Search form

Yubu 14

Lok pa Yubu i kom kwo me lobo man ma bitum woko oyot

1“Dano ma dako onywalo nino me kwone nok, opoŋ ki ayelayela.

2En bi no calo ature ci ner woko oyot;

en rwenyo calo tipo, pe ri nakanaka.

3Ci in dok iciko waŋi i kom ŋat macalo meno,

ikela i nyimi wek inolla kop?

4Aŋa ma twero kelo gin maleŋ ki kom gin ma pe leŋ?

Pe tye ŋat mo wacel.

5Gityeko ŋolo wei nino me kwone,

in iŋeyo wel dwe ma imiye;

ityeko nyuto ka ma kwone bigik iye pe dok kato.

6Lok waŋi inen ceŋ, wek en obedi,

wek otyek ninone ki kuc macalo latic pi mucara.

7“Dano twero bedo ki gen pi yat,

ni meno ka gireto piny ci dok binyuro,

pud dok bilot aye.

8Kadi Lwite ori oteggi i lobo,

kadi ajutte yam oto la i nom,

9ento tekke pii tye bicwico woko,

bolo jaŋe calo yat ma pud gipito apita.

10Ento dano to mere ci pe doŋ a malo;

kwone gik woko, ci en doŋ tye kwene?

11Macalo pii tum wo ko ki i nam, ki kulu dwoŋ two woko,

12kumeno dano bene buto piny ci pe dok a;

en pe dok bico nio waŋ ma polo doŋ pe,

pe bico ki i waŋ ninone. 13Kono do ikana i lyel,

kono ikana waŋ ma kinigani doŋ okato!

Kono icikka kare wek ipo pira doki!

14Ka dano doŋ oto, pud dok bibedo kwo?

Kono icikka kare, kono atyeko kare me waŋ ticca ducu,

kun akuro nino ma myero gigonya iye.

15Ka lacen ibilwoŋa, ci abigamo dogi;

pira bibedo mitti mada, pien in aye iketo an.

16Lacen ibineno ka ma acito iye ducu,

ento pe ibikiya pi neno balla;

17ibitweyo balla woko i kicaa, ibiumo wi rocca ducu.

18“Ento got madit poto ci nidde woko,

pata gikobo woko ki i kakare.

19Pii mudo gweŋ woko,

kot ma cwer matek molo lobo woko;

in bene ityeko gen pa dano woko kit meno.

20In ibwoye woko matwal, ci en cito gire;

imiyo waŋe lokke, ci iryeme woko.

21Litinone ginoŋo deyo, ci en pe ŋeyo;

gidwokogi piny, ci en pe niaŋ gin mo iye.

22En bedo ka winyo mere arem me kome keken,

en koko cwercwiny ma mere kene.”

Baibul 1985

© 1985 The Bible Society of Uganda

More Info | Version Index