Search form

Icaya 56

Mot ma Lubaŋa miyo pi gwoko cikkene

1Rwot owaco bot jone kuman ni,

“Myero wuŋol kop atir, dok wuti gin ma tye atir,

pien doŋ acok larowu,

lar ma alarowu kwede binen ka maleŋ.

2Dano ma timo man tye ki gum madwoŋ,

ki dano ma omako matek likiŋ,

ma gwoko ceŋ cabit kun pe pyedo,

dok gwoko ciŋe pe timo gin marac.”

3Larok mo ma obino oribbe ki Rwot pe myero owac ni,

“Rwot bikoya woko matwal ki i komjone miyo abedo kaikena”;

ki dano ma gikolo bene pe myero owac ni,

“Nen, doŋ atye macalo yat ma otal.”

4Pien Rwot doŋ owaco kuman ni,

“Jo ma gikologi ma gigwoko cen cabitta,

ma giyero tiyo gin ma yomo cwinya,

ma gumako gicikkena likiŋ,

5abimiyo botgi gin mo me po nyiŋgi ma bibedo i ot ka ma giwora iye i dye gaŋŋa,

maber makato bedo ki litino awobe nyo litino anyira;

abimiyo botgi nyiŋ ma bedo matwal,

ma pe birwenyo kadi ki acel.

6“Doŋ lurok ma guribbe ki Rwot, me tic bote,

kun gimaro nyiŋe, dok ma gimine me bedo luticce,

dano ducu ma gwoko ceŋ cabit, kun pe pyedo,

ma omako gicikkena woko likiŋ,

7-gin jo-nu aye abikelogi i got mera maleŋ,

dok abiyomo cwinygi i ot me lega ka ma giwora iye.

Abigamo gitum awaŋagi ki gityer ma gityero bota,

magi ducu abigamo i wi keno tyerra;

pien oda gibilwoŋo ni ot me lega pa jo me rok ducu.”

8Rwot Lubaŋa ma ocoko jo Icrael ma onoŋo giryemogi woko owaco kuman ni,

“Dok abicoko jo mukene agurogi bota,

amedo i kom jo ma doŋ atyeko cokogi-ni.”

Kop oloyo lutel pa jo Icrael

9Wun lee tim ducu wubin,

wumwod riŋo, wun lee ducu ma wubedo i buŋa.

10Lukur-piny pa jo Icrael ducu wangi oto,

gin ducu gipe ki ŋec kadi ki acel,

gin ducu gicalo gwogi ma te lebgi oto,

pe dok gitwero gweyo;

gibuto piny gibedo ka lek aleka,

gimaro nino nino matut keken.

11Gin gwogi ma giwor twatwal ma cam pe romogi.

Gin lukwat ma pe giniaŋ gin mo;

ŋat acel acel i kingi kwanyo mere yone kene,

ŋat acel acel bene yenyo magobane kit ma cwinye mito.

12Gilwoŋŋe kekengi ni, “Wubin wacitu ka kelo koŋo vino,

wubin wamatu kono makec wek wameru woko,

diki dok binoŋŋe,

madit makato ducu.”

Baibul 1985

© 1985 The Bible Society of Uganda

More Info | Version Index