Search form

Jeremia 13

Carolok i kom lateboŋo ma giruko i pyer

1Rwot owacca kuman ni, “Cit iwil boŋo camanini me aruka i pyer, ci itwe i pyeri, ento pe ilut i pii.” 2Ci awilo boŋo me pyer kun alubo lok ma Rwot otitta-ni, ci aruko i pyera. 3Lok pa Rwot dok obino bota tyen me aryone ma wacci, 4“Kwany boŋo me pyer ma nene iwilo iruko i pyeri-ni, ci ia icit i dog kulu Euprate, ci icikan woko kunnu i kin got mubar.” 5An aa acito ci akano woko i ŋet kulu Euprate kit macalo Rwot ocika kwede. 6I ŋe nino mapol Rwot dok owacca ni, “A malo icit wa i kulu Euprate ci ikwany boŋo me aruka ma yam aciki ni icikan kunnu-ni.” 7Cutcut aa acito i kulu Euprate ci akwinyo ŋom, ci akwanyo boŋo aruka me pyer ki i kabedo ka ma yam onoŋo akano iye-ni. Ento anoŋo ni boŋo ca doŋ oballe woko, pe dok ber pi gin mo.

8Lacen Rwot dok pud oloko bota aye. En oloko bota kuman ni, 9“Man aye kit macalo abityeko kwede wakke pa Juda ki wakke madit ma Jerucalem tye kwede. 10Lwak magi marac ma gukwero winyo lokka, ma gumiyo ŋutgi obedo nwaŋ gulubo gigi gin ma cwinygi mito, ma gubedo ki lubaŋa mukene kun gitiyo botgi, gibibedo calo boŋo pyer man ma pe doŋ ber me aruka. 11Kit macalo boŋo me atweya i pyer moko kwede i kom dano, kumeno bene aketo jo me ot pa Icrael ki jo me ot pa Juda aridogi woko i koma matek likiŋ, wek gubed lwak ma gibikelo nyiŋ maber bota, ma gibimiyo dano gipaka dok gimiya deyo, ento gin onoŋo pe gitwero winyo lok wacel.” Man Rwot ma owaco.

Lok kom agulu ma gupoŋ woko ki koŋo vino

12Rwot owaco kuman ni, “Jeremia, in itit lok man bot jo Icrael ni, ‘Rwot Lubaŋa me mony owaco kuman ni, “Agulu acel acel bipoŋ woko ki koŋo vino.” ’ Gibiwaco botwu ni, ‘Pe wamito waŋe ni agulu acel acel bipoŋ wo ko ki koŋo vino’ 13Ci lacen in ibiwaco botgi ni, ‘Nen, abipiko jo ducu ma gibedo i lobo man ki koŋo vino ci gidoko lumero, luker ma gibedo i wi komker pa Daudi, ajwagi, lunebi kacel ki jo ducu ma gibedo i Jerucalem. 14Abicanyo ŋat man ki lawote, wego ki litinogi kacel, man Rwot ma owaco, Pe abiparo pigi, pe abiweko gibedo kwo, kadi wa kica bene pe bimaka i komgi, wek pe atyekgi woko.’ ”

15Wuter itwu, wuwiny;

pe myero wubed ki wakke,

pien Rwot doŋ otyeko loko.

16Wumi deyo bot Rwot Lubaŋawu

ma pud peya okelo colpiny,

ma pud tyenwu pe ogwaŋŋe

i wi godi ma piny ribiribi;

ma pud peya noŋo olokke odoko mutu macol licuc,

en leŋpiny ma onoŋo wutye ka genone-ni.

17Ka ce pe wubiwinyo,

ci abikok laliŋliŋ i muŋ pi wakkewu:

abikok matek noŋo pig waŋa mol cito piny lipyaa,

pien jo pa Rwot doŋ giterogi woko macalo opii.

18Rwor owaco bot Jeremia ni,

“Tit bot kabaka gin ki minne

ni gua ki i komkergi gubin woko i kabedo mapiny,

pien lalukanagi maber twatwal doŋ opoto woko piny ki i wigi.”

19Gaŋi me Negeb ducu doŋ gilorogi woko,

pe tye ŋat mo ma myero oyabgi.

Jo Juda ducu doŋ giterogi woko i lobo ma pe megi,

gin ducu doŋ giterogi woko i opii.

20“Wun jo Jerucalem wunen!

Lukworwu tye ka bino kun gia ki i lobo ma tye yo tun acam!

Jo ma miyogi i ciŋwu ni wugwokgini gitye kwene,

danowu macalo lwak romi ki dyegi ma gibeco adada-ni?

21Ibiwaco gin aŋo

ka jo ma yam in kikomi aye

ipwonyogi ni wek gubed luremi, aye giketogi me loyi?

Arem matek pe biketo komi woko,

calo arem pa dako ma tye ka nywal?

22Doŋ ka ce ipenyo ni piŋo gin ma kit man obino i komi,

piŋo boŋo ma i pyeri bene giyeco woko,

dok ginywari kwede-gu;

man otimme pien onoŋo balli doŋ rac ma okato kare.

23Laetiopia mo tika twero loko raŋi me del kome,

nyo kwac bene twero kwanye raŋi ma i kome ma obedo kwicikwicini woko?

Ka tye kit meno, wun ma wuniyo ki timo gin marac keken-ni,

wutwero pwonnye me tiyo gin ma tye atir.

24Abikeyowu woko calo cuŋ kal

ma yamo kodo ki i tim aroo ci tero woko.

25Man aye gin ma gipokki,

dul ma doŋ atyeko pimone woko piri,

man Rwot ma owaco,

pien wii doŋ otyeko wil woko i koma ibedo ka geno lok goba keken.

26An Rwot kikoma aye ma abiwalo boŋoni woko ki i pyeri aumo ki waŋi,

miyo lewicci nen woko ka maleŋ.

27Doŋ atyeko neno gin me kwer ma itimo,

tim me abor ki mito tigoni, ki tim malayani marac adada,

ma ibedo ka timone i wi cere i dye tim.

Can i wiwu, wun jo Jerucalem!

Gin man bitero kare ma rom mene ma noŋo pud peya gilonyowu wudoko leŋ?”

Baibul 1985

© 1985 The Bible Society of Uganda

More Info | Version Index