Search form

Icaya 15

Lok ma gitito i kom lobo Moab

1-Man aye lok ma pire tek ma gitito i kom Moab.

Pien Ar doŋ gijwero woko i dyewor acel keken

omiyo Moab doŋ ogik woko;

pien Kir bene gijwero woko i dyewor acel keken,

omiyo Moab doŋ ogik woko.

2Jo Dibon doŋ gucito malo i wan jogigi

ka koko kunnu;

jo Moab tye ka kok pi Nebo ki pi Medeba.

Wi dano ducu doŋ otal woko,

yer tik-gu ducu bene doŋ gilyelo woko.

3Dano giruko boŋo cola i dye gudo;

ki i wi odigi kadi wa i dye gaŋgi

jo ducu noŋo kok ma pig wangi mol amola i korgi.

4Jo Kecbon kacel ki jo Eleale bene gitye ka koko,

dwangi winnye ka mabor wa i Jakaj;

meno omiyo lulweny me Moab gudoko lwor mada;

cwinygi doŋ oŋabbe aŋaba.

5Cwinya rem twatwal pi Moab;

jo ma lurin-lweny ma yam gibedo

iye doŋ guriŋo woko i Joar,

guriŋo bene wa i Eglat-celicia.

Guito cere me Lukit,

gicito malo kun gikok ki pig waŋgi;

ki i yo ma cito piny i Koronaim

gukok pi neno kit macalo lobo

doŋ gibalo kwede woko.

6Pii ma i Nimrim

doŋ otwo woko liweŋ;

lum oner woko pe doŋ lot,

gin mo ma twi bene doŋ pe matwal.

7Meno omiyo jami mabup ma yam onoŋo ginoŋo,

kacel ki jami ma yam gikano,

gin ducu doŋ giyakogi gitero woko loka kulu Arabim.

8Pien koko doŋ dwoŋ twatwal,

doŋ owoto oromo i lobo Moab woko ducu;

nen koko pa dano doŋ winnye wa i Elam,

dok bene doŋ owinnye wa i Beerelim.

9Pii me Dibon doŋ odoko remo keken;

kadi bed kumene pud dok abimedo can mukene i kom Dibon,

abikelo labwor kikome doŋ i kom jo

Moab ma gubwot ma guriŋo woko,

ki i kom jo ma gudoŋ i lobo meno.

Baibul 1985

© 1985 The Bible Society of Uganda

More Info | Version Index