Search form

Kocea 14

Giciko Icrael me dok bot Rwot

1In Icrael, doŋ idwog bot Rwot Lubaŋani,

pien doŋ itwomo tyeni pi balli.

2Wuwot ki lok me dogwu, wudok bot Rwot;

wuwac bote ni, “Kwany balwa woko ducu;

gam motwa maber-ri, wek wacul waŋ balwa ki lok ma i dogwa.

3Aciria pe bilarowa,

pe wabiriŋo ki aguragura;

pe doŋ wabiwaco ki tic me ciŋwa ni, ‘Wun Lubaŋawa.’

Latin kic noŋo kica ki boti.”

4Abimiyo niyegi magoro-ni doko tek,

abimarogi pi bercwinya,

pien kinigana doŋ oa woko i komgi.

5Abibedo macalo toyo bot jo Icrael; en bituru macalo leŋa

bicwalo lwite piny macalo atega. 6Bilot, ci jany,

bibedo ber macalo jeituni,

dok ŋwece bibedo kur macalo ŋwec Lebanon.

7Gibidwogo ci gibibedo i te tipona,

gibinywal macalo kal ma i poto; gibituru calo olok,

ŋwecgi bibedo makur macalo ŋwec koŋo vino me Lebanon.

8In Epraim, cal jogi konyi ki gin aŋo kaa?

An keken aye ma agamo dogi,

dok an aye agwoko in.

An abedo calo yat ciprec ma pote pe ner;

an aye amiyo nyak.

9Ŋat ma ryek biniaŋ lok magi;

dano ma cwinye lwodo lok aye bineyogi;

pien yo pa Rwot ducu tye atir,

jo ma cwinygi atir aye gilubo yone,

ento jo ma gikalo wi cik pa Lubaŋa

gitwomo iye tyengi.

Baibul 1985

© 1985 The Bible Society of Uganda

More Info | Version Index