Search form

Yubu 26

Yubu otito pi twero pa Lubaŋa

1Yubu dok ogamo ni,

2“Kit ma ikonyo kwede dano ma pe tye ki twero!

Kit ma ilaro kwede bad dano ma pe tye ki tek!

3Kit ma ikonyo kwede ŋat ma pe ki ryeko ki tam,

kun itito bote lok me ŋec maber mapol!

4Aŋa ma okonyi ki waco lok meno?

Cwiny ma it ye ka lok kwede-ni ilimo ki bot aŋa?

5“Tipo pa jo muto ma gitye piny komgi myel,

pii ki gin ma bedo iye bene gitye ki lworo.

6Lyel tye nono i nyim Lubaŋa,

lobo pa jo muto pe tye ki gi-umo wiye.

7Lubaŋa oyaro but piny tuŋ acam i dye yamo noŋo,

pe oŋabo lobo i kom gin mo.

8En tweyo pii malo i pol mere mucido licuc,

pol pe tyer woko pi pek pa pii.

9En umo waŋ dwe, yaro polle i wiye.

10En oluŋo lawala i wi pii

i waŋ co ma poko leŋo ki mutu.

11Wir ma otiŋo pol giyeŋŋe, gibedo ka uro ka en ojukogi.

12Nam oliŋ pi twerone,

ogoyo min kulu Rakab pi ryekone.

13Yamone omiyo polo owarre onen maleŋ;

en aye ocobo twol ma tye ka mol riŋo woko.

14Nen, man pud doge, pe kom ticce kikome,

wawinyo macalo lok ma gikwilo akwila ma winyone tek,

ento aŋa ma niaŋ i kom twerone

ka mor calo mor kot?”

Baibul 1985

© 1985 The Bible Society of Uganda

More Info | Version Index