Search form

Jeremia 34

Lok pa Jeremia ma oloko bot Jedekia

1-Rwot oloko ki Jeremia i kare ma Nebukadnejar kabaka me Babilon ki dul monnye, ki dul mony pa lurok ducu ki jo me rok ducu mapatpat ma gitye i te locce, onoŋo gitye ka lweny i kom Jerucalem ki i gaŋi ducu ma gurumo macokcok kwede. 2Rwot Lubaŋa pa Icrael, owaco bot Jeremia ni ocit owac ki Jedekia kabaka me Juda ni, “Nen, abemiyo gaŋ man woko i cin kabaka me Babilon, ci en biwaŋo woko licwic ki mac. 3Pe ibibwot ki i ciŋe, Gibimaki woko ci gimii bote. Ibineno kabaka me Babilon ki waŋi dok bene ibilok kwede Waŋ ki waŋ; ci i kare meno gibiteri woko i Babilon. 4Kabaka Jedekia, winy gin ma an Rwot atye ka wacone mukemo in. Pe gibineki i lweny ki pala lucwan. 5In ibito ki kuc, dok kit macalo gu bedo ka wano aŋwece i kare ma giyiko kwarowu, ma onoŋo gin luker ma gukwoŋo nyimwu, kit meno dano bene gibiwaŋo gin ma ŋwece kur piri, Gibikoki kun giwacci, ‘Kabakawa doŋ oto woko do!’ An Rwot doŋ atyeko loko lok man.”

6Cutcut lanebi Jeremia otito lok man bot Jedekia kabaka me Juda ki i Jerucalem, 7i kare ma dul mony pa kabaka me Babilon tye ka lweny i kom Jerucalem ki i kom gaŋi ducu me Juda ma yam giweko gudoŋ, Lakic ki Ajeka; magi keken aye onoŋo gubedo gaŋi ma girumo ki cel gogo ma gudoŋ i Juda.

Jo Juda gubwolo opiigi

8Rwot oloko ki Jeremia lacen i kare ma doŋ kabaka Jedekia otyeko keto gicikke ki jo ducu ma i Jerucalem me tito pi gonyo opiigi woko. 9Guketo gicikke ni dano acel acel bigonyo opiine ma gin jo Ibru, laco kacel ki dako, wek ŋat mo pe olok Lajudaya lawote obed opii. 10Ci dano ducu kacel ki lutelgi gumoko gicikke meno pi gonyo opiigi woko, pe dok me makogi wek gubed opii tyen me aryo. Gugonyo opiigi woko guweko gucito gire. 11Ento lacen dok gumako opii ma co ki ma mon, gumakogi gudwokogi cen kun yam gugonyogi woko, ci gumiyo gudok i te locgi macalo opii.

12I kare meno en aye Rwot. 13Lubaŋa pa Icrael, owaco bot Jeremia ni, “Yam aketo gicikke ki kwarowu i kare ma akwanyogi ki i lobo Ejipt, ki i ot me can. Awaco botgi ni, 14-i tum mwaka me abicel dano acel acel myero ogony Laibru lawote ma yam gicato bote macalo opii ma doŋ otyeko tic bote pi mwaka abicel; myero gugonygi woko wek doŋ pe guti botgi. Ento kwarowu yam pe guketo cwinygi i lokka dok bene pe guciko itgi me winyone. 15Ento i kare ma okato macokcok-ki onoŋo wun Wuŋut ci wutiyo gin ma tye atir i waŋa kun wutito lok me gonyo opiiwu, dano acel acel ki lawote, dok bene wuketo gicikke i nyima i ot ma gilwoŋo ki nyiŋa-ni. 16Ento lacen dok wulokke ci wupyedo nyina kun dano acel acel dok okwanyo opii ma co ki ma mon odwokogi cen bote, ma onoŋo nene doŋ wugonyogi woko macalo mitgi tye, ci wukelogi wuketogi i te loc me opii doki aye. 17Pi meno, an Rwot awaco kuman ni, onoŋo pe wulubo cikka i kare ma wutito lok me gonyo opiiwu, pe wugonyo jo Ibru wadiwu woko ki i opii, Pi meno, an aye doŋ atito botwu ni, abigonyowu wek ginekwu woko i lweny, two gemo binekowu ki kec bene binekowu woko. Man Rwot ma owaco. Abimiyo wudoko gin ma kelo lworo bot ker ducu ma tye i wi lobo. 18-19Lutel me Juda ki Jerucalem kacel ki ludito ma giloyo gaŋ kal, ajwagi, ki jo me lobo meno ducu, guketo gicikke kweda kun giwoto ki i kin wod twon ma guŋolo i dul aryo. Ento guturo gicikke ma gin guketo ki i nyima-ni, pe gugwoko gin ducu ma mako gicikke man. Kit meno abitimo i kom jo man gin ma gin gutimo i kom wod twon. 20Abimiyogi woko i ciŋ lukworgi. Abimiyogi woko i ciŋ jo ma mito nekogi, doŋ komgi muto-ni winyo ki ŋuu me tim aye ma bicamo. 21Abimiyo Jedekia kabaka me Juda kacel ki rwodine i cin lukworgi ma gimito nekogi. Abimiyogi woko bot dul mony pa kabaka me Babilon, ma gugiko lweny woko i komwu-ni. 22Nen, abicikogi, ci gidwogo cen i gaŋ man. Gibilweny i kome, gibimako, ci giwaŋo woko licwic ki mac. Abimiyo gaŋi me Juda ducu lokke doko macalo tim aroo ka ma dano mo pe bedo iye. Man Rwot ma owaco.”

Baibul 1985

© 1985 The Bible Society of Uganda

More Info | Version Index