Search form

Yubu 28

Ryeko pire tek makato jami ducu

1“Bur tye ka ma gikwinyo iye ryal,

kabedo tye ka ma giliyo iye jabu.

2Nyonyo gikwinyo ki i ŋom,

mola ginoŋo ki i gweŋ ka gilenyo.

3Dano giroto i nom i colpiny,

kun giyenyo gweŋ nyonyo nio wa i agikkine

i mutu ki piny macollicuc.

4Gikwinyo bur i nota ka ma dano pe bedo iye;

luwot i yo wigi wil woko i komgi.

Gilutogi i bur ki tol ci gilyerre iye ka ma dano mukene pe.

5Cam cek ki i lobo,

ento i tere piny gibedo ka mukone woko calo gimuko ki mac.

6I kin gweŋ tye iye godi matino ma bulu me wel,

ma tye iye luru jabu.

7“Yo ma cito kunnu acut mo pe ma ŋeyo,

ocecu peya oneno.

8Lee tim ma, ginyatte yam peya gunyono;

labwor bene peya owok ki iye.

9“Dano cwalo ciŋe wa i kom pata matek,

muko wa got madit ki i tere piny.

10En baro yo pii ki i gweŋ,

ci neno gin me wei ducu.

11Culo kor pii woko wek kulu pe gumol;

gin mukanne en kela woko ka maleŋ.

12“Ento ryeko gibinoŋo ki kwene?

Niaŋ matut kabedone tye kwene?

13Dano pe ŋeyo yo ma cito iye,

pe noŋŋe i lobo pa jo makwo.

14Kut wacci, ‘Pe tye iiya,’

nam bene waco ni, ‘Pe bota.’

15Lonyo madwoŋ pe twero wilone,

pe tye wellim mo ma giromo culo pire.

16Pe gitwero kwaŋo welle i jabu me Opir,

pe giporo ki kidi me wel macalo onik nyo capir.

17Jabu ki madara pe twero rom kwede,

pe gibilokone kadi wa ki atego me jabu maber.

18Pe gibipo pi tiko me wel makwarre nyo matarre:

wel ryeko tye malo kato jami mukene me wel woko ducu.

19Kidi ma obedo atworo me Etiopia pe gitwero porone kwede,

wa jabu ma giliyo maber bene pe romo wilone.

20“Ci doŋ ryeko a ki kwene ce?

Niaŋ matut bedo kwene?

21Okanne woko ki i waŋ gin makwo ducu,

oumme woko ki bot winyo me polo.

22Lyel ki to giwaco ni,

‘Lok i kome wawinyo awinya keken.’

23“Lubaŋa aye ŋeyo yone,

en ŋeyo kabedone,

24pien en neno wa i agikki me lobo,

neno wa jami ducu ma tye i te polo.

25I kare ma yam en omoko kit ma teko me yamo myero obed kwede,

kun nyuto bene ka ma pii me nam myero ogik iye;

26i kare ma cen en oketo cik pi kot,

dok ocimo yo ma wil pa kot ma mor myero olubi;

27i kare meno Lubaŋa oneno ryeko, oŋiyo maber,

omiyo ocuŋ ci otato tere,

28-Ci owaco bot dano ni meno,

‘Nen, lworo Rwot en aye ryeko;

bwoto timo gin maracaye ke lo niaŋ matut.’ ”

Baibul 1985

© 1985 The Bible Society of Uganda

More Info | Version Index