Search form

Kocea 5

Can i kom Icrael pi a woko ki bot Lubaŋagi

1Wuwiny lok man, wun ajwagi pa Lubaŋa,

wuket cwinywu, wun ot pa Icrael.

Wucik itwu, wun ot pa kabaka.

Pien kop ma giŋolo otiko komwu;

pien wun wubedo owic i Mijpa,

ki obwo ma giciko i wi Tabor.

2Gikwinyo bur matut i Citim,

ento abiketo can i komgi ducu.

3Aŋeyo Epraim,

Icrael pe okanne ki bota.

In Epraim kombeddi idoko latim kwele,

Icrael bene doŋ oballe gire woko.

4Tim megi geŋogi dwogo bot Lubaŋa;

pien cwinygi me timo kwele doŋ tye i igi,

geŋogi ŋeyo Rwot.

5Wakke pa Icrael odoko caden ma tye i nyime;

Epraim bitwomme pi balle;

Juda bene binywako twomme kwedgi.

6Gibiwoto ki romi ki dyaŋigi me gitum pi yenyo Rwot,

ento pe gibinoŋo kome;

pien Rwot doŋ otyeko a woko ki botgi.

7Gin pe gubedo lugen bot Rwot,

pien ginywalo litinogi ki lurok ata.

Koni por dwe binekogi woko,

kacel ki pottigi ducu.

8Wukut bi la i Gibea,

wukut gwara i Rama. Wugo oduru i Bet-awen;

komi omyel, in Benjamin!

9Epraim bidoko obur

i nino ma giketo can i kome.

Anyuto lok me ada ma bitimme

i kin kaka ma i Icrael ducu.

10Luker me Juda gubedo macalo jo

ma gikobo got ma poko wan lobo;

abicoro kinigana i komgi macalo pii.

11Epraim doŋ gidiyo matek,

pe giŋolle kop kakare,

pien otyeko mine ka lubo kor gin ma konnye pe.

12Pienno adoko calo nyenye ma naŋo kom Epraim,

dok abedo calo tut ma camo ot pa Juda.

13Kare ma Epraim oneno twone,

kit ma Juda bene oneno wan burre-ni,

omiyo Epraim owoto wa i Aciria,

ci ocwalo kwena bot kabaka madit.

Ento en pe twero caŋowu,

kadi ki bur mewu bene pe twero caŋo.

14Pienno abibedo macalo labwor bot Epraim,

dok abibedo macalo latin labwor i kom ot pa Juda.

An, an kikoma aye abikilo komwu woko,

ka doŋ abiwot gira;

abitiŋowu woko, ŋat ma bilarowu pe.

15Abidok gira i kabedona,

nio waŋ ma guniaŋ balgi

ka doŋ gicako yenyo koma,

gibiyenyo i kare ma gitye i can, kun giwacci,

Baibul 1985

© 1985 The Bible Society of Uganda

More Info | Version Index