco bot lakan jamine me ot ni, “Kel jo-nu i ot, ka inek riŋo iyubi, pien gin koni gibicam kweda dyeceŋ.” 17Dano meno otiyo kit ma Yucepu ocike, okelo jo-nu i ot pa Yucepu.

18Lworo omako omegine ka giterogi i ot pa Yucepu, guwaco ni, “Man pi lok me lim, ma nene gidwoko giketo i dog kicaawa i kare mukwoŋo ca. Mumiyo gikelowa i ot-ti, wek enoŋ lok i komwa, emakwa, wek wadok opiine, ka dok ema lwak kanawa woko.” 19Pi meno gucito bot lakan jami me ot pa Yucepu, guloko kwede ki i doggola, 20guwacce ni, “Laditta, wan wabino kany ka wilo cam i kare mukwoŋo ca; 21ka wao i kabedo ma wabuto iye-ni, wagonyo dog kicaawa, ci wanoŋo lim tye i dog kicaa pa ŋat acel acel ma i kinwa, limwa ducu onoŋo tye ki berre; en watyeko dwogo kwedeni, 22ka dok wabino ki lim me wilo cam. Pe waŋeyo ŋat ma oketolimwa i kicaawa.” 23En ogamo ni, “Wuywe ma cwinywu opye mot, pe lworo omakwu. Lubaŋa ma Lubaŋa pa wonwu en aye gwok nyo okano ki wun lim i kicaawu; an mera agamo limwu.” Ci ocito okelo Cimeon botgi. 24Dano meno oterogi i ot pa Yucepu, omiyogi pii me lwoko tyengi, ka dok omiyo cam ki kanagi. 25Guyubo motgi me atyera bot Yucepu ka bidwogo i dyeceŋ, pien guwinyo ni gibicam kunnu.

26Ka Yucepu odwogo paco, gutero motgi bote i ot, guryebbe piny i nyime. 27Openyogi ka gitye maber, kun waco ni, “Wonwu tye maber, ladit mo muti ma nene wuloko pire-ni pud tye makwo?” 28Gugamo ni, “Laticci ma wonwa tye maber, pud tye makwo.” Gukulo wigi piny, guryebbe i nyime. 29Ka otiŋo waŋe malo ci oneno ominne Benjamin, latin pa minne, owacci, “Man aye ominwu matidi-ni bo, ma nene wutitta pire-ni? Lubaŋa omini gum, latinna!” 30Yucepu okato woko oyot, pien onoŋo cwinye pukke pi ominne, ocito oyenyo ka ma myero ekok iye. Ci odonyo ka koko i kicikane. 31Ka olwoko waŋe, ci okatti woko kun diyo cwinye, owacci, “Doŋ gitok cam.” 32Gitoko camme kene pat, ki megi bene pat, ki pa Luejipt ma yam gicamo kwedgi bene pat kakengi, pien Luejipt pe gicamo kacel ki jo Ibru, bedo me kwer ki bot Luejipt. 33Gubedo piny i nyime, latin kayo macalo dit me anywalline tye kwede ki latin matidine kit macalo por me tidine tye kwede; ci gucako bedo ka nenne kekengi kun giuro. 34Gipoko botgi cam kun gitoko a ki i meja pa Yucepu, ento pa Benjamin gipoko mere ododo pa omegine tyen abic kulu. Kit meno gimato, gibedo kwede ki yomcwiny.

Baibul 1985

© 1985 The Bible Society of Uganda

More Info | Version Index